ورلڈ بینک کا پاکستان کے دس سالہ ترقیاتی پروگرام کے لیے حمایت کا اعادہ

اسلام آباد:ورلڈ بینک نے پاکستان کے دس سالہ ترقیاتی پروگرام کے لیے حمایت کا اعادہ کر دیا۔وفاقی وزیر خزانہ اورنگزیب نے سعودی عرب میں ورلڈ بینک کی ایم ڈی اینا بجردے سے ملاقات کی، جس میں سالانہ الولا کانفرنس برائے ایمرجنگ مارکیٹ اکانومی کے موقع پر ہوئی۔الولا کانفرنس میں اُبھرتی ہوئی معیشتوں کو درپیش اہم معاشی مسائل اور مواقع پر بات کی جاتی ہے، ملاقات میں کنٹری پارٹنر شپ فریم ورک اور ترقیاتی ترجیحات پر تبادلہ خیال کیا گیا۔ملاقات کے دوران توانائی، تعلیم، صحت، موسمیاتی تبدیلیوں اور مالیاتی اصلاحات پر گفتگو کی گئی،اینا بجرڈے نے پاکستان کے 20 ارب ڈالر کے دس سالہ ترقیاتی پروگرام کے لیے ورلڈ بینک کی حمایت کا اعادہ کیا۔اینا بجرڈے نے پروگرام کے ترقیاتی اثرات کو زیادہ سے زیادہ کرنے کے لئے موثر عمل درآمد کی اہمیت کو اُجاگر کیا، اس موقع پر وزیر خزانہ محمد اورنگزیب نے ورلڈ بینک کے ساتھ قریبی تعاون کے عزم کا اعادہ کیا۔وزیر خزانہ سینیٹر محمد اورنگزیب نے متعلقہ وفاقی وزارتوں کے ذریعے مکمل تعاون کی یقین دہانی کرائی، اُنہوں نے زور دیا کہ بہتر کوآرڈینیشن اور بروقت عمل درآمد کو یقینی بنانے کے لیے صوبائی حکومتوں کے کردار اور تعاون ضروری ہے۔