اسمارٹ فون کی لت پر قابو پانے کے لیے کتابوں کا مطالعہ مفید ثابت ہو سکتا ہے

موجودہ عہد میں اسمارٹ فونز کا استعمال بہت زیادہ بڑھ چکا ہے، اور یہ صرف رابطے کا ذریعہ نہیں بلکہ ہماری روزمرہ زندگی کا ایک اہم حصہ بن چکا ہے۔ مگر اس کے ساتھ ہی اسمارٹ فونز کے مسلسل استعمال سے صحت پر منفی اثرات مرتب ہو سکتے ہیں اور وقت کا ضیاع بھی ہوتا ہے۔

ایسی صورتحال میں اس لت سے بچنے کے لیے ایک سادہ تکنیک تجویز کی گئی ہے جو صرف 6 منٹ میں اسمارٹ فون کی لت پر قابو پانے میں مددگار ثابت ہو سکتی ہے۔ ایک تحقیق کے مطابق، صرف 6 منٹ تک کسی کتاب کا مطالعہ کرنے سے ذہنی تناؤ میں 68 فیصد تک کمی آتی ہے، اور اس کے نتیجے میں ہماری توجہ مرکوز کرنے کی صلاحیت میں اضافہ ہوتا ہے۔

یہ تحقیق 2009 میں برطانیہ کی Sussex یونیورسٹی نے کی تھی، جس میں یہ کہا گیا تھا کہ کتابوں کا مطالعہ خیالات کو بھٹکنے سے روکنے کے علاوہ ہمارے تخیل کو بھی متحرک کرتا ہے، جو کہ ذہن کو تازہ اور مضبوط کرتا ہے۔ دیگر ماہرین کا بھی کہنا ہے کہ مطالعہ ذہنی افعال کو بہتر بنانے کے لیے بہت مؤثر ہے، اور یہ عادت ذہن کو متحرک رکھتی ہے اور تجزیے کی صلاحیت کو بڑھاتی ہے۔

ماہرین کے مطابق، اگر آپ اسمارٹ فون کی لت پر قابو پانا چاہتے ہیں، تو مطالعہ ایک اچھا طریقہ ثابت ہو سکتا ہے۔ کم از کم 30 منٹ سے ایک گھنٹہ تک روزانہ کتابوں کا مطالعہ کرنے سے ذہن کو فوائد حاصل ہوتے ہیں اور اس سے اسمارٹ فون کی غیر ضروری استعمال کی خواہش پر قابو پایا جا سکتا ہے۔