26 نومبر ڈی چوک احتجاج کیس: بشریٰ بی بی کی عبوری ضمانت میں 5 مئی تک توسیع

اسلام آباد: سابق خاتون اوّل بشریٰ بی بی کی 26 نومبر ڈی چوک احتجاج کیس میں عبوری ضمانت میں 5 مئی تک توسیع کردی گئی۔انسداد دہشت گردی عدالت کے جج طاہرعباس سپرانے درخواست ضمانت پر کیس کی سماعت کی،بشریٰ بی بی کے وکلاء انصرکیانی، شمس کیانی انسداددہشت گردی عدالت پیش ہوئے۔وکیل صفائی نے کہا کہ بشریٰ بی بی کو تاحال پولیس نے شامل تفتیش نہیں کیا،جج طاہرعباس سپرا نے کہا آج ہی تفتیشی افسر کو ڈائریکشن دوں گاکہ بشریٰ بی بی کو جیل میں شامل تفتیش کریں۔بشریٰ بی بی کے خلاف دہشت گردی دفعہ کے تحت تھانہ کوہسار میں مقدمہ درج ہے، علاوہ ازیں بشریٰ بی بی کی حاضری سے استثنیٰ اور شامل تفتیش کرنے کی درخواست دائر کر دی گئی ،عدالت نے بشریٰ بی بی کی حاضری سے استثنیٰ کی درخواست منظور کرلی۔