نشتر اسپتال ملتان کے ڈائیلسز یونٹ میں مریضوں میں ایڈز کی منتقلی کے معاملے پر معطل ہونے والی وائس چانسلر ڈاکٹر مہناز خاکوانی کی حمایت میں اسپتال کے 31 فیکلٹی ممبران نے اجتماعی استعفیٰ دے دیا ہے۔ فیکلٹی ممبران نے استعفے سیکرٹری ہیلتھ پنجاب کو بھیج دیے ہیں اور کہا ہے کہ وائس چانسلر اور فیکلٹی ممبران کے ساتھ نامناسب رویہ اختیار کیا گیا ہے۔
نشتر اسپتال میں ایک ماہ قبل ڈائیلسز کے دوران ایڈز کی منتقلی کا واقعہ پیش آیا تھا جس کے بعد وزیر اعلیٰ پنجاب مریم نواز کے نوٹس پر نشتر اسپتال کی وائس چانسلر ڈاکٹر مہناز خاکوانی سمیت 5 ڈاکٹرز کو معطل کیا گیا تھا۔
فیکلٹی ممبران کا کہنا ہے کہ اس معاملے پر معطل کی گئی وائس چانسلر اور دیگر ڈاکٹرز کے ساتھ انصاف نہیں کیا گیا اور ان کے ساتھ غیر مناسب سلوک روا رکھا گیا ہے۔
واضح رہے کہ گورنر پنجاب نے وائس چانسلر نشتر اسپتال کو ذاتی حیثیت میں طلب کر رکھا ہے تاکہ اس معاملے پر مزید تحقیقات کی جا سکیں۔
Leave a Reply