تحریک انصاف کے ٹاؤن چیئرمین کا ساتھیوں کے ہمراہ بلدیہ عظمیٰ کی ٹیم پر تشدد

کراچی: شاہ فیصل کالونی میں غیرقانونی بچت بازار کو ختم کرانے کے لیے گئی بلدیہ عظمیٰ کراچی کی ٹیم پر تحریک انصاف کے ٹاؤن چیئرمین کا ساتھیوں کے ساتھ حملہ، اہلکاروں کو تشدد کا نشانہ بنایا، ٹیم نے مقدمہ درج کرادیا۔

تفصیلات کے مطابق شاہ فیصل کالونی میں غیرقانونی بچت بازار کو ختم کرانے کے لیےبلدیہ عظمیٰ کی ای اینڈ آئی پی کی ٹیم پہنچی تو تحریک انصاف سے تعلق رکھنے والے شاہ فیصل کالونی کے ٹاؤن چیئرمین گوہر خٹک نے اپنے ساتھیوں کے ہمراہ ٹیم پر حملہ کردیا۔ اور اہل کاروں کو تشدد کا نشانہ بنایا۔

اس کا مقدمہ عوامی تھانے میں اسسٹنٹ ڈائریکٹر کی مدعیت میں درج کرادیا گیا۔ ایف آئی آر کے متن کے مطابق غیرقانونی اتوار بازار ختم کرانے کے لیے جانے والی ٹیم میں شامل سٹی وارڈن اور اینٹی انکروچمنٹ آفیسرز وعملے کوچیئرمین شاہ فیصل ٹاون گوہر خٹک نے ساتھیوں کے ہمراہ تشدد کا نشانہ بنایا اور پھر سفید رنگ کی ویگو میں اغوا کرکے لے گئے۔
بعدازاں انہوں نے مغوی ٹیم کو بلال چورنگی کے قریب واقع پیٹرول پمپ پر خطرناک نتائج کی دھمکیاں دے کر چھوڑ دیا۔

اسسٹنٹ ڈائریکٹر اور کے ایم سی کے عملے نے تمام صورتحال سے میئر کراچی مرتضی وہاب کو بھی آگاہ کردیا۔ واضح رہے کہ گوہر خٹک تحریک انصاف کے اہم رہنما ہیں جو بلدیاتی الیکشن میں شاہ فیصل کالونی سے منتخب ہوئے تھے۔