بلوچستان اسمبلی میں اسلام آباد ایئرپورٹ کا نام شہید بے نظیر بھٹو انٹرنیشنل ایئرپورٹ رکھنے کی قرارداد منظور

کوئٹہ / اسلام آباد: بلوچستان اسمبلی نے اسلام آباد انٹرنیشنل ایئرپورٹ کا نام شہید بے نظیر بھٹو انٹرنیشنل ایئرپورٹ رکھنے سے متعلق اہم قرارداد متفقہ طور پر منظور کر لی۔ یہ قرارداد ایک قومی مطالبے کی شکل اختیار کر چکی ہے، جسے سندھ اسمبلی کے بعد اب بلوچستان اسمبلی نے بھی اپنی تائید فراہم کی ہے۔قرارداد کی منظوری پر گورنر خیبرپختونخوا فیصل کریم کنڈی نے وزیراعلیٰ بلوچستان سرفراز بگٹی اور بلوچستان اسمبلی کے اراکین کا شکریہ ادا کرتے ہوئے انہیں مبارکباد پیش کی۔فیصل کریم کنڈی نے کہا کہ 2008 میں اُس وقت کے وزیراعظم یوسف رضا گیلانی نے اسلام آباد ایئرپورٹ کا نام شہید بے نظیر بھٹو کے نام پر رکھنے کا اعلان کیا تھا، لیکن بعد میں اس فیصلے کو واپس لے کر ایک تاریخی شخصیت کے ساتھ ناانصافی کی گئی۔انہوں نے کہا کہ بلوچستان اسمبلی کی قرارداد ایک “قومی آواز” ہے جو عوام کے جذبات کی ترجمانی کرتی ہے۔ انہوں نے مزید انکشاف کیا کہ وہ خود بھی اس مطالبے کے حق میں صدر مملکت اور وزیراعظم پاکستان کو باقاعدہ طور پر خط لکھ چکے ہیں۔گورنر خیبرپختونخوا نے امید ظاہر کی کہ وفاقی حکومت اس قرارداد کا احترام کرتے ہوئے جلد از جلد اسلام آباد ایئرپورٹ کا نام شہید بے نظیر بھٹو انٹرنیشنل ایئرپورٹ رکھنے کا نوٹیفکیشن جاری کرے گی۔