شیخ وقاص اکرم کا کہنا ہے کہ 6 جنوری کو سزا سنائی جائے تو بھی مذاکرات جاری رہیں گے

پاکستان تحریک انصاف (پی ٹی آئی) کے مرکزی سیکرٹری اطلاعات شیخ وقاص اکرم نے پشاور میں پریس کانفرنس کے دوران واضح کیا کہ 6 جنوری کو اگر عمران خان کو سزا سنا دی جائے تو بھی مذاکرات کا عمل جاری رہے گا۔ انہوں نے کہا کہ پی ٹی آئی نہ تو ڈھیل کی درخواست کر رہی ہے اور نہ ہی مذاکرات کو عدالتی فیصلے سے جوڑا گیا ہے۔ ان کا کہنا تھا کہ مذاکرات کی کامیابی یا ناکامی کا دارو مدار حکومتی مذاکراتی کمیٹی کی سنجیدگی اور بات چیت میں پیشرفت پر ہے۔

شیخ وقاص اکرم نے مزید کہا کہ تحریک انصاف کی سول نافرمانی کی تحریک پاکستان کے خلاف نہیں، بلکہ موجودہ حکومت کے خلاف ہے جو فارم 47 سے آئی ہے۔

دوسری جانب پی ٹی آئی کے سینئر رہنما شاہ محمود قریشی نے لاہور کی عدالت میں پیشی کے موقع پر گفتگو کرتے ہوئے کہا کہ مذاکرات کا مقصد پاکستان کے مفاد میں ہونا چاہیے، اور اگر یہ مثبت نتیجے کی طرف نہیں بڑھتے تو حکومت کے لیے مشکلات پیدا ہو سکتی ہیں۔ قریشی کا کہنا تھا کہ مذاکرات کی ضرورت تحریک انصاف کو نہیں بلکہ پاکستان کو ہے۔