کراچی میں سردی کی لہر 9 جنوری تک جاری رہنے کی پیشگوئی

محکمہ موسمیات نے کراچی میں جاری سردی کی لہر کے حوالے سے پیشگوئی کی ہے کہ یہ لہر 9 جنوری تک جاری رہ سکتی ہے۔ محکمہ موسمیات کے مطابق، آج کراچی کا کم سے کم درجہ حرارت 8 ڈگری سینٹی گریڈ ریکارڈ کیا گیا ہے، جبکہ آئندہ چند دنوں میں درجہ حرارت مزید کم ہو کر 7 ڈگری سینٹی گریڈ تک پہنچنے کا امکان ہے۔

محکمہ موسمیات نے بتایا کہ ہوا میں نمی کا تناسب 27 فیصد ہے اور شمال مشرق سے 5 کلومیٹر فی گھنٹہ کی رفتار سے ہوائیں چل رہی ہیں۔ جناح ٹرمینل اور اس کے اطراف کے علاقوں میں درجہ حرارت معمول سے کم ریکارڈ کیا گیا۔ جناح ٹرمینل پر جنوری کے اوسط درجہ حرارت 12 ڈگری سینٹی گریڈ کے بجائے رات کا کم سے کم درجہ حرارت 6.2 ڈگری سینٹی گریڈ ریکارڈ کیا گیا۔

کراچی کے مختلف علاقوں میں بھی سردی کی شدت میں اضافہ ہوا ہے۔ شاہراہ فیصل پر 11.5، ماڑی پور میں 10 اور بن قاسم میں 11 ڈگری سینٹی گریڈ ریکارڈ کیا گیا۔

چیف میٹرولوجسٹ سردار سرفراز نے جیو نیوز سے گفتگو کرتے ہوئے کہا کہ کراچی میں دسمبر اور جنوری میں گزشتہ سال کے مقابلے میں زیادہ سردی محسوس کی جا رہی ہے، اور سردی کی یہ لہر اگلے دو سے تین روز تک برقرار رہنے کا امکان ہے۔