گردشی قرض کے نئے منصوبے پر وفاقی چیمبرکا اطمینان

کراچی :وفاقی چیمبر کے صدر عاطف اکرام شیخ نے وفاقی حکومت کی جانب سے بجلی کے شعبے میں گردشی قرض کے خاتمے کے لیے نئے مالیاتی منصوبے کو خوش آئند قرار دیا ہے ۔صدر ایف پی سی سی آئی نے کہا کہ گردشی قرض پاکستان کی معیشت کے تمام وسائل کو نگل رہا تھا اور یہ مستقل طور پر بڑھتا جا رہا تھاجس سے بجلی کا شعبہ شدید متاثر ہورہا تھا۔انہوں نے کہا کہ وفاقی وزیر توانائی اویس لغاری کی سربراہی میں قائم ٹاسک فورس نے اس دیرینہ مسئلے کے حل کے لیے قابلِ تحسین کردار ادا کیا اور وہ مبارکباد کی مستحق ہے ۔ عاطف اکرام شیخ کے مطابق ٹاسک فورس نے آزاد پاور پروڈیوسرزکے ساتھ کامیاب مذاکرات کیے اور گردشی قرض کا یہ منصوبہ تمام اداروں کی اجتماعی کاوشوں کا نتیجہ ہے ۔انہوں نے کہا کہ بجلی کے شعبے میں لائن لاسز بھی ایک بڑا چیلنج ہیں اور اگلے مرحلے میں اس مسئلے پر توجہ دی جانی چاہیے۔