خواجہ آصف سے رائل سعودی نیول فورسز کے چیف آف نیول اسٹاف کی ملاقات

اسلام آباد:رائل سعودی نیول فورسز کے چیف آف نیول اسٹاف وائس ایڈمرل محمد بن عبدالرحمان الغریبی نے آج اسلام آباد میں وزیر دفاع خواجہ محمد آصف سے ان کے دفتر میں ملاقات کی۔ملاقات کے دوران دونوں معززین نے پاکستان اور مملکت سعودی عرب کے درمیان پائیدار اور قریبی برادرانہ تعلقات کا اعادہ کیا، جن کی جڑیں مشترکہ اقدار، باہمی اعتماد اور تعاون کی بھرپور تاریخ ہیں۔ دونوں فریقین نے دوطرفہ دفاعی تعاون کے امور پر تبادلہ خیال کیا، خاص طور پر بحری تعاون اور علاقائی میری ٹائم سیکورٹی پر توجہ مرکوز کی۔وزیر دفاع خواجہ محمد آصف نے دونوں ممالک کی مسلح افواج کے درمیان دیرینہ تزویراتی شراکت داری کو سراہتے ہوئے مشترکہ مشقوں، تربیتی تبادلوں اور مسلسل بات چیت کے ذریعے باہمی تعاون کو بڑھانے کی اہمیت پر زور دیا۔دونوں اطراف نے امن اور باہمی خوشحالی کے مفاد میں دفاعی تعلقات کو مزید مضبوط بنانے کے عزم کا اعادہ کیا۔ملاقات کا اختتام پاکستان اور سعودی عرب کے درمیان تاریخی تعلقات کے اعادہ کے ساتھ ہوا جو مشترکہ امنگوں اور ترقی کے لیے مشترکہ وژن پر مبنی ہے-