پاکستان کے ساتھ اتحاد کا کوئی معاہدہ نہیں ہے: وائٹ ہاؤس

واشنگٹن: امریکہ نے کہا ہے کہ پاکستان کبھی بھی امریکہ کا تکنیکی اتحادی نہیں رہا اور اسلام آباد کے ساتھ کوئی فوجی یا دفاعی معاہدہ نہیں ہے۔وائٹ ہاؤس کے قومی سلامتی کے مشیر جان کربی کا یہ بیان ایک صحافی کے سوال کے جواب میں آیا جس میں انہوں نے بائیڈن انتظامیہ سے پوچھا تھا کہ آیا وہ افغانستان میں بڑھتی ہوئی بدامنی، القاعدہ، داعش، طالبان، ٹی ٹی پی اور دیگر دہشت گرد گروپوں کی دوبارہ تنظیم نو کے بارے میں عالمی برادری سے پاکستان کی اپیل پر کوئی اقدام کر رہی ہے۔جان کربی نے کہا کہ “جیسا کہ آپ جانتے ہیں، پاکستان کبھی بھی امریکہ کا تکنیکی اتحادی نہیں رہا، اور پاکستان کے ساتھ کوئی معاہدہ نہیں تھا۔”انہوں نے کہا کہ گزشتہ دہائیوں میں، امریکہ اور پاکستان نے دہشت گردی کے خطرات سے نمٹنے کے لیے ایک مفید شراکت داری کی، جو اب بھی افغانستان اور پاکستان کے درمیان موجود ہے۔جان کربی نے مزید کہا کہ امریکہ تسلیم کرتا ہے کہ پاکستان کے عوام ابھی بھی دہشت گردی کا سامنا کر رہے ہیں، جو سرحد کے دوسری طرف سے آ رہی ہے۔وائٹ ہاؤس کے عہدیدار نے کہا کہ امریکہ پاکستان کے ساتھ مشترکہ خطرات اور چیلنجز سے نمٹنے کے لیے اپنے عزم پر قائم ہے اور یہ عزم کبھی تبدیل نہیں ہوگا۔ امریکہ نے طالبان پر زور دیا ہے کہ وہ اس بات کو یقینی بنائیں کہ افغانستان کی سرزمین سے دہشت گرد حملے نہ کیے جائیں۔