اسلام آباد: اپوزیشن رہنماؤں نے کہا ہے کہ آئین کی بالادستی کےلیےسب کومل کربات کرنا ہوگی۔اسلام آباد میں محمود خان اچکزئی،شاہد خاقان عباسی کے ہمراہ مشترکہ پریس کانفرنس میں گفتگو کرتے اسد قیصر کا کہنا تھا کہ شاہد خاقان عباسی محمود اچکزئی نے اکٹھے ہونے کے لیے دعوت دی ہے۔انہوں نے کہا کہ تمام سیاسی جماعتوں کواکٹھا کرکےایک لائحہ عمل بنایا جائےگا، بانی پی ٹی آئی کوسزا پوری عدلیہ پرکالا دھبہ ہے، وزرا تو پہلے سے سزا کے بارے بتا رہے تھے، ملک کو بنانا ری پبلک بنا دیا گیا۔رہنما تحریک انصاف کا کہنا تھا کہ ظلم کےنظام کےخلاف سب کو رول آف لا، آئین کی بالادستی کے لیے اکٹھا ہونا ہو گا، ملک میں مایوسی کےبادل چھائے ہوئے ہیں، آج کے فیصلے کے خلاف قانونی چارہ جوئی کریں گے، ہمارا ایک ہی ایجنڈا ملک میں آئین کی بالادستی ہے، شاہدخاقان عباسی کےانتہائی مشکورہیں۔دوسری جانب شاہد خاقان عباسی کا کہنا تھا کہ آئین کی بالادستی کےلیےسب کو مل کربات کرنا ہوگی، اگرملک آئین کےمطابق نہیں چلےگا توسیاسی انتشارختم نہیں ہوگا۔علاوہ ازیں محمود اچکزئی کا کہنا تھا کہ آج جمعہ کےدن بانی پی ٹی آئی کی سزا کی بری خبر ملی۔
Category: اہم خبریں
-
نائب وزیرِاعظم کی صنعتی بجلی صارفین کو ریلیف فراہم کرنے کی ہدایت
اسلام آباد: نائب وزیرِاعظم اور وزیرِ خارجہ سینیٹر محمد اسحاق ڈار نے متعلقہ محکموں کو صنعتی بجلی صارفین کو ریلیف فراہم کرنے کے عمل کا آغاز کرنے کی ہدایت دی ہے۔آج (جمعہ) اسلام آباد میں صنعتی شعبے کے لیے بجلی کے نرخوں پر ہونے والے دوسرے اجلاس کی صدارت کرتے ہوئے نائب وزیرِاعظم نے یہ احکامات جاری کیے۔اجلاس کے دوران نائب وزیرِاعظم نے وزارتِ خزانہ، وزارتِ انفارمیشن ٹیکنالوجی، اور وزارتِ توانائی کی جانب سے پیش کی گئی تجاویز کا جائزہ لیا۔انہوں نے زور دیا کہ بجلی کے نرخوں میں ریلیف صنعتی ترقی کے لیے ناگزیر ہے اور اس عمل کو فوری طور پر عملی جامہ پہنایا جائے۔
-
سپین‘ تارکین کی ایک اور کشی کو حادثہ‘44 پاکستانیوں سمیت 50 افراد ہلاک
اسلام آباد: مغربی افریقہ کے راستے غیر قانونی طور پر اسپین جانے والے کشتی حادثے کا شکار ہوگئی ہے جس کے نتیجے میں 50 افراد ہلاک ہوگئے، جن میں 44 پاکستانی بھی شامل ہیں۔غیر ملکی خبررساں ادارے ’رائٹرز‘ کے مطابق تارکین وطن کے حقوق کے لیے کام کرنے والی تنظیم واکنگ بارڈرز نے کہا ہے کہ مغربی افریقہ سے کشتی کے ذریعے اسپین پہنچنے کی کوشش کے دوران 50 تارکین وطن ڈوب کر ہلاک ہوگئے۔مراکش کے حکام کا کہنا ہے کہ گزشتہ روز حادثے کا شکار ہونے والی تارکین وطن کی ایک کشتی سے 36 افراد کو بچایا گیا ہے جو 2 جنوری کو افریقی ملک موریطانیہ سے روانہ ہوئی تھی اور اس میں 86 تارکین وطن سوار تھے جن میں 66 پاکستانی بھی شامل تھے۔واکنگ بارڈرز کے مطابق سال 2024 کے دوران ریکارڈ 10 ہزار 457 تارکین وطن اسپین پہنچنے کی کوشش میں ہلاک ہوئے، جن میں سے زیادہ تر مغربی افریقی ممالک جیسے موریطانیہ اور سینیگال سے کینری جزائر تک بحر اوقیانوس کے راستے کو عبور کرنے کی کوشش کے دوران ہلاک ہوئے۔انسانی حقوق کی تنظیم کے مطابق 6 روز قبل تمام ممالک کے حکام کو لاپتا کشتی کے بارے میں آگاہ کردیا تھا۔سمندر میں گم ہونے والے تارکین وطن کے لیے ہنگامی فون لائن فراہم کرنے والی ایک غیر سرکاری تنظیم ’الارم فون‘ نے 12 جنوری کو اسپین کی میری ٹائم ریسکیو سروس کو الرٹ کیا تھا۔
-
وزیر اعظم کا ایف بی آر کے قانونی مقدمات جلد نمٹانے کی ہدایت
اسلام آباد: وزیر اعظم محمد شہباز شریف نے جمعرات کو متعلقہ حکام کو ہدایت کی کہ وہ ٹیکس ریونیو کے زیر سماعت مقدمات کے جلد از جلد فیصلے کے لیے فیڈرل بورڈ آف ریونیو (ایف بی آر) کے قانونی اقدامات کو تیز کریں۔ایف بی آر کے قانونی مقدمات پر نظرثانی اجلاس کی صدارت کرتے ہوئے، وزیر اعظم نے ایف بی آر کے ٹیکس ریونیو کے مقدمات کی نمائندگی کے لیے نامور وکلاء کی خدمات حاصل کرنے کی ہدایت دی۔انہوں نے کہا کہ حکومت ایف بی آر کے نظام میں اصلاحات کو تیزی سے نافذ کر رہی ہے۔”اللہ تعالیٰ کے فضل سے، ایف بی آر میں اصلاحات کے مثبت نتائج مسلسل سامنے آ رہے ہیں،” انہوں نے کہا۔وزیر اعظم نے ٹیکس معاملات سے متعلق کیسز کا فرانزک آڈٹ کرنے کی بھی ہدایت کی۔وزیر اعظم شہباز شریف نے عزم ظاہر کیا کہ وہ افسران جو کمزور یا جھوٹے بنیادوں پر مقدمات بنانے میں ملوث پائے گئے، ان کو سزا دی جائے گی۔دوسری طرف، انہوں نے کہا کہ وہ افسران جنہوں نے دیانتداری اور محنت کے ساتھ میرٹ پر مقدمات تیار کیے، انہیں خصوصی مراعات کے ساتھ انعام دیا جائے گا۔اجلاس میں بتایا گیا کہ وزیر اعظم کی ہدایات کے بعد مشہور وکلاء کو پینل میں شامل کیا گیا، اور اس کے نتیجے میں جولائی سے دسمبر 2024 تک ہائی کورٹ میں 586 مقدمات اور سپریم کورٹ میں 637 زیر التواء مقدمات کو حل کیا گیا۔اجلاس کو مزید آگاہ کیا گیا کہ اس وقت ملک بھر کی مختلف عدالتوں اور ٹریبونلز میں 33,522 مقدمات زیر التواء ہیں جن میں 4.7 ٹریلین روپے کے واجبات شامل ہیں۔اجلاس میں بتایا گیا کہ وزیر اعظم کی ہدایات کے مطابق، ایف بی آر میں اعلیٰ عدالتوں کے لیے ایک لٹیگیشن مینجمنٹ ڈیش بورڈ تیار کیا گیا ہے، جبکہ وزارت قانون و انصاف میں ٹیکس ٹریبونلز مینجمنٹ سسٹم کی تیاری آخری مراحل میں ہے، جو جلد لانچ کیا جائے گا۔اجلاس میں وزیر اقتصادی امور احد خان چیمہ، اٹارنی جنرل منصور اعوان، چیئرمین ایف بی آر اور دیگر سینئر حکام نے شرکت کی۔
-
پاکستان کا غزہ میں جنگ بندی معاہدے کا خیرمقدم‘جانی اور مالی نقصان پر تشویش کا اظہار
اسلام آباد: دفتر خارجہ کی جانب سے جاری بیان میں کہا گیا ہے کہ امید ہے کہ یہ جنگ بندی مستقل جنگ بندی ہوگی اور انسانی ہمدردی کی بنیاد پر امداد بڑھانے میں مدد ملے گی۔بیان میں مزید کہا گیا ہے کہ اسرائیلی قابض افواج کی جانب سے طاقت کے اندھا دھند استعمال سے جان و مال کا بے مثال نقصان ہوا ہے اور لاکھوں بے گناہ فلسطینی بے گھر ہوئے ہیں۔ترجمان دفتر خارجہ کا کہنا تھا کہ اسرائیل کے توسیع پسندانہ عزائم نے پورے خطے کو غیر مستحکم کردیا ہے۔اعلامیے میں کہا گیا ہے کہ پاکستان مسئلہ فلسطین کے منصفانہ، جامع اور پائیدار حل کے لیے اپنی حمایت کا اعادہ کرتا ہے جس کے نتیجے میں جون 1967 سے قبل کی سرحدوں پر مبنی ایک خودمختار فلسطینی ریاست کا قیام عمل میں آئے گا جس کا دارالحکومت القدس الشریف ہو گا۔15 ماہ سے جاری اسرائیلی جارحیت کے بعد جس میں ہزاروں فلسطینی شہید اور مشرق وسطیٰ میں اشتعال انگیزی پیدا ہوئی ہے، بدھ کے روز جنگ بندی اور یرغمالیوں کی رہائی کے معاہدے کا اعلان کیا گیا ہے۔اس معاہدے میں غزہ کی پٹی سے اسرائیلی افواج کے بتدریج انخلا کے ساتھ چھ ہفتوں کی ابتدائی جنگ بندی کا خاکہ پیش کیا گیا ہے، جہاں دسیوں ہزار افراد شہید ہو چکے ہیں۔ حماس کی جانب سے یرغمال بنائے گئے افراد کو اسرائیل کے زیر حراست فلسطینی قیدیوں کے بدلے رہا کیا جائے گا۔سول ایمرجنسی سروس اور رہائشیوں کا کہنا ہے کہ غزہ اور اسرائیل میں جہاں لوگوں نے معاہدے کا جشن منایا وہیں اسرائیلی فوج نے اس اعلان کے بعد حملوں میں اضافہ کر دیا ہے۔طبی ماہرین کا کہنا ہے کہ اسرائیل کی بمباری، خاص طور پر غزہ شہر میں، بدھ کی رات دیر گئے 32 افراد شہید ہو گئے۔مقامی لوگوں کا کہنا ہے کہ یہ حملے جمعرات کی علی الصبح بھی جاری رہے اور جنوبی غزہ کے علاقے رفح، وسطی غزہ کے علاقے نصرات اور شمالی غزہ میں مکانات تباہ ہو گئے۔
-
ورلڈ اکنامک فورم کا پاکستان کی معاشی صورتحال پر اطمینان کا اظہار
ورلڈ اکنامک فورم نے پاکستان کی معاشی صورتحال پراظہار اعتماد اوراطمینان کیا ہے۔ورلڈ اکنامک فورم نے گلوبل رسک رپورٹ 2025جاری کر دی ، رپورٹ کے مطابق چیلنجز کے باوجود پاکستان معاشی استحکام کی جانب بڑھ رہا ہے،پاکستان نے کڑے چیلنجز کے باوجود معاشی کامیابیاں حاصل کیں۔خطے میں اسلحہ کی دوڑ کے باوجود پاکستان کی محتاط سوچ لائق تحسین ہے،دنیا بھر میں فوجی بجٹ میں اضافہ ہوا لیکن پاکستان اسلحہ کی دوڑ کا حصہ دار نہیں بنا۔پاکستان نے مہنگائی میں کمی، معاشی استحکام اورروپے کی قدر میں بہتری دکھائی،پاکستان نے قرض کی بہتر انتظام کاری کے شعبوں میں بھی نمایاں بہتری دکھائی۔ پاکستان ماحولیاتی طور پر سب سے زیادہ متاثر ممالک میں سے ایک ہے،پاکستان میں سیلاب، ہیٹ ویوز اور پانی کی قلت جیسے عوامل استحکام اور روزگار کے لیے خطرہ ہیں۔ سی ای او مشعل پاکستان عامر جہانگیر کا کہنا ہے کہ علاقائی تعاون کو بڑھا کر پاکستان مزید استحکام حاصل کرنے کی صلاحیت رکھتا ہے،خطرات کو مواقع میں تبدیل کرنے کی صلاحیت مستقبل کا تعین کرے گی۔پاکستان خود کو ابھرتے ہوئے عالمی منظر نامے میں اہم کھلاڑی کے طور پر کھڑا کر سکتا ہے۔
-
پاکستان اور ہانگ کانگ کااقتصادی اور سفارتی تعلقات کو مضبوط کرنے پر زور
اسلام آباد: وفاقی وزیر خزانہ و ریونیو سینیٹر محمد اورنگزیب اور ہانگ کانگ خصوصی انتظامی علاقے کے چیف ایگزیکٹو جان کے سی لی خصوصی ملاقات ۔ ملاقات میں دونوں ممالک کے درمیان اقتصادی اور سفارتی تعلقات کو مضبوط بنانے کی اہمیت پر زور دیاگیا۔وزارت خزانہ کی جانب سے جاری کردہ پریس ریلیز کے مطابق، سینیٹر اورنگزیب نے جان کے سی لی سے ملاقات کے دوران مالیات، ٹیکنالوجی، اور سیاحت سمیت مختلف شعبوں میں تعاون بڑھانے کی صلاحیت کو اجاگر کیا۔انہوں نے دونوں خطوں کے مشترکہ اقدار اور مفادات پر روشنی ڈالی اور پاکستان کی ان تعلقات کو مزید مضبوط کرنے کی خواہش کا اظہار کیا۔وزیر خزانہ اور چیف ایگزیکٹو نے مختلف موضوعات پر تعمیری گفتگو کی، جن میں اقتصادی تعاون، تجارتی تعلقات، سرمایہ کاری کے مواقع، اور ثقافتی تبادلے شامل تھے۔ اس گفتگو کا مقصد قریبی تعلقات کو فروغ دینا اور باہمی ترقی اور خوشحالی کے مواقع تلاش کرنا تھا۔اس موقع پر جان کے سی لی نے سینیٹر اورنگزیب کے دورے کا خیر مقدم کیا اور پاکستان اور ہانگ کانگ کے درمیان تعاون بڑھانے کے عزم کا اعادہ کیا۔ انہوں نے اقتصادی ترقی، جدت طرازی، اور ثقافتی تبادلے کے لیے مضبوط شراکت داری کی اہمیت کو تسلیم کرتے ہوئے اس تعاون کے دوطرفہ فوائد پر زور دیا۔سینیٹر محمد اورنگزیب اور جان کے سی لی کے درمیان ہونے والی ملاقات دونوں فریقین کی جانب سے دوطرفہ تعلقات کو مضبوط کرنے اور مختلف شعبوں میں بامعنی شراکت داری کے مواقع تلاش کرنے کے عزم کی عکاسی کرتی ہے۔اس موقع پر پاکستان کے سفیر برائے چین خلیل ہاشمی اور ہانگ کانگ میں قونصل جنرل ریاض احمد شیخ بھی موجود تھے۔
-
اسٹیبلشمنٹ کے نظریہ گرفت پر ہمیں اعتراض رہے گا، فضل الرحمن
جمعیت علمائے اسلام (ف) کے سربراہ مولانا فضل الرحمن نے کہا ہے کہ اسٹیبلشمنٹ کا کوئی نظریہ نہیں ہے، ان کا نظریہ صرف اتھارٹی ہے کہ گرفت ہماری رہے،وہ جائز ہو، ناجائز ہو، اس پر ہمیں اعتراض ہے اور رہے گا۔
کراچی میں نیوز کانفرنس سے خطاب کرتے ہوئے انہوں نے کہا کہ پی ٹی آئی نے حکومت کے ساتھ مذاکرات کے معاملے پر اعتماد میں نہیں لیا، پی ٹی آئی نے اس حوالے سے اعتماد میں نہیں لیا اور مجھے اس بارے میں کوئی علم نہیں ہے کہ وہ کہہ رہے ہیں اور کیا کر رہے ہیں۔
ان کا کہنا تھا کہ مدت کرنے کا الیکشن کی شفافیت سے کوئی تعلق نہیں ہے، مدت تو آمرانہ حکومتیں بھی پوری کرلیتی ہیں، بلکہ 10، 10 سال حکومت کرتی ہیں، اس کا الیکشن کی شفافیت سے تعلق نہیں ہے۔
سربراہ جے یو آئی (ف) نے کہا کہ ابھی بلوچستان کے حلقہ 45 میں الیکشن ہوا، اس میں فاتح قرار دیا گیا امیدوار کسی ایک حلقے میں بھی نہیں جیتا ہے، فارم 45 میں کہیں ایک، کہیں دو، کہیں 5 اور کہیں 20 ووٹ حاصل کیے، یہ ان کا ووٹ ہے، ہم چیف الیکشن کمشنر پر کیسے اعتماد کریں، ابھی تک ان کا وتیرہ تبدیل نہیں ہو رہا ہے۔
مولانا فضل الرحمٰن نے کہا کہ ابھی تک اسٹیبلشمنٹ کہتی ہے کہ میں نے فیصلے کرنے ہیں، میں نے تنائج مرتب کرنے ہیں، عوام کی کیا حیثیت ہے کہ وہ کہیں میں نے اس کو ووٹ دیا، اس کو وو دیا، اس کا معنیٰ یہ ہے کہ وہ جمہوریت کا مذاق اڑا رہے ہیں۔
سربراہ جے یو آئی نے کہا کہ جب اسٹیبلشمنٹ جمہوریت اور آئین کا مذاق اڑائے تو کیا لوگ ان کا مذاق نہیں اڑائیں گے، لوگ ان پر تنقید نہیں کریں گے، وہ تنقید پر ناراض ہوتے ہیں اور حرکتیں یہ کرتے ہیں، اقتدار ہمارے پاس ہوگا، گرفت ہماری ہوگی۔
مولانا فضل الرحمٰن نے کہا کہ ان کا کوئی نظریہ نہیں ہے، ان کا نظریہ صرف اتھارٹی ہے کہ گرفت ہماری رہے، وہ جائز ہو، ناجائز ہو، ان کو کوئی پروا نہیں ہے، اس پر ہمیں اعتراض ہے اور رہے گا۔ -
ایاز صادق کا کہنا ہے کہ حکومت اور اتحادی فیصلہ کریں گے کہ پی ٹی آئی اور عمران خان کے درمیان ملاقات کیسے ہو
اسلام آباد: پاکستان تحریک انصاف (پی ٹی آئی) اور حکومت کے درمیان جاری غیر یقینی صورتحال کے درمیان، قومی اسمبلی کے اسپیکر ایاز صادق نے کہا ہے کہ پی ٹی آئی اور اس کے جیل میں قید بانی عمران خان کے درمیان ملاقات کے معاملے پر فیصلہ حکومت اور اس کے اتحادیوں کو کرنا ہوگا۔ انہوں نے کہا کہ نہ تو پی ٹی آئی اور نہ ہی حکومت کی جانب سے ان سے ملاقات کے لیے تیسری بات چیت کے لیے درخواست کی گئی ہے، جسے وہ چند دنوں کی نوٹس پر بلا سکتے ہیں۔
ایاز صادق نے مزید کہا کہ وہ پی ٹی آئی کی کمیٹی اور عمران خان کے درمیان ملاقات کو سہولت فراہم کرنے کے ذمہ دار نہیں ہیں، بلکہ یہ ذمہ داری حکومت پر عائد ہوتی ہے۔ اسپیکر نے اس بات کا بھی ذکر کیا کہ حکومت کو اس معاملے کو حل کرنے کے لیے مناسب اقدامات کرنا ہوں گے، اور اگر ملاقات ضروری ہو تو انہیں اس سلسلے میں فیصلہ کرنا ہوگا۔ اس سے قبل پی ٹی آئی نے حکومت سے مذاکرات کی تجویز دی تھی، لیکن اب تک اس پر کوئی واضح پیش رفت سامنے نہیں آئی ہے۔
-
وزیراعظم شہباز شریف کا لڑکیوں کی تعلیم کے لیے مشترکہ کوششوں کی ضرورت پر زور
وزیراعظم شہباز شریف نے ہفتے کے روز اسلام آباد میں “مسلم کمیونٹیز میں لڑکیوں کی تعلیم: چیلنجز اور مواقع” کے موضوع پر دو روزہ بین الاقوامی کانفرنس کا افتتاح کیا۔ اس موقع پر انہوں نے کہا کہ لڑکیوں کی تعلیم ایک ایسا معاملہ ہے جس کے لیے نہ صرف جدوجہد کرنا ضروری ہے بلکہ اس میں سرمایہ کاری کرنا اور اس کی حمایت کرنا بھی انتہائی اہم ہے۔ وزیراعظم نے عالمی برادری اور مسلم ممالک کی حکومتوں پر زور دیا کہ وہ لڑکیوں کی تعلیم کے فروغ کے لیے مشترکہ طور پر قابل عمل اور پائیدار حل تلاش کریں۔
وزیراعظم نے کہا کہ ہمیں لڑکیوں کی تعلیم کے حوالے سے درپیش چیلنجز کو حل کرنے کے لیے مربوط کوششیں کرنی ہوں گی تاکہ اس شعبے میں ترقی کی راہیں کھولی جا سکیں۔ ان کا کہنا تھا کہ لڑکیوں کی تعلیم نہ صرف فرد کی ترقی کے لیے اہم ہے بلکہ اس سے پورے معاشرے میں مثبت تبدیلیاں آتی ہیں۔ انہوں نے تمام متعلقہ اداروں اور تنظیموں سے اپیل کی کہ وہ اس مقصد کے حصول کے لیے اپنے وسائل اور توانائیاں یکجا کریں تاکہ لڑکیوں کو بہتر تعلیمی مواقع فراہم کیے جا سکیں۔