Blog

دونوں ممالک کو اپنے دیرینہ تنازعات کو حل کیے بغیر نہیں چھوڑنا چاہیے ایران پر پابندی ہٹنے سے دنیا بھر کو فائدہ ہوگا، انٹرویو،میڈیا سے گفتگو
اسلام آباد: پاکستان پیپلز پارٹی کے چیئرمین بلاول بھٹو نے کہا کہ پاکستان اور بھارت کو اپنے دیرینہ تنازعات کو حل کیے بغیر نہیں چھوڑنا چاہیے اور موجودہ جنگ بندی کو محض ایک وقفہ نہیں بلکہ ایک وسیع اور دیرپا امن عمل کا نقطہ آغاز ہونا چاہیے ، ایران سے پابندی ہٹنے سے پاکستان سمیت دنیا بھر کو فائدہ ہوگا، پاکستان ایک بار پھر عالمی سطح پر ایک اہم سفارتی کھلاڑی بن کر سامنے آ رہا ہے جسے نظر انداز کرنا ناممکن ہے ۔برطانوی ٹی وی کو انٹرویو اور میڈیاسے گفتگو کرتے ہوئے بلاول بھٹو کا کہنا تھا کہ اسلام آباد معاہدے کے بعد اب پوری دنیا پاکستان کی طرف دیکھ رہی ہے ، امید ہے ان مذاکرات کے نتیجے میں ایران پر عائد عالمی پابندیاں ختم ہوں گی، جس کا براہِ راست فائدہ پاکستان سمیت پوری دنیا کی معیشت کو ہوگا۔بلاول بھٹو نے بھارتی وزیرِ خارجہ ایس جے شنکر کے حالیہ بیانات پر سخت ردِعمل دیتے ہوئے اسے بھارت کی بوکھلاہٹ اور تنگ نظری قرار دیا اور کہا دونوں ممالک ماضی میں متعدد بار شدید کشیدگی کے باوجود سیز فائر تک پہنچے ہیں۔انھوں نے مزید کہا بھارت کا موجودہ موقف نہ صرف تنگ نظری پر مبنی ہے بلکہ یہ عالمی سطح پر پاکستان کی ابھرتی ہوئی پوزیشن سے خوفزدہ ہونے کی عکاسی کرتا ہے ۔ ہماری پہلیترجیح نوبیل امن انعام نہیں بلکہ خطے میں پائیدار امن کا قیام ہے ، عالمی برادری کے پاس پلان بی کی گنجائش نہیں ہے ، ہمیں ہر صورت پلان اے یعنی امن کو ہی کامیاب بنانا ہوگا۔

اسلام آباد:نائب وزیراعظم و وزیر خارجہ سینیٹر اسحاق ڈار سے ایرانی مرکزی بینک کے گورنر عبدالناصر ہمتی کی اسلام آباد میں امن مذاکرات کے دوران ملاقات ہوئی ہے۔ترجمان دفتر خارجہ کے مطابق ملاقات کے دوران دونوں رہنماؤں نے باہمی دلچسپی کے امور پر تبادلہ خیال کیا۔ فریقین نے اس بات پر زور دیا کہ دونوں ممالک کے درمیان مستقل مکالمے کا تسلسل وقت کی اہم ضرورت ہے۔نائب وزیراعظم اسحاق ڈار اور ڈاکٹر عبدالناصر ہمتی نے اس عزم کا اعادہ کیا کہ خطے میں پائیدار امن اور استحکام ہی وہ بنیاد ہے جس پر معاشی تعاون اور مشترکہ ترقی کی عمارت کھڑی کی جا سکتی ہے۔دونوں رہنماؤں کا کہنا تھا کہ علاقائی ترقی کے اہداف کے حصول کے لیے پرامن ماحول ناگزیر ہے، ملاقات میں اسلام آباد میں جاری سفارتی کوششوں اور ‘اسلام آباد ٹاکس’ کی اہمیت کو سراہا گیا، جو خطے میں پاکستان کے بڑھتے ہوئے سفارتی اثر و رسوخ کی عکاسی کرتی ہیں۔

نارووال: وفاقی وزیر پلاننگ اینڈ ڈیولپمنٹ احسن اقبال نے کہا ہے کہ دنیا کو تباہی سے بچانے پر ہمارے ہمسائے ممالک کو بھی شکر گزار ہونا چاہیے۔اپنے آبائی علاقے نارووال میں تقریب سے خطاب کرتے ہوئے کہنا تھا کہ احسن اقبال کا نارووال میں دنیا کی نگاہیں پاکستان کی طرف لگی ہوئی ہیں۔اُنہوں نے کہا کہ وہ جنگ جس کے شعلے پورے خطے کو جھلسنے لگے تھے، وہ جنگ جس نے پوری دنیا کی معیشت کو اپنی لپیٹ میں لے لیا تھا، دنیا میں مہنگائی قہر بن کر ٹوٹی تھی، غربت مہنگائی میں پاکستان سمیت پوری دنیا میں اضافہ ہوا تھا۔وفاقی وزیر کا کہنا تھا کہ جنگ بند کروانے کیلئے اللہ تعالیٰ نے پاکستان کو عزت سے نوازا ہے، امریکہ، ایران کے مندوب امن مذاکرات کرنے کے لئے اسلام آباد میں موجود ہیں۔احسن اقبال نے کہا کہ وزیراعظم شہباز شریف، فیلڈ مارشل عاصم منیر صاحب کو مبارکباد دیتے ہیں اِن کی کامیاب کوششوں سے پاکستان کو عزت وہ ملی ہے جس نے ہمارے دوستوں کو سینہ فخر سے چوڑا کر دیا ہے۔اُن کا کہنا تھا کہ ہمارے ہمسائے ملک بارڈر سے اِدھر نظر ڈالیں تو دھواں اٹھتا نظر آئے گا، وہ اس موقع پر کوئلہ کی طرح جل کر راکھ ہو رہے ہیں،وہ نہیں جانتے کہ یہ جنگ نہ رکتی تو ہندوستان کے اندر بھی کروڑوں عوام بھوک غربت بیروزگاری کا شکار ہو جاتے۔وفاقی وزیر نے کہا کہ آج جو پاکستان کام کر رہا ہے ہندوستان کو حسد کرنے کی بجائے پاکستان کا شکر گزار ہونا چاہیے، پاکستان نے دنیا کو بھی تباہ ہونے سے بچا لیا اور ہندوستان کو بھی بچا لیا ہے ، اللہ تعالی مسلم لیگ ن کی حکومت میں پاکستان کو عزت سے نواز رہا ہے۔

حکومتی معاشی پالیسیوں ،مہنگی بجلی اور پٹرولیم قیمتوں کے خلاف ملک گیر مظاہرے ،دھرنے ہونگے :حافظ نعیم ابھی بھی پٹرول پر 100روپے سے زائد لیوی،کاشتکاروں کا استحصال ہورہا ، حکمران مسلط کردہ ہیں:کنونشن سے خطاب
گوجرانوالہ:امیر جماعت اسلامی پاکستان حافظ نعیم الرحمن نے آئی پی پیز مافیا کے خلاف نکلنے کا اعلان کر دیا،ان کا کہنا تھا کہ حکومت کی معاشی پالیسیوں، مہنگائی، بجلی اور پٹرول کی قیمتوں میں اضافے کے خلاف جگہ جگہ مظاہرے ہوں گے ۔گوجرانوالہ میں عوامی کمیٹیزکنونشن سے خطاب کرتے ہوئے حافظ نعیم الرحمن نے کہا کہ آئی پی پیز اور معاشی پالیسیوں کے خلاف پہلے مرحلے میں جی ٹی روڈز پر جگہ جگہ دھرنے دئیے جائیں گے ۔انہوں نے کہا پاکستان دنیا بھر میں نمایاں ہوا، یہ اقدام قابل تحسین ہے ، لیکن ہمارے حکمرانوں کو عوام کا خیال نہیں۔ ابھی بھی پٹرول پر 100روپے سے زائد لیوی ہے ۔ پٹرول کی قیمت میں فوری کمی کی جائے ۔ ان کا کہنا تھا ہمارے ٹیکسوں سے مریم نواز کے اشتہارات چلتے ہیں،مریم نواز نے صحت کے بنیادی مراکز اور سکولز کی نجکاری کر دی لیکن اپنے لئے گیارہ ارب کا جہاز خرید لیا، امیر جماعت اسلامی نے کہا کہ حکومت نے گندم کی قیمت 3900 روپے مقرر کی پھر مکر گئی۔ کسانوں نے مجبور ہو کر 2100 روپے من گندم بیچی۔کھاد، یوریا اور زرعی ادویات انتہائی مہنگی کر دی گئیں۔امیر جماعت اسلامی کا کہنا تھا جو عوام میں تفریق پیدا کرتے ہیں وہ سامراج کے غلام ہیں۔ جماعت اسلامی زبردستی مسلط نہیں ہونا چاہتی، ہمارے اوپر قومی و بین الاقوامی اسٹیبلشمنٹ کی مدد سے حکمران مسلط کیے گئے ۔ جماعت اسلامی صرف عوام کی طاقت سے اقتدار میں آئے گی۔حافظ نعیم الرحمن نے کہا امریکا اور اسرائیل نے پوری طاقت کے ساتھ ایران میں یلغار کی۔ ایران میں اعلیٰ قیادت اور ہزاروں بچوں کو شہید کیا گیا، لیکن اعلٰی قیادت کے باعث عوام ڈٹے رہے ، ان کا کہنا تھا امریکا میں نام نہاد جمہوریت ہے ، وہاں صہیونیوں کا قبضہ ہے ۔ شیطان کے پجاری، بچوں کا خون چوسنے والے یہ شیطان ہیں۔ اسلحہ ساز کمپنیوں کی امریکا میں اجارہ داری ہے اور ارب پتیوں نے قبضہ جما رکھا ہے ۔جبکہ اس موقع پر نائب امیر جماعت اسلامی پاکستان لیاقت بلوچ، ڈاکٹر اسامہ رضی صوبائی امیر محمد جاوید قصوری، ڈاکٹر بابر رشید،مظہر اقبال رندھاواو دیگر نے بھی عوامی کمیٹیز کنونشن سے خطاب کیا

تمام اہلکار الرٹ رہ کر اپنی ذمہ داریاں انجام دیں،ناصر رضوی کی ہدایت
اسلام آباد:آئی جی سید علی ناصر رضوی نے چیف کمشنر اسلام آباد سہیل اشرف کے ہمراہ ریڈ زون کا دورہ کرکے غیر ملکی وفود کی آمد و رفت کے پیش نظر سکیورٹی انتظامات ،داخلی و خارجی راستوں اور اہم سرکاری و نجی اداروں کے حفاظتی اقدامات کا جائزہ لیا،انہوں نے تمام افسران کو سکیورٹی اقدامات کو مزید سخت اور مؤثر بنانے کے احکامات جاری کیے ۔آئی جی اسلام آباد نے اس امر پر زور دیا کہ تمام اہلکار الرٹ رہیں اور اپنی ذمہ داریاں انتہائی پیشہ ورانہ انداز میں انجام دیں۔ انہوں نے شہریوں سے اپیل کی کہ وہ سکیورٹی اداروں کے ساتھ مکمل تعاون کریں اور جاری ہدایات پر عملدرآمد یقینی بنائیں۔