بلوچستان کے ضلع موسیٰ خیل میں جنگل میں آگ لگ گئی

بلوچستان کے ضلع موسیٰ خیل کی تحصیل کنگری کے علاقے احمد زئی سوئی کے جنگلات میں رات گئے اچانک آگ بھڑک اٹھی جس نے سیکڑوں ایکڑ اراضی کو اپنی لپیٹ میں لے لیا۔ آگ نے زیتون، پلوس اور دیگر نایاب درختوں کے ساتھ ساتھ خشک گھاس کو بھی جلا ڈالا۔

لیویز حکام کے مطابق آگ کی اطلاع ملتے ہی ڈپٹی کمشنر موسیٰ خیل، جمعداد مندوخیل نے فوری طور پر لیویز کی ٹیم کو جنگلات کی طرف روانہ کر دیا۔ حکام کے مطابق لیویز اور مقامی لوگ اس وقت آگ بجھانے کی کوششوں میں مصروف ہیں۔

یہ واقعہ بلوچستان کے قدرتی وسائل کے لیے ایک سنگین خطرہ بن گیا ہے، اور اس پر قابو پانے کے لیے انتظامیہ اور مقامی افراد کی جانب سے بھرپور کوششیں جاری ہیں۔