9 مئی کے واقعات میں ملوث کسی مجرم کو نہیں چھوڑیں گے، وزیر اعظم

اسلام آباد: وزیراعظم شہباز شریف نے کہا ہے کہ 9 مئی کو پاکستان کی تاریخ کے سیاہ ترین واقعات ہوئے جن سے ہمارے سر شرم سے جھک گئے، ایسے واقعات میں ملوث افراد کو کسی صورت نہیں چھوڑیں گے اور انہیں کیفر کردار تک پہنچائیں گے۔

قومی سلامتی کے اجلاس میں شرکا سے خطاب کرتے ہوئے وزیر اعظم نے کہا کہ ان افسوسناک واقعات نے کروڑوں پاکستانیوں کو افسردہ کیا جبکہ تمام طبقات نے انتہائی غم و غصے کی صورت حال میں وقت کو گزارا، نو مئی کا دن پاکستان کی تاریخ کا سیاہ ترین دن ہے۔

شہباز شریف نے کہا کہ جن کی املاک اور تنصیبات کو نشانہ بنایا گیا وہ ملکی سرحدوں کو محفوظ بنانے کے لیے دیوانہ وار شہادت کے جام نوش کرتے ہیں، دھرتی کے شہیدوں اور غازیوں کی 9 مئی کو بے حرمتی کی گئی اور وطن سے والہانہ محبت کو نذر آتش کرنے کی کوشش کی گئی اور جی ایچ کیو، حساس تنصیبات کو نشانہ بنایا گیا، ایسے دلخراش مناظر کبھی کسی پاکستانی نے نہیں دیکھے، جس نے جرم کیا اُس کے بچنے کا سوال ہی پیدا نہیں ہوتا، اگر وزیراعظم بھی انہیں معاف کرنے کا بولے تو کسی قسم کی رعایت نہ کی جائے۔