مہنگائی کی وجہ سے اسکولوں میں بچوں کا ڈراپ آؤٹ بڑھ گیا

لاہور: ملک میں جاری معاشی بحران اور مہنگائی کی وجہ لوگوں کیلیے اپنے بچوں کو تعلیم دلوانا مشکل ہوگیا جب کہ سرکاری اورنجی اسکولوں میں ڈراپ آؤٹ کی شرح بہت بڑھ گئی ہے۔

نجی اسکولوں کی جانب سے فیسوں میں اضافہ کے بعد والدین کی جانب سے بچوں کو سرکاری اسکولوں میں داخل کروایا جارہاہے، محکمہ تعلیم پنجاب کے ذرائع کے مطابق صوبہ میں تعلیمی اداروں میں طلبہ کے ڈراپ آؤٹ کی شرح بہت زیادہ ہے۔

مجموعی طورپر پہلی سے بارہویں جماعت تک کے طلبہ میں ڈراپ آؤٹ کی شرح 60فیصد ہے جس میں پہلی سے پانچویں تک یہ شرح 28سے 30فیصد، پانچویں سے دسویں تک 40سے50فیصد جبکہ گیارہویں اور بارہویں تک شرح 60فیصد ہوجاتی ہے۔