ایشیا کپ:بھارت فائنل میں ،آج پاک بنگلا دیش مد مقابل

دبئی :ایشیا کپ کے سپر فور مرحلے میں بھارت نے بنگلادیش کو 41 رنز سے شکست دے کر فائنل میں جگہ بنالی۔دبئی کرکٹ سٹیڈیم میں کھیلے گئے میچ میں بنگلادیش کی ٹیم 20 ویں اوور میں 169 کا تعاقب کرتے ہوئے 127 رنز بنا کر آؤٹ ہوگئی۔بنگلادیش کی جانب سے سیف حسن 69 رنز بنا کر نمایاں رہے ۔ پرویز حسین ایمان 21 رنز بنا سکے ۔بھارت کی جانب سے کلدیپ یادیو نے 3، جسپریت بمراہ اور ورون چکرورتی نے 2، 2 کھلاڑی آؤٹ کئے ۔اس سے قبل بھارت نے بنگلا دیش کی دعوت پر پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 168 رنز سکور کیے ۔بھارت کی جانب سے ابھیشیک شرما 75 رنز بنا کرنمایاں رہے ۔ ہاردک پانڈیا 38، شبھمن گِل نے 29 رنز بنائے ۔اکسر پٹیل 10 رنز بنا کر ناٹ آؤٹ رہے ۔بنگلادیش کی جانب سے رشاد حسین نے 2، جبکہ تنظیم حسن ثاقب، مستفیض الرحمان اور محمد سیف الدین نے 1، 1 کھلاڑی کو آؤٹ کیا۔ٹورنامنٹ میں آج پاکستان اور بنگلا دیش کے درمیان میچ کھیلا جائیگا۔