معیشت میں شفافیت کیلئےیجیٹل لین دین کا نظام قائم کرنا انتہائی اہم ہے، وزیراعظم

اسلام آباد:وزیراعظم محمد شہباز شریف کی زیر صدارت کیش لیس اکانومی کے حوالے سے ایک اہم اجلاس منعقد ہوا۔ اس موقع پر وزیراعظم نے ڈیجیٹل پیمنٹس انوویشن اینڈ ایڈوپشن کمیٹی، ڈیجیٹل پبلک انفراسٹرکچر کمیٹی، اور گورنمنٹ پیمنٹس کمیٹی تشکیل دینے کی ہدایت دی۔ ان خصوصی سب کمیٹیوں کا مقصد عوام اور کاروباری افراد کے درمیان ادائیگیوں کے لیے سہولیات فراہم کرنا، ڈیجیٹل نظام سے متعلق آگاہی دینا، پاکستان ڈیجیٹل اتھارٹی کو فعال کرنا، ایک قومی ڈیجیٹل ماسٹر پلان بنانا، حکومت اور نجی شعبے کے درمیان لین دین کو آسان بنانے کے حوالے سے سفارشات پیش کرنا ہے۔وزیراعظم نے کیش لیس نظام کو فروغ دینے کے لیے ڈیجیٹل لین دین کو عوام کے لیے نقد ادائیگیوں کی نسبت ارزاں اور آسان بنانے کی ہدایت کی اور ادائیگیوں کے ڈیجیٹل نظام راست (RAAST) کو وفاق سمیت تمام صوبوں میں قائم کرنے کا حکم دیا۔ انہوں نے زور دیا کہ معیشت میں شفافیت لانے کے لیے ڈیجیٹل لین دین کا نظام قائم کرنا انتہائی اہم ہے، کیونکہ پوری دنیا میں ترقی یافتہ ممالک اور کامیاب معیشتوں میں کیش لیس نظام کو ترجیح دی جا رہی ہے۔ وزیراعظم نے لین دین اور ادائیگیوں کے ڈیجیٹل نظام کے قیام کے لیے جدید ٹیکنالوجی کے استعمال پر بھی زور دیا، یہ بھی کہا کہ بینکاری نظام کے تحت گردش کرنے والی رقوم کو حکومتی منصوبوں میں سرمایہ کاری کے لیے استعمال کیا جا سکتا ہے۔ وزیراعظم نے سرکاری اور نجی شعبوں کے مابین لین دین کو کیش لیس بنانے کی بھی ہدایت دی۔اجلاس میں وزیراعظم کو ملک میں کیش لیس نظام قائم کرنے کے لیے کیے گئے اقدامات کی پیشرفت سے آگاہ کیا گیا۔ بریفنگ میں بتایا گیا کہ اس وقت راست سسٹم سے 4 کروڑ صارفین مستفید ہو رہے ہیں، جن کی تعداد بڑھانے کے لیے متعدد اقدامات کیے جا رہے ہیں۔ وفاقی حکومت کے تمام مالی لین دین راست سسٹم کے ذریعے کیے جا رہے ہیں اور یہ نظام صوبوں میں بھی لاگو کیا جا رہا ہے۔ یہ بھی بتایا گیا کہ فنٹیک (FINTECH) اس ایکو سسٹم کی ایک اہم کڑی ہے، اور پاکستان ڈیجیٹل اتھارٹی قائم کی جا چکی ہے جس کے تحت ملکی معیشت کو کیش لیس بنانے پر کام جاری ہے۔ ڈیجیٹل پبلک انفراسٹرکچر کمیٹی وفاقی وزارت آئی ٹی کی قیادت میں کام کرے گی، جبکہ کیش لیس پاکستان اسٹیئرنگ کمیٹی وزارت آئی ٹی سیکریٹریٹ میں قائم ہے۔ سمارٹ اسلام آباد پائلٹ منصوبے کے تحت وزارت آئی ٹی اسلام آباد کو پاکستان کا پہلا کیش لیس شہر بنانے کے لیے اقدامات لے رہی ہے۔اس اجلاس میں وفاقی وزیر اقتصادی امور احد خان چیمہ، وفاقی وزیر پیٹرولیم علی پرویز ملک، وفاقی وزیر آئی ٹی شزا فاطمہ خواجہ، وفاقی وزیر ماحولیاتی تبدیلی ڈاکٹر مصدق مسعود ملک، گورنر سٹیٹ بینک، چیئرمین ایف بی آر، اور متعلقہ اداروں کے اعلیٰ افسران نے شرکت کی۔