Author: Qamar Abbas

راولپنڈی- پاکستان تحریک انصاف کے احتجاج کے پیش نظر انتظامیہ نے راولپنڈی کے اہم مقامات سیل کرتے ہوئے داخلی راستے بند اور بھاری نفری تعینات کردی ہے
لیاقت باغ میں پی ٹی آئی کی جانب سے احتجاج کو روکنے کے لیے راولپنڈی انتظامیہ نے کنٹینرز لگا کر شہر کو مکمل طور پر سیل کر دیا – کسی قسم کی ٹریفک شہر میں داخل نہیں ہو سکتی جب کہ راستے بند ہونے سے شہریوں کو مشکلات کا سامنا ہے پولیس کے ہزاروں اہل کار مختلف مقامات پر تعینات کردیے گئے ہیں
شہر میں قانون نافذ کرنے والے اداروں کی بھاری نفری تعینات ہے۔ لیاقت باغ مکمل طور پر سیل کر دیا گیا ہے اور شہر بھر میں دفعہ 144 نافذ نافذ کردی گئی ہے، جس کے تحت کسی بھی قسم کے جلسے ، اجتماع یا دھرنے کے علاوہ اسلحہ کی نمائش پر بھی پابندی ہوگی-د ریں اثنا میٹرو بس سروس بھی جزوی طور پر معطل کر دی گئی ہے
شہر کے تمام اہم چوراہے بند
دریں اثنا فیض آباد سے مریڑ چوک کو مکمل سیل کردیا گیا ہے مری روڈ داخل ہونے والے تمام چوک، لیاقت باغ چوک ،کمیٹی چوک ،اصغر مال چوک بھی سیل ہیں اس کے علاوہ چاندنی چوک ،رحمان آباد چوک ، صادق آباد چوک ،شمس آباد ڈبل روڈ چوک بھی سیل کردیا گیا ہے۔ اسی دوران لیاقت باغ کو تالے لگا کر مکمل سیل کر دیا گیا ہے-مری روڈ پر داخل ہونے والی چھوٹی چھوٹی گلیاں ریڑھے خار دار تاروں سے سیل کردیے گئے ہیں۔ لیاقت باغ میں موجود دو سرکاری دفاتر بھی سیل کر دیے گئے ہیں۔ لیاقت روڈ ،اقبال روڈ سکستھ روڈ کے تمام تعلیمی ادارے بند ہیں- لیاقت روڈ اور اقبال روڈ کے تمام ہوٹلز بند اور کمرے خالی کرا لیے گئے ہیں- لیاقت باغ میں صبح واکنگ کی بھی اجازت نہیں دی گئی – مری روڈ اور الائیڈ اسپتالوں تک ایمبولینسوں کا داخلہ بھی بند کردیا گیا ہے اور تمام چوراہوں میں پولیس اور قیدی وینز پہنچا دی گئی ہیں
علاوہ ازیں لیاقت باغ موٹر کی جانب سائیکلوں کا داخلہ بھی مکمل بند کردیا گیا ہے- لیاقت روڈ پر ناشتہ شاپس اور تنور بھی بند ہیں-پولیس کے ساتھ آنسو گیس کے بھاری شیلز سے لیس اہلکار بھی تعینات کردیے گئے ہیں۔ میٹرو بس اسٹیشنوں پر بھی پولیس تعینات کردی گئی ہے اور میٹرو بس سروس مکمل بند کی جا چکی ہے- بائیکیا موٹر سائیکل سروس بھی دستیاب نہیں
فیض آباد کے قریبی علاقے بند، شہری خوار ہوگئے
دوسری جانب پی ٹی آئی کی ممکنہ ریلی کو روکنے کے لیے فیض آباد کے قریبی علاقوں بند کردیا گیا ہے-اسلام آباد میں میٹرو بس سروس کی بندش سے شہری خوار ہوگے – میٹرو بس سروس کے ٹریک پر جاری کام کو بھی روک دیا گیا ہے اور فیض آباد کے قریب بھاری نفری تعینات کردی گئی ہے
سرکاری دفاتر میں حاضری کم
ضلعی انتظامیہ کی جانب سے مری روڈ، لیاقت باغ، راول روڈ سمیت شہر کے اہم مقامات اور راستے بند ہونے سے سرکاری دفاتر میں حاضری معمول سے کم ہے
راولپنڈی کے تمام داخلی راستے بند
اس کے علاوہ راولپنڈی شہر میں داخلے کے اہم راستے مکمل سیل کردیے گئے ہیں-ترنول جی ٹی روڈ، موٹر وے،روات جی ٹی روڈ سے شہر میں داخلہ مکمل بند ہے- اسی طرح مری کوٹلی ستیاں کہوٹہ ٹیکسلا کلر سیداں سے راولپنڈی شہر کے راستے بھی مکمل سیل کردیے گئے ہیں- دریں اثنا لیاقت باغ چوک، کمیٹی چوک، مریڑ چوک سمیت دیگر مقامات پر خواتین پولیس کی نفری بھی تعینات کردی گئی ہے
ہر جانب رکاوٹیں، راولپنڈی کنٹینرز کا شہر بن گیا
پی ٹی آئی احتجاج کو روکنے اور شہر میں دفعہ 144 نافذ کیے جانے کے بعد ضلعی انتظامیہ کی جانب سے رکاوٹیں کھڑی کردی گئی ہیں- اسی دوران مری روڈ کے تمام پیٹرول پمپ بند کردیے گئے ہیں- صدر گوالمنڈی کے تمام راستے بھی سیل ہیں۔ شہر میں جابجا اور تمام راستے چوراہے کنٹینرز لگا کر سیل کردیے گئے ہیں، جس سے پورا راولپنڈی کنٹینرز کا شہر دکھائی دے رہا ہے۔ تمام راستوں اور بیرون شہر سے ایمبولینسوں کا اسپتالوں کے لیے راستہ بھی مکمل بند کردیا گیا ہے
اڈیالہ جیل جانے والے تمام راستے بند
راولپنڈی میں رحمان آباد چوک، شمس آباد کے علاقے بھی سیل کردیے گئے ہیں۔ شہر سے اڈیالہ جیل جانے والے تمام راستے بھی مکمل سیل ہیں اور اڈیالہ جیل کے سامنے تمام اقسام کی پارکنگ اور کھڑے ہونے پر بھی پابندی لگا دی گئی ہے۔ اڈیالہ جیل گاؤں جانے والی ٹرانسپورٹ کو بھی بند کر دیا گیا ہے۔ اڈیالہ جیل میں عام ملزمان سے ملاقاتوں کے لیے جانے والے شہری بھی پریشان ہوگئے ہیں۔ پولیس لائن ،سہالہ پولیس ٹریننگ کالج اور روات کانسٹیبلری کی مکمل نفری بھی مری روڈ پر تعینات کردی گئی ہے

اسلام آباد-رواں مالی سال 2024-25 کے پہلے 2 ماہ (جولائی،اگست)کے دوران مہنگائی میں کمی اور روپے کی قدر میں اضافہ ہوا ہے مہنگائی 23.4 فیصد سے کم ہوکر 9.6 فیصد رہی جبکہ ترسیلات زر، برآمدات، درآمدات، بیرونی سرمایہ کاری میں اضافہ ریکارڈ کیا گیا-وزارتِ خزانہ نے جولائی اور اگست میں اقتصادی کارکردگی سے متعلق رپورٹ جاری کردی ہے جس کے مطابق ر واں مالی سال2024-25 کے پہلے دو ماہ(جولائی،اگست) میں پاکستان کی معیشت میں مثبت پیش رفت ہوئی ہے، رواں مالی سال کے پہلے دو ماہ کے دوران مہنگائی میں کمی، صنعتی پیداوار اور برآمدات میں اضافہ ہوا، اکاوٴنٹ خسارے میں کمی آئی اور مالیاتی سیکٹر مضبوط ہوا-رپورٹ کے مطابق معاشی استحکام کا رجحان جاری رہنے کا امکان ہے، درست پالیسیوں کے باعث معیشت میں مزید بہتری کی توقع ہے-وزارت خزانہ کی جانب سے جاری رپورٹ کے مطابق ملکی برآمدات میں 7.2 فیصد اور درآمدات میں 13.8 فیصد کا اضافہ ریکارڈ کیا گیا، کرنٹ اکاوٴنٹ خسارے میں رواں مالی سال کے دو ماہ میں 80.9 فیصد کی کمی ریکارڈ کی گئی -وزارت خزانہ کی رپورٹ میں کہا گیا کہ مہنگائی 23.4 فیصد سے کم ہوکر 9.6 فیصد رہی، جبکہ ستمبر اور اکتوبر میں شرح 8 سے 9 فیصد تک رہنے کا امکان ہے، دوسری جانب جولائی اگست میں مالیاتی خسارہ 225 ارب روپے سے بڑھ کر 387 ارب روپے تک پہنچ گیا ہے
رپورٹ کے مطابق زرعی مشینری کی درآمدات 105.6 فیصد اضافہ کے ساتھ 17.6 ملین ڈالر رہی، فارم میکانائزیشن اور جدید زرعی طریقوں سے آئندہ مہینوں میں پیداوار میں بہتری کی توقع ہے
خریف 2024 میں یوریا کھاد کی فروخت 13.6 فیصد کمی کے ساتھ مجموعی مقدار 2,381 ہزار ٹن رہی ہے، ڈی اے پی کھاد کی فروخت خریف 2023 کے مقابلے میں 21.9 فیصد کم ہوئی جبکہ موسمیاتی تبدیلی کے باعث اور گندم کی کم قیمت کی وجہ سے خریف فصلوں کی تاخیر سے بوائی ہوسکتی ہے-رپورٹ کے مطابق جولائی 2024 میں ایل ایس ایم کی پیداوار میں 2.4 فیصد اضافہ ہوا ، جولائی 2023 میں ایل ایس ایم کی پیداوار میں5.4 فیصد کمی ہوئی تھی، 22 میں سے 14 سیکٹرز میں مثبت ترقی رہی جن میں ٹیکسٹائل، خوراک، مشروبات، کیمیکلز اور گاڑیاں شامل ہیں، ٹیکسٹائل سیکٹر مثبت رہااور 24 ماہ بعد ٹیکسٹائل سیکٹر کا ایل ایس ایم میں 18.2 فیصد حصہ رہا ہے-رواں مالی سال کے پہلے دو ماہ میں گاڑیوں کی پیداوار میں 19.5 فیصد اور فروخت میں 16.3 فیصد اضافہ ہوا، کاروں کی پیداوار میں 15 فیصد اضافہ، ٹرک اور بسوں میں 120.4 فیصد اضافہ، جبکہ ٹریکٹر کی پیداوار 26.9 فیصد کمی ہوئی جبکہ رواں مالی سال کے پہلے دو ماہ(جولائی،اگست) میں سیمنٹ کی ترسیل 6.4 ملین ٹن رہی ہے

اسلام آباد-سپریم کورٹ نے این اے 97 تاندیانوالہ، فیصل آباد میں ووٹوں کی دوبارہ گنتی سے متعلق لیگی رہنما علی گوہر بلوچ کی نظر ثانی اپیل خارج کر دی ہے
جسٹس امین الدین اور جسٹس نعیم افغان نے این اے 97 میں ووٹوں کی دوبارہ گنتی سے متعلق لیگی رہنما گوہر بلوچ کی نظر ثانی اپیل پر سماعت کی- دوران سماعت جسٹس امین الدین نے ریمارکس دیے سپریم کورٹ کا فیصلہ واضح ہے کہ دوبارہ گنتی کی درخواست نہیں دی گئی تھی
جسٹس نعیم افغان نے ریمارکس دیے کہ ریٹرننگ افسر نے الیکشن کمیشن کو تحریری جواب میں کہا کوئی درخواست نہیں ملی، سپریم کورٹ نے 21 اگست کو درخواست خارج کی اور 22 کو آپ نے آر او سے رجوع کر لیا- سپریم کورٹ فیصلے کے بعد ریٹرننگ افسر نے درخواست کی تصدیق شدہ نقل فراہم کر دی
جسٹس نعیم افغان نے ریمارکس میں کہا کہ ایسا تاثر بھی مل سکتا ہے کہ ریٹرننگ افسر کو نوازا گیا جس پر وہ اپنی بات سے مکر گیا، جس ریٹرننگ افسر نے لکھ کر دیا کہ درخواست نہیں آئی وہ اب درخواست کی تصدیق شدہ کاپی کیسے دے رہا ہے؟ جو دستاویزات اب دکھا رہے ہیں یہ پہلے ہوتیں تو ضرور جائزہ لیتے، مناسب ہوگا کہ علی گوہر بلوچ ٹربیونل سے رجوع کریں۔ وکیل شہزاد شوکت نے موقف اپنایا ٹربیونل کا وقت گزر چکا ہے۔
عدالت نے وکیل شہزاد شوکت کو ہدایت کی کہ ہم نظر ثانی درخواست خارج کریں یا آپ واپس لیں گے؟ موکل سے ہدایات لے کر آگاہ کریں جس کے بعد سماعت میں وقفہ کر دیا گیا۔
وقفے کے بعد سماعت دوبارہ شروع ہوئی تو وکیل نے عدالت کو بتایا کہ نظر ثانی اپیل پر میرٹ پر فیصلہ کیا جائے، جس پر عدالت نے لیگی رہنما علی گوہر بلوچ کی نظر ثانی اپیل میرٹ پر خارج کر دی۔

ساہیوال میں گونگی و بہری لڑکی سے مبینہ طور پر زیادتی کا واقعہ پیش آیا ہے جس میں پولیس تاحال ملزم کو گرفتار نہیں کرسکی
سنگ میل نیوز کے مطابق معذور لڑکی سے زیادتی کا واقعہ ساہیوال کے نواحی گاؤں 34 چودہ ایل میں پیش آیا ہے جس میں متاثرہ لڑکی گھر سے قریب دکان پر سودا خریدنے گئی تھی۔
پولیس کے مطابق لڑکی کی والدہ کی مدعیت میں متعلقہ تھانے میں ملزم کے خلاف مقدمہ درج کرایا گیا ہے جس میں والدہ نے درج کرایا ہے کہ اسلم نامی شخص نے خالی احاطہ میں لے جا کر بچی کے ساتھ زیادتی کی، لڑکی کے شور مچانے اور واویلا کرنے پر ملزم موقع سے فرار ہو گیا
آخری اطلاعات تک پولیس تھانہ شاہکوٹ ملزم کو تاحال گرفتار نہیں کرسکی