پاکستان اور چین کا تعاون نئی بلندیاں چھو رہا ہے: احسن اقبال

اسلام آباد: وزیر منصوبہ بندی و ترقی احسن اقبال نے کہا ہے کہ پاکستان اور چین ایک نئے باب کا آغاز کر رہے ہیں جو آنے والی نسلوں کے لیے فائدہ مند ثابت ہوگا۔اسلام آباد میں بدھ کو چینی اسپرنگ فیسٹیول کے حوالے سے ایک تقریب سے خطاب کرتے ہوئے انہوں نے کہا کہ رواں سال دو بڑے منصوبوں، قراقرم ہائی وے فیز ٹو اور ایم ایل ون، پر کام شروع ہوگا۔وزیر منصوبہ بندی نے کہا کہ سی پیک کے دوسرے مرحلے میں مینوفیکچرنگ، زراعت، انفارمیشن ٹیکنالوجی اور سیاحت سمیت مختلف شعبوں میں بے پناہ مواقع پیدا ہوں گے۔ انہوں نے کہا کہ خصوصی اقتصادی زونز کی ترقی اور زراعت کی جدیدیت معیشت کی تنوع، روزگار کے لاکھوں مواقع اور پاکستان کی عالمی مسابقت میں اضافہ کرے گی۔احسن اقبال نے بتایا کہ سی پیک کے دوسرے مرحلے میں کاروبار سے کاروبار تعاون پر توجہ دی گئی ہے تاکہ معیشت کی مزید صلاحیتوں کو اجاگر کیا جا سکے۔انہوں نے کہا کہ سی پیک پاکستان اور چین کی اٹوٹ دوستی کی علامت ہے اور یہ منصوبہ نہ صرف دونوں ممالک بلکہ خطے کے لیے پائیدار ترقی اور مشترکہ خوشحالی کا روڈ میپ پیش کرتا ہے۔وزیر منصوبہ بندی نے سی پیک کے وژن کی غیر متزلزل حمایت پر چینی قیادت کا شکریہ ادا کیا۔انہوں نے کہا کہ پاکستان میں مقیم چینی شہریوں کی سیکیورٹی کے لیے تمام ممکنہ اقدامات کیے جا رہے ہیں، جسے انہوں نے قومی فریضہ قرار دیا۔