پاکستان کرکٹ ٹیم مارچ میں بنگلادیش کا دورہ کرے گی

لاہور:پاکستانی مینز کرکٹ ٹیم ٹی20 ورلڈ کپ کے بعد مارچ میں بنگلادیش کا دورہ کرے گی۔پاکستان ٹیم 9 مارچ کو بنگلادیش پہنچے گی، دورے کے دوران دونوں ٹیموں کے درمیان 3 ایک روزہ میچز کی سیریز کھیلی جائے گی۔پاکستانی ٹیم 10 مارچ کو پریکٹس سیشن میں حصہ لے گی جبکہ پہلا میچ 11 مارچ، دوسرا 13 مارچ اور تیسرا 15 مارچ کو کھیلا جائے گا، سیریز کے تمام میچز شیر بنگلہ نیشنل کرکٹ اسٹیڈیم ڈھاکا میں کھیلے جائیں گے۔پاکستان کا یہ جولائی 2025ء کے بعد بنگلادیش کا دوسرا دورہ ہوگا ، گزشتہ برس کی ٹی20 سیریز بنگلادیش نے جیتی تھی۔اس سے قبل مئی اور جون 2025ء میں بنگلادیشی ٹیم نے پاکستان کا دورہ کیا تھا، یہ سیریز پاکستان نے سلمان علی آغا کی قیادت میں 3-0 سے جیتی تھی۔