ٹرینوں میں مسافروں کو نشہ آور چیزیں کھلا کر لوٹنے والا ملزم گرفتار

لاہور: ٹرینوں میں مسافروں کو نشہ آور چیزیں کھلا کر لوٹنے والا ملزم گرفتار کر لیا گیا۔

ٹرینوں میں مسافروں کو نشہ آور چیزیں کھلاکر لوٹنے والے ملزم عقیل بلال کو تھانہ ریلویز پولیس بہاول پور کے مقدمے میں گرفتار کیا گیا۔

ملزم عقیل بلال 19 اپریل کوعلامہ اقبال ایکسپریس میں 2 مسافروں کو نشہ آور چیز کھلا کر ان کے موبائل اور نقدی لے کر فرار ہوگیا تھا،ملزم کو جدید ٹیکنالوجی کی مدد سے گرفتار کیا گیا۔
پولیس نے ملزم کا جسمانی ریمانڈ حاصل کرنے کے بعد اس سے 2 عدد موبائل فون برآمد کر لیے گئے۔

ریلوے پولیس حکام کا کہنا ہے کہ ریلوے مسافروں کی جان و مال کی حفاظت کرتی رہے گی اور جرائم پیشہ افراد کے خلاف ریلوے پولیس کی کارروائیاں جاری رہیں گی۔