Blog

وزیراعلیٰ نے ہولڈنگ سنٹر کا جائزہ لیا، سہولیات مزید بہتر بنانے کی ہدایت
پشاور:وزیراعلیٰ خیبر پختونخوا سہیل آفریدی نے کہا ہے کہ پاکستان نے دہائیوں تک افغان بہن بھائیوں کی میزبانی کی ہے ، افغان باشندوں کی واپسی باعزت، آسان اور منظم بنانے کیلئے اقدامات جاری ہیں۔ ان خیالات کا اظہار انہوں نے ضلع خیبر کی تحصیل لنڈی کوتل میں افغان مہاجرین کے ہولڈنگ سنٹر کے دورہ کے موقع پر کیا۔ انہوں نے ہولڈنگ سنٹر میں انتظامات کا جائزہ لیا اور سہولیات مزید بہتر بنانے کی ہدایت کی۔ وزیراعلیٰ نے کہا کہ پاکستان سے واپس جانے والے افغان باشندے ہمارے بہن بھائی ہیں، دیگر صوبوں سے بھی افغان باشندے طورخم کے راستے رضاکارانہ وطن واپسی کر رہے ہیں۔ انہوں نے کہا کہ موجودہ ہولڈنگ سنٹر میں نادرا کے 22 رجسٹریشن کاؤنٹرز ہیں، رجسٹریشن کاؤنٹرز کی تعداد بڑھانے کیلئے نادرا حکام سے بات کی جائے گی۔ وزیراعلیٰ نے کہا کہ پاکستان نے دہائیوں تک افغان بہن بھائیوں کی میزبانی کی ہے ، مذہبی عقائد، ثقافت اور روایات افغان بھائیوں کے ساتھ مشترک ہیں۔ انہوں نے کہا افغان باشندوں کو واپسی کے عمل میں ہر ممکن سہولت اور معاونت فراہم کی جا رہی ہے ۔

نظامِ انصاف تعفن زدہ لاش بن چکا ،امیر انصاف خرید لیتا ، غریب ساری زندگی عدالتوں کے دھکے کھاتا رہتا سرمایہ داروں اور جاگیرداروں کو کوئی پوچھنے والا نہیں،وکلا آئین کی بحالی کیلئے اٹھیں :تقریب سے خطاب
لاہور : امیر جماعت اسلامی حافظ نعیم الرحمن نے کہا ہے کہ ہمارا نظامِ انصاف ایک تعفن زدہ لاش بن چکا ہے ، ملک آئین و قانون کی بالادستی کے بغیر آگے نہیں بڑھ سکتا۔ مرضی کی ترامیم کے ذریعے آئین کا حلیہ بگاڑ دیا گیا ہے اور عدلیہ ہی نہیں بلکہ انصاف کے پورے نظام کو تباہ کر دیا گیا ہے ۔ امیر انصاف خرید لیتا ہے جبکہ غریب انصاف کے لیے ساری زندگی عدالتوں کے دھکے کھاتا رہتا ہے ۔منصورہ میں لاہور ہائیکورٹ بار ایسوسی ایشن، لاہور بار، پاکستان ٹیکس بار ایسوسی ایشن اور پاکستان انٹرنیشنل بزنس فورم کے عہدیداروں کے اعزاز میں دیئے گئے استقبالیہ سے خطاب کرتے ہوئے انہوں نے کہا کہ وکلا برادری آئین کی بحالی کے مشن کیلئے اٹھ کھڑی ہو۔ عدلیہ کی آزادی اور آئین کی بحالی جماعت اسلامی کی بدل دو نظام تحریک کا بنیادی نکتہ ہے ۔ آئین کے ساتھ کھلواڑ کرنے والے اعلیٰ عہدوں پر فائز ہو جاتے ہیں جبکہ اقتدار پر مافیاز کا قبضہ ہے اور احتساب کا کوئی مو ثر نظام موجود نہیں۔ ٹیکس کا بوجھ غریب، کسان اور تنخواہ دار طبقے پر ڈالا جا رہا ہے جبکہ سرمایہ داروں اور جاگیرداروں کو کوئی پوچھنے والا نہیں۔ ایف بی آر کے 25 ہزار سے زائد ملازمین دفاتر میں غیر فعال بیٹھے رہتے ہیں، جبکہ موٹر سائیکل سوار مزدوروں اور طلبہ سے روزانہ پٹرول لیوی کی مد میں کروڑوں روپے وصول کیے جا رہے ہیں۔ انہوں نے مزید کہا کہ عوام ان کی بدل دو نظام تحریک میں جوق در جوق شامل ہو رہے ہیں اور وکلا آئین کے تحفظ اور قانون کی بالادستی کے لیے جماعت اسلامی کی تحریک کا ساتھ دیں۔

پاکستان نے حال ہی میں جو کردار ادا کیا ہم برسوں سے اس کے متقاضی تھے ، آج ہماری جدوجہد رنگ لے آئی چوری شدہ حکومت کو نہیں مانتا جو کرسکتے ہو کرلو ، فیصلے اب ایوان نہیں میدان میں ہونگے ، کانفرنس سے خطاب
مردان:سربراہ جمعیت علمائے اسلام (ف)مولانا فضل الرحمان نے کہا کہ اسرائیل کا ظلم اسلامی ممالک کیلئے خطرے کی گھنٹی ہے ۔ مسلمان فاتح ہیں اور فاتح رہیں گے ، بیت المقدس ایک دن مسلمانوں کا ہوگا اور وہاں عبادت کریں گے ۔ پاکستان نے حال ہی میں جو کردار ادا کیا ہم برسوں سے اس کے متقاضی تھے ، آج ہماری جدوجہد رنگ لے آئی ،چوری شدہ حکومت کو نہیں مانتا جو کرسکتے ہو کرلو ، فیصلے اب ایوان نہیں میدان میں ہونگے ،بلوچستان اور کراچی میں جلسے کرنے کا اعلان کر تے ہوئے انہوں نے کہا کہ جس طرح جعلی نوٹ نہیں چل سکتا اس طرح جعلی حکومت بھی نہیں چل سکتی۔مردان میں دستور اسلام کانفرنس سے خطاب کرتے ہوئے مولانا فضل الرحمان نے کہا کہ پاکستان 25کروڑ مسلمانوں کا وطن ہے اس کی عالمی سطح پر اہمیت ہے ، ملک کو پوری اسلامی دنیا کی قیادت کرتے دیکھنا چاہتا ہوں، ہم ملکی سرزمین پر مہمانوں کی عزت کرنا جانتے ہیں۔سربراہ جے یوآئی نے کہاکہ عالمی طاقتوں کے جبر سے غریبوں پر کیا جانے والا مہنگائی کا ظلم واپس لینا ہوگا، قوم کے اندر خود اعتمادی اور ملک کی قدر و منزلت میں اضافہ دیکھنا چاہتا ہوں۔انہوں نے کہا کہ اسرائیل ناجائزہ ریاست ہے اس کا خاتمہ امت مسلمہ کی آرزو ہے ، یہ دہانیوں سے فلسطین پر ظلم ڈھا رہا ہے ، یہ ظلم کرتے کرتے ایران تک پہنچ چکا ہے ۔ پاکستان نے ثابت کردیا ہے کہ وہ دنیا کے معاملات کو سلجھانے کی صلاحیت رکھتا ہے ، آج عالمی ممالک ہماری سرزمین پر بیٹھ کر دنیا کے لیے امن چاہتے ہیں۔ ہم اسرائیل کو تسلیم کرنے کے حق میں بالکل نہیں ۔ پاکستان کے عوام اور امت مسلمہ مودی اور یہودی کے گٹھ جوڑ کو کامیاب نہیں ہونے دیں گے ۔ نواز شریف اور زرداری سر جھکا سکتے ہیں، جے یو آئی سر نہیں جھکا سکتی، حکومت دھاندلی سے لی گئی ہے ، ایسی حکومت مانتا ہوں نہ اس کی پیروی کروں گا، جس طرح جعلی نوٹ نہیں چلتا اس طرح جعلی حکومت بھی نہیں چلتی، بے قیمت لوگ ہم پر مسلط کردئیے گئے ہیں۔ انہوں نے کہا کہ دنیا اور اپنی اسٹیبلشمنٹ کو بتانا چاہتا ہوں ،یہ غیور پاکستانیوں کا اجتماع ہے ۔ اگر پاکستان پر کوئی نازک وقت آیا تو یہ نوجوان سرحد پر سکیورٹی فورسز سے آگے ہوں گے ۔ اسرائیل کا خاتمہ امت مسلمہ کی آرزو ہے ۔

راولپنڈی: بانی پی ٹی آئی سے منگل کو وکلا اور فیملی سے ملاقات کا دن ہے۔وکیل اویس یونس چودھری ایڈووکیٹ نے فہرست اڈیالہ جیل کے گیٹ پر جمع کرا دی فہرست میں بیرسٹر گوہر اور انتظار پنجوتھہ کا نام شامل ہے۔اِسی طرح نیاز اللہ نیازی، سہیل گردیزی ،سید واسط علی شاہ، غلام مصطفیٰ بلوچ ایڈووکیٹس بھی ملاقات کرنے والوں میں شامل ہیں۔دوسری جانب بانی پی ٹی آئی کی فیملی کے ارکان بھی اڈیالہ جیل آئیں گے جن کی ملاقات کی توقع کی جارہی ہے۔