عرفان صدیقی کا پی ٹی آئی سے مذاکرات کے حوالے سے بیان: “راستے کھولنے کی سوچ اچھی بات ہے”

اسلام آباد: مسلم لیگ ن کے رہنما اور پی ٹی آئی سے مذاکرات کرنے والی کمیٹی کے ترجمان سینیٹر عرفان صدیقی نے کہا ہے کہ اگر تحریک انصاف میں راستے بند کرنے کے بجائے راستے کھولنے کی سوچ پیدا ہو رہی ہے تو یہ ایک خوش آئند بات ہے۔ انہوں نے جیو نیوز کے پروگرام “آج شاہ زیب خانزادہ کے ساتھ” میں گفتگو کرتے ہوئے کہا کہ پی ٹی آئی کے مطالبات بڑے ہیں، اور ان پر فوری ردعمل دینا ممکن نہیں، تاہم جہاں کہیں گنجائش نکلے گی، اس پر ضرور غور کیا جائے گا۔

سینیٹر عرفان صدیقی نے کہا کہ پی ٹی آئی کو ہماری حدود کا علم ہے اور انہیں یہ پتا ہے کہ حکومت قیدیوں کو کتنی رعایت دے سکتی ہے۔ ان کا کہنا تھا کہ اگر تحریک انصاف میں اسٹیبلشمنٹ کے حوالے سے نرم گوشہ پیدا ہو رہا ہے تو یہ ایک بہت اچھی پیشرفت ہے۔

یاد رہے کہ حکومت اور پاکستان تحریک انصاف کے درمیان گزشتہ ماہ مذاکرات کا باقاعدہ آغاز ہوا تھا اور مذاکرات کا دوسرا دور آج ہو گا، جس میں پی ٹی آئی اپنے مطالبات حکومت کے سامنے رکھے گی۔