“مولانا فضل الرحمان کی وزیراعظم سے مدارس کی رجسٹریشن کے لیے قانون سازی کی درخواست”

جمعیت علما اسلام (جے یو آئی) کے سربراہ مولانا فضل الرحمان نے وزیراعظم شہباز شریف سے ٹیلی فون پر رابطہ کیا اور مدارس کی رجسٹریشن کے حوالے سے صوبوں میں قانون سازی کے لیے ان سے کردار ادا کرنے کی درخواست کی۔

ذرائع کے مطابق، وزیراعظم شہباز شریف نے اس درخواست پر جواب دیتے ہوئے مولانا فضل الرحمان کو یقین دہانی کرائی کہ وہ مدارس کی رجسٹریشن کے لیے صوبوں میں قانون سازی کے حوالے سے وزرائے اعلیٰ سے رابطہ کریں گے۔

یہ پیشرفت اس وقت ہوئی جب چند روز قبل صدر پاکستان آصف علی زرداری نے مدارس کی رجسٹریشن کے لیے سوسائٹی ایکٹ رجسٹریشن بل پر دستخط کیے تھے، جس کے بعد قومی اسمبلی سیکرٹریٹ نے اس بل کا گزٹ نوٹیفکیشن جاری کیا تھا۔ اس نئے قانون کے مطابق مدارس کو سوسائٹیز رجسٹریشن یا وزارت تعلیم کے تحت خود کو رجسٹر کرانے کا اختیار حاصل ہوگا۔

قومی اسمبلی کے ترجمان کے مطابق، سوسائٹیز رجسٹریشن ترمیمی ایکٹ بل 20 اکتوبر کو سینیٹ اور 21 اکتوبر کو قومی اسمبلی سے منظور ہوا تھا اور مدارس کی رجسٹریشن کا معاملہ باہمی افہام و تفہیم سے حل کیا گیا ہے۔