ایشیا کپ: سری لنکا کیخلاف اہم میچ کیلئے پاکستان ٹیم ابوظبی پہنچ گئی

ابوظہبی: پاکستان کرکٹ ٹیم ایشیا کپ کے سپر فور مرحلے کا دوسرا میچ کھیلنے کیلئے دبئی سے ابوظبی پہنچ گئی ہے، وہ کل سری لنکا کے خلاف میدان میں اترے گی۔آج قومی کرکٹ ٹیم کی کوئی سرگرمی شیڈولڈ نہیں تھی، کرکٹرز نے ابوظبی پہنچنے کے بعد آرام کیا جبکہ کچھ کھلاڑیوں نے انفرادی طور پر معمول کے مطابق جم میں ٹریننگ کی۔خیال رہے کہ پاکستان کرکٹ ٹیم سپر فور مرحلے میں پہنچنے کے بعد بھارت سے اپنا پہلا میچ ہار چکی ہے، اب فائنل کی ریس میں رہنے کیلئے منگل کو سری لنکا کو شکست دینا ہوگی، جبکہ اگلا میچ جمعرات کو بنگلادیش سے ہوگا۔گزشتہ روز دبئی میں کھیلے گئے بھارت سے میچ میں پاکستانی بولرز 172رنز کا دفاع نہیں کر سکے۔ ایشیا کپ کرکٹ ٹورنامنٹ میں بڑے اسکور کے باوجود پاکستانی بولنگ ہدف کا دفاع کرنے میں ناکام رہی اور بھارت نے پاکستان کے خلاف سپر فور کا میچ 6 وکٹ سے جیت لیا اور لگاتار چوتھی کامیابی حاصل 7 گیندوں پہلے حاصل کرلی۔پاکستانی ٹیم آٹھویں بار بھارت کے خلاف پہلے بیٹنگ کرتے ہوئے میچ ہاری ہے۔