لاہور ائیرپورٹ پر دھند میں کمی کے بعد فلائٹس کی آمد شروع، موٹرویز بھی بند

لاہور علامہ اقبال ائیرپورٹ پر شدید دھند میں کمی کے بعد فلائٹس کی آمد کا سلسلہ دوبارہ شروع ہوگیا ہے۔ ایوی ایشن ذرائع کے مطابق مسقط سے لاہور کی پرواز ایک گھنٹہ تاخیر سے لاہور لینڈ کر گئی۔ استنبول سے لاہور کی پرواز کی آمد میں پونے 3 گھنٹے جبکہ شارجہ سے لاہور کی پرواز کی آمد میں بھی نصف گھنٹے کی تاخیر ہوئی۔

اس سے قبل، شدید دھند کی وجہ سے 3 غیر ملکی پروازوں کو اسلام آباد منتقل کر دیا گیا تھا، جن میں ابوظبی اور دوحہ سے لاہور کی پروازیں شامل تھیں۔

دوسری جانب، سیالکوٹ اور ملتان ائیرپورٹ پر بھی دھند کی وجہ سے لینڈنگ متاثر ہوئی ہے، تاہم اسلام آباد اور فیصل آباد ائیرپورٹس کا موسم کلیئر ہے۔ پشاور ائیرپورٹ پر بادل ہیں لیکن لینڈنگ اپروچ نارمل ہے۔ لاہور کیلئے اسلام آباد سے اتاری گئی پروازوں کی روانگی بھی شروع ہوگئی ہے، کیونکہ حد نظر بہتر ہونے کے بعد فضائی صورتحال میں بہتری آئی ہے۔

شدید دھند کی وجہ سے موٹروے ایم 2، اسلام آباد سے لاہور تک ٹریفک کے لیے بند کر دی گئی ہے، جبکہ ایم 3 لاہور سے جڑانوالہ تک اور ایم 4 پنڈی بھٹیاں سے ٹھوکر نیاز تک بھی بند ہیں۔