الیکشن کمیشن کا سانگھڑ میں پی پی امیدوار کی دھمکی آمیز تقریر کا نوٹس

کراچی: الیکشن کمیشن نے سانگھڑ میں پی پی امیدوار کی ووٹرز کو سرعام دھمکیوں کا نوٹس لے لیا۔

پی ایس 41 سانگھڑ سے پیپلز پارٹی کے امیدوار علی حسن ہنگورو نے کارنر میٹنگ سے خطاب میں کارکنوں اور ووٹرز کو کہا تھا کہ جیالے اور کارکن سیدھے ہوجائیں اور مجھے کامیاب کرائیں، ورنہ آٹھ فروری کے بعد 9 فروری بھی آئے گا اور اُن سے جو حساب لیا جائے گا وہ پورا سانگھڑ دیکھے گا۔

سوشل میڈیا پر وائرل ویڈیو میں دھمکی آمیز پیغام پر جوائنٹ الیکشن کمشنر سندھ اصغر سیال نے ضلعی مانیٹرنگ ٹیم کو کارروائی کی ہدایت کی تھی جس پر سانگھڑ کے ڈسٹرکٹ مانیٹرنگ افسر اختر علی نے علی حسن ہنگورو کو نوٹس جاری کرتے ہوئے منگل کو وضاحت کیلئے طلب کرلیا ہے۔
نوٹس میں کہا گیا ہے کہ اس قسم کی دھمکی آمیز تقریر سے امن و امان کی صورتحال پیدا ہوسکتی ہے اور یہ الیکشن کمیشن کے پیرا نمبر 10 اور 42 کے جاری کردہ ضابطہ اخلاق کی خلاف ورزی ہے۔

الیکشن کمیشن نے پی پی امیدوار کو ہدایت کی ہے کہ وہ اپنی تقریر کی وضاحت کریں بصورت دیگر انکے خلاف الیکشن ایکٹ 2017 کے سیکشن 234 کے تحت کارروائی کی جاسکتی ہے۔