پاکستان اور نیدر لینڈ کے درمیان دوطرفہ سیاسی مشاورت‘مختلف امورپر تبادلہ خیال

اسلام آباد: پاکستان اور نیدرلینڈز کے درمیان گیارہویں دور کی دو طرفہ سیاسی مشاورت (BPC) پیر کے روز اسلام آباد میں منعقد ہوئی، جس میں دونوں ممالک کے اہم رہنماؤں نے شرکت کی۔پاکستان کی جانب سے اس مشاورت کی قیادت سیکرٹری خارجہ آمنہ بلوچ نے کی، جبکہ نیدرلینڈز کی طرف سے وزارت خارجہ کے سیکرٹری جنرل کرسٹیا ن ریبیرگن نے اپنے ملک کی نمائندگی کی۔ دونوں رہنماؤں نے اپنے اپنے ممالک کے مفاد میں مختلف امور پر تبادلہ خیال کیا۔بیان کے مطابق، اس مشاورت میں دونوں فریقین نے دو طرفہ تعلقات کے تمام پہلوؤں پر بات چیت کی اور علاقائی و عالمی مسائل پر بھی اپنی رائے کا اظہار کیا۔ دونوں ممالک نے دو طرفہ تعاون میں مثبت پیش رفت پر اطمینان کا اظہار کیا اور اس بات پر اتفاق کیا کہ جاری تعلقات کو مزید فروغ دینے کے لیے مختلف شعبوں میں تعاون کو جاری رکھا جائے گا۔ان شعبوں میں سیاست، معیشت، تجارت اور سرمایہ کاری، موسمیاتی تبدیلی، زراعت، پانی کے انتظام، ڈیری اور لائیوسٹاک، تعلیم اور ثقافت شامل ہیں۔ سیکرٹری خارجہ امنہ بلوچ نے نیدرلینڈز کو پاکستان کا ایک اہم تجارتی شریک قرار دیتے ہوئے دو طرفہ تجارتی اور اقتصادی تعلقات میں مزید اضافہ کرنے کی اہمیت پر زور دیا۔ انہوں نے نیدرلینڈز کی جانب سے پاکستان میں مزید سرمایہ کاری کی حوصلہ افزائی کی۔موسمیاتی تبدیلی کے چیلنجز پر بھی تبادلہ خیال کیا گیا، اور دونوں ممالک نے اس بات پر اتفاق کیا کہ ان چیلنجز کا مقابلہ کرنے کے لیے مل کر کام کرنا ضروری ہے۔دونوں فریقین نے پاکستان اور نیدرلینڈز کے دو طرفہ تعلقات کو مزید مستحکم کرنے کے لیے قریبی رابطوں کو جاری رکھنے پر اتفاق کیا اور یہ عزم ظاہر کیا کہ دونوں ممالک کے تعلقات کو ایک نئے دور میں داخل کیا جائے گا۔