عمران خان اور بشریٰ بی بی کی سزا معطلی کی درخواستوں پر سماعت آج بھی نہ ہوسکی

اسلام آباد: بانی پی ٹی آئی عمران خان اور سابق خاتون اول بشریٰ بی بی کی سزا معطلی کی درخواستوں پر سماعت آج نہیں ہوسکی۔رپورٹ کے مطابق اسلام آباد ہائی کورٹ کے جسٹس محمد آصف کے رخصت پر ہونے کے باعث سماعت نہیں ہوئی۔قائم مقام چیف جسٹس سرفراز ڈوگر اور جسٹس محمد آصف کو سزا معطلی درخواستوں پر سماعت کرنی تھی۔دوسری جانب ایف آئی اے عدالت اسلام آباد نے عمران خان اور بشریٰ بی بی کے خلاف توشہ خانہ 2 کیس کی سماعت یکم جولائی تک ملتوی کردی۔ایف آئی اے کے اسپیشل جج سینٹرل شاہ رخ ارجمند کی عدالت سے وکلاء کو آگاہ کردیا گیا۔ خالد یوسف چوہدری ایڈووکیٹ بانی پی ٹی آئی نے کہا کہ سماعت یکم جولائی تک ملتوی ہو گئی ہے۔عمران خان کی بہن علیمہ نے میڈیا سے گفتگو کرتے ہوئے کہا کہ 190 ملین پاؤنڈ کیس میں اب 26 جون کی تاریخ دی گئی ہے، ہمیں کہہ رہے تھے اگلے ہفتے بتائیں گے کہ اگلی تاریخ کون سی ہوگی۔ان کا کہنا تھا کہ ہم نے کہا اگر آئندہ کی تاریخ نہیں دیں گے تو ہم یہاں سے اٹھیں گے نہیں، پھر ہمیں کہا گیا ہے کہ بانی اور بشری بی بی کی سزا معطلی درخواستوں پر سماعت 26 جون کو ہوگی۔