سفارتی کمیٹی عالمی سطح پر پاکستان کا موقف بھرپور انداز میں پیش کرے گی:بلاول بھٹو زرداری

اسلام آباد:پاکستان پیپلز پارٹی کے چیئرمین بلاول بھٹو زرداری نے کہا ہے کہ پاکستان کا پیغام امن، استحکام اور ترقی ہے، سفارتی کمیٹی عالمی سطح پر پاکستان کا موقف بھرپور انداز میں پیش کرے گی۔سفارتی کمیٹی کے ارکان کے ہمراہ میڈیا سے گفتگو کرتے ہوئے پاکستان پیپلز پارٹی کے چیئرمین بلاول بھٹو زرداری نے کہا کہ پاکستان دہشت گردی کے خاتمے کے لیے کوشاں ہے، بھارت نے جارحیت کا راستہ اختیار کیا۔ پہلگام واقعے کے بعد بھارت نے ثبوت کی بجائے الزام تراشی کا راستہ چنا جبکہ پاکستان نے شفاف عالمی تحقیقات کی پیشکش کی۔انہوں نے کہا کہ سفارتی کمیٹی وزیراعظم کی ہدایت پر مختلف ملکوں کا دورہ کرے گی عالمی سطح پر اس معاملے کو اٹھائے گی اور یقینا جیت سچ اور امن کی ہوگی۔ بلاول بھٹو زرداری نے کہا کہ سندھ طاس معاہدے کی خلاف ورزی اور پانی کو بطور ہتھیار استعمال نہیں کرنے دیں گے۔ انہوں نے کہا کہ خطے میں امن استحکام کے لیے کشمیر سمیت تمام تصفیہ طلب مسائل حل کرنا ہوں گے۔وفاقی وزیر مصدق ملک نے کہا کہ بھارت کا خطے کی تھانیداری کا بت پاش پاش ہو گیا پاکستان کی خود مختاری اور علاقائی سالمیت کا تحفظ یقینی بنائیں گے۔انجینئر خرم دستگیر نے کہا کہ بھارتی جنگی جنون خطے کے لیے شدید خطرہ ہے سفارتی کمیٹی بھارتی جارحیت اور پاکستان کے رد عمل کے بارے میں عالمی برادری کو آگاہ کرے گی۔فیصل سبز واری نے کہا کہ بھارت نے نہتے شہریوں کو نشانہ بنایا جبکہ پاکستان نے بھارتی جارحیت کے جواب میں بھی احتیاط کا مظاہرہ کیا ۔