پی آئی اےکی برطانیہ کیلئے پروازیں دو سے تین ماہ میں بحال ہونے کا امکان: اسحاق ڈار

اسلام آباد: ڈپٹی وزیراعظم اور وزیر خارجہ محمد اسحاق ڈار نے (آج)منگل کے روز سینیٹ کو آگاہ کیا کہ پاکستان انٹرنیشنل ایئرلائن (پی آئی اے) کی برطانیہ کے لیے پروازیں آئندہ دو سے تین ماہ میں بحال ہونے کا امکان ہے۔شیری رحمان کی جانب سے پی آئی اے کے غیر واضح نجکاری منصوبے اور طیاروں کی گراونڈنگ کے حوالے سے اٹھائے گئے توجہ دلاؤ نوٹس کے جواب میں وزیر نے کہا کہ برطانیہ کے لیے پی آئی اے کی پروازوں کی بحالی کے لیے ہر ممکن کوشش کی جا رہی ہے۔ انہوں نے بتایا کہ برطانیہ کی ایوی ایشن ٹیم جنوری کے آخر میں پاکستان کا دورہ کرے گی اور اس سلسلے میں طیاروں کا معائنہ کرے گی۔اسحاق ڈار نے انکشاف کیا کہ قومی ایئرلائن کے خسارے 650 ارب روپے سے تجاوز کر چکے ہیں۔ انہوں نے مزید کہا کہ پی آئی اے کی نجکاری کا عمل شفاف تھا اور تمام کارروائی کو براہ راست نشر کیا گیا۔ انہوں نے وضاحت کی کہ حکومت نے قانون کے مطابق بولی کو مسترد کر دیا کیونکہ وہ مقررہ قیمت سے کم تھی۔انہوں نے کہا کہ پی آئی اے کی نجکاری کا عمل جاری رہے گا اور اس پر مناسب کام کیا جا رہا ہے۔اسحاق ڈار نے بتایا کہ پی آئی اے کے بیڑے میں کل 22 فعال طیارے ہیں جن میں 6 بوئنگ، 11 ایئربس اور باقی اے ٹی آر شامل ہیں۔ مزید یہ کہ 11 طیارے، جن میں 6 بوئنگ اور 5 ایئربس شامل ہیں، مرمت کے عمل سے گزر رہے ہیں۔