ڈینگی بے قابو،جڑواں شہروں میں مزید 69 کیسز رپورٹ

اسلام آباد،راولپنڈی: جڑواں شہروں میں ڈینگی کا پھیلاؤ بڑھنے لگا،اسلام آباد میں 40،راولپنڈی میں مزید29 کیسز رپورٹ ہو ئے ہیں۔گزشتہ روز ڈی سی اسلام آباد کی زیر صدارت طبی ماہرین کا اہم اجلاس ہوا جس میں ڈینگی لاروا کی افزائش روکنے کے لئے سفارشات کا جائزہ لیا گیا اور گھر گھر انسداد ڈینگی فوگنگ یقینی بنانے کے لیے اسسٹنٹ کمشنرز کو ہدایات دی گئیں ۔بتایا گیا گزشتہ چوبیس گھنٹوں کے دوران مجموعی طور پر 40 کیسز رپورٹ ہوئے ،گزشتہ ایک یوم میں شہر بھر میں 977 انسپکشنز کی گئیں اور 1 ہزار 742 مقامات پر فوگنگ کروائی گئی۔ ادھر راولپنڈی میں ڈینگی کے مزید 29کیسز سامنے آگئے ،14لاکھ سے زائد مقامات کی چیکنگ کی گئی جبکہ 22ہزار سے زائد جگہوں پر لاروا کی موجودگی پائی گئی ۔محکمہ صحت حکام کے مطابق ر اولپنڈی ضلع میں اب تک ڈینگی کے 709مریض کنفرم ہوئے ہیں جبکہ اس وقت ہسپتالوں میں 61 مریض زیرِ علاج ہیں، راولپنڈی میں ڈینگی سے کوئی موت نہیں ہوئی۔