Category: کھیل

دبئی :فاسٹ بالر حارث رؤف ٹی ٹونٹی کرکٹ کے ٹورنامنٹس میں 50وکٹیں لینے والے پہلے پاکستانی بالر بن گئے۔انہوں نے یہ اعزاز بنگلہ دیش کے خلاف حاصل کیا۔ واضح رہے کہ یہ ٹی 20 وکٹیں نہیں بلکہ ملٹی نیشنل ٹورنامنٹس کی وکٹیں ہیں۔ حارث نے سنگ میل 32میچوں میں عبور کیا ہے ۔

دبئی : پاکستان کرکٹ ٹیم کے کپتان سلمان آغا نے کہا ہے کہ ہمار ہدف ایشا کپ جیتنا، بھارتی میڈیا کیا کہہ رہا پرواہ نہیں۔یواے ای کے شہر دبئی میں پریس کانفرنس کرتے ہوئے سلمان علی آغا کا کہنا تھا کہ پچھلے میچز میں توقعات کے مطابق کارکردگی نہیں دکھا سکے، ہو سکتا ہے کھلاڑیوں نے اپنی بہترین کارکردگی فائنل کے لیے بچا کر رکھی ہو۔اُنہوں نے کہا کہ بھارتی میڈیا کیا کہہ رہا ہے، اس سے کوئی غرض نہیں، ہماری ساری توجہ اپنی کارکردگی پر ہے، ایشیا کپ فائنل کیلئے تیار رہیں، اُمید ہے اچھے نتائج دیں گے، انشااللہ کل پاکستان کو جیتتے ہوئے دیکھیں گے۔قومی ٹیم کے کپتان کا کہنا تھا کہ ہماری کوشش ہے کہ اپنی بہترین کرکٹ کھیلیں ، اگرچالیس اوور تک پلان پرعمل کیا توکسی ٹیم کو بھی ہرا سکتے ہیں، صائم ایوب اگلے دس سال تک ٹیم کے کام آ سکتا ہے، صائم نے فیلڈنگ اور بولنگ میں اچھی پرفارمنس دی، توقع ہے صائم فائنل میں اچھی بیٹنگ کریں گے۔سلمان آغا نے کہا کہ گراؤنڈ سے باہر کی چیزوں کو کنٹرول نہیں کرسکتے ،ہمارا ہدف ایشیاکپ جیتنا ہے، اِسی کے لیے میدان میں اتریں گے، کبھی نہیں دیکھا کہ دوٹیموں میں ہینڈ شیک نہ ہوا ہو، کبھی میرے والد نے بھی ایسی بات نہیں بتائی کہ ہینڈشیک نہیں ہوا، پہلے بھی پاک بھارت میچز ہوئے، حالات خراب ہونے کے باوجود ہینڈشیک ہوئے، ہینڈ شیک نہ ہونا کرکٹ کے لیے اچھا نہیں ۔انہوں نے کہا کہ پہلے سپنرز کو زیادہ مدد مل رہی تھی ،اسی لیے سپنرز پر زیادہ انحصار کیا، اگرکوئی گراؤنڈ میں جارحانہ انداز دکھانا چاہتا ہے کوئی مسئلہ نہیں ، فاسٹ بولرز سے اگر اُس کا جارحانہ پن چھین لیں تو کچھ بچتا ہی نہیں، ہر کھلاڑی کو پتہ کہ جذبات کو کیسے قابو رکھنا ہے، ہرکھلاڑی کو جذبات کے اظہار کا حق ہے بس کسی کی توہین نہ کرے۔

لاہور: پاکستان فٹبال فیڈریشن (پی ایف ایف) نے اے ایف سی ایشین کپ کوالیفائر کے لیے قومی ٹیم کے دو سابق کپتانوں کلیم اللہ اور صدام حسین کو ایک اور موقع دینےکا فیصلہ کیا ہے۔قومی ٹیم کے ہیڈ کوچ نولبرٹو سولانو دونوں سینئر کھلاڑیوں کو پرکھنے پر رضا مند ہوگئے ہیں اور دونوں کھلاڑیوں کو افغانستان کے خلاف میچ کے لیے ممکنہ پلیئرز کی فہرست میں شامل کرلیا گیا ہے۔پاکستان اور افغانستان کے درمیان ایشین کپ کوالیفائر راؤنڈ تھری کا میچ 9 اکتوبر کو کھیلا جائے گا جس کے لیے پاکستان ٹیم منiجمنٹ نے 12 اوور سیز پلیئر سمیت 37 ممکنہ کھلاڑیوں کی فہرست تیار کرلی ہے۔افغانستان کے خلاف پاکستان کے ممکنہ کھلاڑیوں کا تربیتی کیمپ اگلے ہفتے شروع ہونے کا امکان ہے جب کہ ممکنہ کھلاڑیوں کی فہرست سے گول کیپر یوسف بٹ کو ڈراپ کردیا گیا ہے۔میلبرن سٹی کی نمائندگی کرنے والے احمد فراز گلزاری بھی ممکنہ کھلاڑیوں میں شامل ہیں جب کہ ویلز کے رہکسم اے ایف سی میں کھیلنے والے عمر نواز کو بھی قومی فٹبال سکواڈ میں شامل کیا گیا ہے۔ عمر نواز سانحہ اے پی ایس کے متاثر احمد نواز کے بھائی ہیں۔عادل نبی، اعتزاز حسین اور حارث زیب بھی پہلی بار پاکستان فٹبال سکواڈ میں شامل ہیں، آؤٹس خان کو بھی قومی فٹبال سکواڈ میں شامل کیا گیا ہے۔

دبئی:ٹی20 ایشیا کپ میں سپر فور مرحلے کے اہم میچ میں بنگلادیش کو 11 رنز سے ہرا کر پاکستان فائنل میں پہنچ گیا، اتوار کو بھارت سے ٹاکرا ہوگا۔ایشین کرکٹ چیمپئن پاکستان بنے گا یا بھارت، فیصلہ اتوار 28 ستمبر کو دبئی میں ہوگا۔پاکستان اور بھارت ایشیا کپ کی تاریخ میں پہلی بار فائنل میں مدمقابل آئیں گے ۔ایشیا کپ کے اب تک 41 سال میں ہونے والے 17 ایڈیشنز میں پاکستان اور بھارت کبھی فائنل میں آمنے سامنے نہیں آسکے تھے ۔بھارت 11 مرتبہ فائنل میں پہنچا تو پاکستان نے 5 بار فائنل کھیلا لیکن ایک دوسرے کے سامنے نہ آسکے ۔بھارت نے سب سے زیادہ 8، سری لنکا نے 6 اور پاکستان نے صرف 2 بار ایشیا کپ کرکٹ کا ٹائٹل جیتا۔ تین بار پاکستان فائنل میں شکست سے دوچار ہوا، پاکستان نے آخری مرتبہ 2012ء میں ایشیا کپ کی حکمرانی حاصل کی تھی۔ایشیا کپ میں پاکستان اور بھارت اب تک 10 مرتبہ مدمقابل آچکے ہیں، 8 میں بھارت نے کامیابی حاصل کی اور 2 بار پاکستان کامیاب ہوا۔یاد رہے کہ ایشیا کپ 2025 میں پاکستان کا روایتی حریف بھارت کے ساتھ دو بار مقابلہ ہوا ہے اور دونوں میں اسے شکست کا سامنا کرنا پڑا تھا۔ دبئی کرکٹ سٹیڈیم میں جمعرات کو کھیلے گئے میچ میں بنگلادیش کی ٹیم 136 رنز کاتعاقب کرتے ہوئے مقررہ اوورز میں 9 وکٹوں کے نقصان پر 124 رنز بنا سکی۔بنگلادیش کی جانب سے شمیم حسین 30 رنز بنا کر نمایاں رہے ۔ پاکستان کی جانب سے شاہین شاہ آفریدی اور حارث رؤف نے 3، 3 جبکہ صائم ایوب نے 2 اور محمد نواز نے 1 وکٹ حاصل کی۔اس سے قبل بنگلادیش کی دعوت پر قومی ٹیم نے پہلے بیٹنگ کرتے ہوئے مقررہ 20 اوورز میں 8 وکٹوں کی نقصان پر 135 رنز سکور کیے ۔پاکستان کی جانب سے محمد حارث 31 رنز بنا کر نمایاں رہے ۔ محمد نواز 25، شاہین شاہ آفریدی 19، کپتان سلمان علی آغا 19، فخر زمان 13، صاحبزادہ فرحان 4 اور حسین طلعت 3 رنز کے انفرادی سکور پر آؤٹ ہوئے ۔بنگلادیش کی جانب سے تسکین احمد نے 3، رشاد حسین اور مہدی حسن نے 2، 2 اور مستفیض الرحمن نے 1 وکٹ حاصل کی۔شاہین شاہ آفریدی کو آل راؤنڈ پرفارمنس پر پلیئر آف دی میچ قرار دیا گیا۔

دبئی: ٹی 20 ایشیا کپ کے سپرفور مرحلے کے آخری میچ میں سری لنکا نے بھارت کیخلاف ٹاس جیت کر پہلے فیلڈنگ کا فیصلہ کیا ہے۔دبئی انٹرنیشنل کرکٹ سٹیڈیم میں ہونیوالے میچ میں سری لنکا کے کپتان چارتھ اسالنکا نے ٹاس جیت کر بھارتی کپتان سوریا کمار یادیو کو پہلے بیٹنگ کی دعوت دی ہے۔بھارتی ٹیم میں 2 تبدیلیاں کی گئی ہیں، جسپریت بمرا اور شیوم دوبے کی جگہ ارشدیپ سنگھ اور شرشیت رانا کو پلیئنگ الیون میں شامل کیا گیا ہے۔دوسری طرف سری لنکن ٹیم میں ایک تبدیلی کی گئی ہے، کرونارتنے کی جگہ لیانگے کو شامل کیا گیا ہے، دونوں ٹیموں کا ایونٹ میں یہ پہلا مقابلہ ہے۔بھارت نے سپر فور مرحلے میں اپنے دو میچز میں پاکستان اور بنگلادیش کو شکست دی ہے اور فائنل میں پہنچ گیا ہے جبکہ سری لنکا کو اپنے دو میچز میں پاکستان اور بنگلادیش کے ہاتھوں شکست کا سامنا کرنا پڑا ہے اور ایونٹ سے باہر ہوچکی ہے۔ایونٹ کا فائنل اتوار 28 ستمبر کو پاکستان اور بھارت کے درمیان دبئی میں کھیلا جائے گا۔