سندھ اسمبلی کی تاریخی اہمیت: محترمہ فریال تالپور کا خطاب

کراچی: پاکستان پیپلز پارٹی شعبہ خواتین کی مرکزی صدر اور رکن سندھ اسمبلی محترمہ فریال تالپور نے سندھ اسمبلی کی تاریخی اہمیت کو اجاگر کرتے ہوئے کہا ہے کہ یہ عمارت قوم کے نظریات، امنگوں اور ملک کے بانی اجداد کی انتھک جدوجہد کی علامت ہے۔انہوں نے کہا کہ پاکستان کی پہلی دستور ساز اسمبلی کے اجلاس اسی تاریخی عمارت میں منعقد ہوئے، جو استقامت، اتحاد، اور اپنی الگ شناخت قائم کرنے کے عزم کی یادگار ہے۔ سندھ اسمبلی بلڈنگ کے احاطے میں منعقد ایک خصوصی تقریب میں خطاب کرتے ہوئے محترمہ فریال تالپور نے کہا، “یہ میرے لیے ایک اعزاز ہے کہ آج ہم اس تاریخی عمارت میں کھڑے ہیں، جہاں پاکستان کی پہلی دستور ساز اسمبلی کے اجلاس منعقد ہوتے تھے۔”انہوں نے قائد عوام شہید ذوالفقار علی بھٹو کو خراج تحسین پیش کرتے ہوئے کہا کہ انہوں نے پاکستان کو ایک حقیقی اسلامی جمہوریہ کے طور پر دنیا کے سامنے پیش کیا، جہاں اقلیتوں کے حقوق کا تحفظ کیا گیا، خواتین اور بچوں کے استحصال کا خاتمہ ہوا، اور انصاف کو یقینی بنایا گیا۔محترمہ فریال تالپور نے شہید محترمہ بینظیر بھٹو کی قربانیوں کو بھی یاد کرتے ہوئے کہا کہ انہوں نے اپنے والد کے وژن کو زندہ رکھا اور جمہوری اور خودمختار پاکستان کے تصور پر کبھی سمجھوتہ نہیں کیا۔ انہوں نے کہا کہ شہید بینظیر بھٹو نے اپنی جان قربان کر دی لیکن عوام کے حقوق کی جنگ جاری رکھی۔محترمہ نے کہا کہ آج، چیئرمین بلاول بھٹو زرداری اور صدر مملکت آصف علی زرداری کی قیادت میں، پاکستان کو ایک آزاد، خودمختار، اور جمہوری ملک بنانے کے لیے جدوجہد جاری ہے۔ ان کا کہنا تھا، “ان شاء اللہ وہ دن دور نہیں جب ہر شہری کو اپنے بنیادی حقوق میسر ہوں گے۔”تقریب کے دوران محترمہ فریال تالپور نے نجی ٹی وی چینل ہم نیٹ ورک کو اس کی 20ویں سالگرہ پر مبارکباد پیش کی اور سلطانہ صدیقی کی قیادت کو سراہا۔ انہوں نے کہا، “ایک عورت ہونے کے ناطے، میں خاص طور پر متاثر ہوں کہ ہم نیٹ ورک کی قیادت سلطانہ آپا جیسی غیر معمولی خاتون کر رہی ہیں۔ ان کی محنت اور بصیرت نے میڈیا انڈسٹری میں نئے معیارات قائم کیے ہیں اور بے شمار خواتین کو رکاوٹوں کو توڑنے کی ترغیب دی ہے۔”انہوں نے شہید ذوالفقار علی بھٹو اور شہید محترمہ بینظیر بھٹو کی فنون اور ثقافت کے فروغ میں خدمات کو بھی اجاگر کیا۔ انہوں نے کہا کہ شہید ذوالفقار علی بھٹو نے اتحاد اور ہم آہنگی کے فروغ کے لیے فنون کی اہمیت کو تسلیم کیا، جبکہ محترمہ بینظیر بھٹو نے سینما اور ڈرامے کی بحالی کی حمایت کی، فنکاروں کو بااختیار بنایا، اور مقامی ٹیلنٹ کی حوصلہ افزائی کی۔انہوں نے مزید کہا کہ چیئرمین بلاول بھٹو زرداری اور صدر آصف علی زرداری کی قیادت میں پاکستان میں تخلیقی صلاحیتوں کو فروغ دینے اور جمہوریت کو مستحکم کرنے کی کوششیں جاری ہیں۔اپنے خطاب کے اختتام پر محترمہ فریال تالپور نے سلطانہ صدیقی، درید قریشی، اور ہم نیٹ ورک کی پوری ٹیم کو مبارکباد پیش کی۔ انہوں نے کہا، “آج جب آپ 20 سال کی کامیابی کا جشن منا رہے ہیں، میری دعا ہے کہ آپ مسلسل ترقی کریں اور دوسروں کے لیے مشعل راہ بنیں۔”