پاکستان عالمی صحت میں مؤثر شراکت داری کے لیے تیار، سید مصطفیٰ کمال

بیجنگ میں منعقدہ بواؤ گلوبل ہیلتھ کانفرنس سے خطاب کرتے ہوئے وفاقی وزیر صحت سید مصطفیٰ کمال نے کہا کہ پاکستان 25 کروڑ سے زائد آبادی کے ساتھ صحت کے شعبے میں عالمی تعاون کے لیے وسیع امکانات رکھتا ہے۔نرسز اور پیرامیڈکس کی عالمی کمی کے تناظر میں انہوں نے زور دیا کہ پاکستان تربیت اور تعاون کے ذریعے اہم کردار ادا کر سکتا ہے۔ انہوں نے بتایا کہ تین روز قبل وزیراعظم پاکستان نے ڈرگ ریگولیٹری اتھارٹی آف پاکستان (DRAP) کے جدید ڈیجیٹل نظام کا افتتاح کیا، جس کے تحت میڈیکل ڈیوائسز کی رجسٹریشن کا عمل صرف 20 دن میں مکمل ہوگا۔وزیر نے صحت کے شعبے کو درپیش چیلنجز سے نمٹنے کے لیے حکومت کے فعال کردار کا ذکر کیا اور بتایا کہ آبادی کے اضافے سے نمٹنے کے لیے ایک اعلیٰ سطحی کمیٹی تشکیل دی گئی ہے۔ انہوں نے پاکستان کے ویژن کو اجاگر کیا جو مریض مرکوز، پرائمری ہیلتھ کیئر اور ٹیلی میڈیسن پر مبنی نظام پر زور دیتا ہے۔کمال نے کہا کہ چین جیسے ممالک صحت کے شعبے میں پاکستان کے اہم شراکت دار بن سکتے ہیں، اور زور دیا کہ صحت مند آبادی کے بغیر معیشت کی ترقی ممکن نہیں۔