پشاور:نگران دور میں بھرتی سرکاری ملازمین کو فارغ کرنے کا فیصلہ

پشاور: خیبرپختونخوا حکومت نے نگران دور میں بھرتی کیے گئے سرکاری ملازمین کو فارغ کرنے کا فیصلہ کر لیا ہے۔ اس مقصد کے لیے “خیبرپختونخوا ملازمین سروسز 2025” کے نام سے ایک بل تیار کیا گیا ہے۔ بل کے متن کے مطابق نگران حکومت کے دوران غیر قانونی طور پر بھرتی کیے گئے ملازمین کو ہٹانے کا اقدام کیا جائے گا۔ یہ بل جلد اسمبلی میں پیش کیا جائے گا، اور بل پاس ہونے کے بعد متعلقہ ادارے نوٹیفکیشن جاری کریں گے، جس کے تحت غیر قانونی بھرتی شدہ ملازمین کو فارغ کیا جائے گا۔ بل میں کہا گیا ہے کہ اگر قانونی پیچیدگیاں سامنے آئیں تو ان کا جائزہ لینے کے لیے سیکرٹری اسٹیبلشمنٹ کی سربراہی میں 6 رکنی کمیٹی تشکیل دی جائے گی۔ کمیٹی میں ایڈووکیٹ جنرل، محکمہ قانون، خزانہ، انتظامیہ، اور دیگر متعلقہ اداروں کے سیکرٹری شامل ہوں گے۔ ذرائع کے مطابق نگران دور حکومت میں 15 ہزار سے زائد ملازمین بھرتی کیے گئے تھے۔ بل کے تحت کمیٹی کے فیصلے کا اطلاق تمام متعلقہ افراد پر ہوگا، اور غیر قانونی بھرتیوں کو ختم کرنے کے لیے سخت اقدامات کیے جائیں گے۔