لاہور:پاکستانی ٹیسٹ سکواڈ کیمپ میں شریک 4 پلیئرز ڈومیسٹک کرکٹ کیلئے ریلیز کردیا گیا۔ذرائع کے مطابق پاکستانی ٹیسٹ سکواڈ کیمپ میں شریک محمد رضوان، حسن علی، سلمان علی آغا اور ساجد خان کو ریلیز کردیا گیا ہے۔چیئرمین پاکستان کرکٹ بورڈ محسن نقوی کی ہدایت پر چاروں کھلاڑیوں کو جنوبی افریقہ سے سیریز سے قبل فرسٹ کلاس فارمیٹ کھیلنے کا موقع فراہم کیا گیا ہے ۔پاکستانی ٹیسٹ سکواڈ میں شامل چاروں کھلاڑی جنوبی افریقہ سے سیریز سے پہلے قائد اعظم ٹرافی کے میچز کھیلیں گے اور پہلے ٹیسٹ سے قبل ٹیم کو جوائن کرینگے ۔ذرائع کے مطابق محمد رضوان اور ساجد خان قائد اعظم ٹرافی میں پشاور، حسن علی سیالکوٹ اور سلمان علی آغا لاہور وائٹس کی نمائندگی کر ینگے ، محمد رضوان فرسٹ کلاس میچ کھیلنے پشاور روانہ ہوگئے ہیں ،یاد رہے قائداعظم ٹرافی کا میچ پشاور اور سیالکوٹ ریجن کے درمیان 6 اکتوبر کو پشاور میں شیڈول ہے جبکہ پاکستان اور جنوبی افریقہ کی ٹیموں کے درمیان پہلا ٹیسٹ میچ 12 اکتوبر سے لاہور کے قذافی سٹیڈیم میں کھیلا جائے گا۔
Category: کھیل
-
محمد رضوان ٹریننگ کیمپ چھوڑ کر فرسٹ کلاس میچ کھیلنے پشاور روانہ
لاہور: ڈومیسٹک کرکٹ کو عزت ملنے لگی، محمد رضوان ٹریننگ کیمپ چھوڑ کر فرسٹ کلاس میچ کھیلنے پشاور روانہ ہوگئے۔پاکستان کرکٹ بورڈ(پی سی بی ) ذرائع کے مطابق محمد رضوان نے ٹیم مینجمنٹ کو فرسٹ کلاس میچ کھیلنے کی درخواست کی، وہ جنوبی افریقہ سیریز سے قبل فرسٹ کلاس میچ کھیلنا چاہتے تھے۔ذرائع نے بتایا کہ محمد رضوان کو ٹیم مینجمنٹ نے فرسٹ کلاس میچ کھیلنے کی اجازت دے دی جو اب پشاور کی نمائندگی کریں گے۔یاد رہے قائداعظم ٹرافی کا میچ پشاور اور سیالکوٹ ریجن کے درمیان 6 اکتوبر کو پشاور میں شیڈول ہے۔
-
آئی ایل ٹی 20پلیئرز آکشن میں نسیم شاہ و حسن نواز بھی منتخب
دبئی :انٹرنیشنل لیگ ٹی 20 پلیئرز آکشن میں پاکستان کے نسیم شاہ اور حسن نواز کو سائن کر لیا گیا۔ڈیزرٹ وائپرز نے نسیم شاہ کو 80 ہزار جبکہ حسن نواز کو 40 ہزار ڈالرز کے عوض سائن کیا ہے ۔ ایونٹ میں پاکستانی کھلاڑیوں کی شمولیت اجازت نامے کے اجراء سے مشروط کی گئی ہے ۔
-
کرکٹرز کے این او سی ،کرکٹ آسٹریلیا کا پی سی بی سے رابطہ
لاہور:کرکٹ آسٹریلیا کے سی ای او ٹوڈ گرین برگ نے امید ظاہر کی ہے کہ پاکستانی کرکٹرز کو رواں برس بھی بگ بیش لیگ (بی بی ایل) میں کھیلنے کا موقع ملے گا۔ ٹوڈ گرین برگ نے پی سی بی کی جانب سے کھلاڑیوں کے این او سی روکے جانے پر اپنے بیان میں کہاکہ پاکستان کرکٹ بورڈ سے کھلاڑیوں کے این او سی روکنے کے فیصلے پر بات کی ہے ۔انہوں نے کہا کہ گزشتہ چند روز سے پی سی بی کے ساتھ رابطے میں ہیں، امید ہے کہ اس کا ہم کوئی حل نکال لیں گے ، بی بی ایل کا یہ شاندار سیزن ثابت ہوگا۔ٹوڈ گرین برگ کا کہنا تھا کہ ہم کھلاڑیوں کو بگ بیش لیگ میں خوش آمدید کہنے کے منتظر ہیں، ہمیں یقین ہے کہ پاکستانی کھلاڑی بی بی ایل کے ویلیو میں اضافہ کریں گے ۔واضح رہے کہ چند روز قبل پی سی بی نے اپنے کھلاڑیوں کے غیر ملکی لیگز کے لیے این او سی ہولڈ کر لئے ہیں۔اس بارے میں ذرائع کا بتانا ہے کہ پی سی بی این او سی ان ہی کھلاڑیوں کو دے گا جو بین الاقوامی اور ڈومیسٹک کرکٹ میں کارکردگی کے معیار پر پورا اتریں گے ۔پاکستان کی طرف سے بابراعظم، شاہین آفریدی،حارث رؤف اور شاداب خان سمیت 7 پاکستانی بی بی ایل کا حصہ ہیں اور لیگ کا آغاز دسمبر میں ہوگا۔
-
ایشیاکپ،ڈی ویلیئرز کوبھارتی کرکٹرز کے رویے پر افسوس
جوہانسبرگ:جنوبی افریقاکی کرکٹ ٹیم کے سابق مایہ ناز وکٹ کیپر بلے باز اے بی ڈی ویلیئرز نے ایشیا کپ 2025 کے فائنل کے بعد پیدا ہونے والی صورتحال اور بھارتی کھلاڑیوں کے رویے پر افسوس کا اظہار کیا ہے۔ اپنے یوٹیوب چینل پر گفتگو کرتے ہوئے انہوں نے کہا کہ سیاسی معاملات کا کھیل پر اثرانداز ہونا انتہائی افسوسناک ہے ۔لیجنڈ اے بی ڈی ویلیئرز نے کہا کہ کھیل کو سیاست سے دور رکھا جائے ،بھارتی ٹیم کا اختتامی تقریب میں رویہ کھیل میں نہیں آنا چاہیے ۔ کھیل میں جیت کے جشن کو اس کی اصل روح کے ساتھ منایا جانا چاہیے ، سیاست کا اس میں کوئی دخل نہیں ہونا چاہیے ۔ یہ سب دیکھ کر بہت افسوس ہوا۔انہوں نے کہا کہ دونوں ٹیموں کے درمیان یہ صورتِ حال کھلاڑیوں کو مشکل پوزیشن میں لے آئی جسے دیکھ کر وہ افسوس کا اظہار کرتے ہیں۔ایشیا کپ کے فائنل میں بھارتی کھلاڑیوں کا مصافحہ نہ کرنا اور باہمی رویہ پر سوشل میڈیا پر خاصی بحث ہوئی۔ڈی ویلیئرز نے اس تنازع کے باوجود بھارتی ٹیم کی کارکردگی کو سراہا اور کہا کہ بھارت کی ٹی20 ٹیم آئندہ سال ورلڈ کپ سے پہلے انتہائی مضبوط نظر آ رہی ہے ۔ ان کے مطابق بھارتی ٹیم بڑے ٹورنامنٹس میں کھیلنے میں مہارت رکھتی ہے ۔
-
انٹرنیشنل لیگ ٹی 20نیلامی میں فخر زمان توجہ کا مرکز
دبئی:انٹرنیشنل لیگ ٹی 20 کے سیزن 4 کی تاریخ ساز نیلامی دبئی میں منعقد ہوگی جس میں دنیا بھر سے تقریبا 300 کھلاڑی حصہ لیں گے ۔اس نیلامی میں پاکستان کے فخر زمان، بھارت کے روی چندرن ایشون، انگلینڈ کے جیسن رائے اور بنگلادیش کے شکیب الحسن نمایاں ناموں میں شامل ہیں۔نیلامی میں 80ہزار ڈالرز کے زمرے میں پاکستان کے فخر زمان، صائم ایوب، محمد نواز اور فاسٹ بولرز نسیم شاہ و فہیم اشرف شامل ہیں۔
-
بی سی سی آئی سے معافی مانگی نہ مانگوں گا :محسن نقوی
لاہور:ایشین کرکٹ کونسل کے صدر ، چیئرمین پی سی بی محسن نقوی نے کہا ہے کہ بھارتی میڈیا حقائق پر نہیں جھوٹ پر چلتا ہے ، میں نے کوئی غلط کام نہیں کیا ، بی سی سی آئی سے معافی مانگی اور نہ ہی مانگوں گا ۔ اپنے ٹویٹ میں محسن نقوی نے کہا کہ بطور صدر اے سی سی میں اسی روز ٹرافی دینے کے لئے تیار تھا اور آج بھی تیار ہوں اگر و ہ واقعی اسے چاہتے ہیں تو خوش آمدید ،آئیں اور اے سی سی کے دفتر سے مجھ سے لے جائیں ۔ انہوں نے کہا کہ بدقسمتی سے بھارت کرکٹ میں بھی سیاست کو گھسیٹ رہا ہے جو کھیل کی روح کو نقصان پہنچا رہا ہے ۔ محسن نقوی نے ایک بار پھر بھارتی کپتان کو دفتر آکر ٹرافی لے جانے کی دعوت دے دی۔ بھارتی میڈیا کی جانب سے یہ خبر سامنے آئی تھی کہ صدر ایشن کرکٹ کونسل محسن نقوی نے ایشیا کپ کی ٹرافی کے معاملے پر بی سی سی آئی سی سے غلطی مانتے ہوئے معافی مانگ لی ہے ۔ ان کا کہنا تھا کہ بھارتی میڈیا کا کام صرف اپنے لوگوں کو بیوقوف بنانا ہے ، بدقسمتی سے بھارت کرکٹ میں سیاست لے کر آیا اور کھیل کی ساکھ کو متاثرکیا۔
-
ٹی ٹونٹی رینکنگ،صائم نے پانڈیا سے پہلی پوزیشن چھین لی
دبئی:انٹرنیشنل کرکٹ کونسل نے ٹی ٹونٹی پلیئرز کی رینکنگ جاری کر دی، پاکستان کے صائم ایوب نمبر ون ٹی ٹونٹی آل راؤنڈر بن گئے ۔صائم ایوب 4درجہ بہتری کے بعد پہلے نمبر پر آگئے ، انہوں نے بھارت کے ہاردیک پانڈیا سے پہلی پوزیشن حاصل کی ہے ۔ہاردیک پانڈیا ٹی ٹونٹی آل راؤنڈر رینکنگ میں دوسرے نمبر پر چلے گئے جبکہ محمد نواز 4درجے ترقی کے بعد 13ویں اور فہیم اشرف 4درجے بہتری کے بعد 35ویں نمبر پر آ گئے ۔ٹی ٹونٹی بالرز کی رینکنگ میں ورون چکرورتھی کا پہلا نمبر برقرار ہے جبکہ پاکستان کے ابرار احمد 3درجے تنزلی کے بعد 7ویں نمبر پر چلے گئے ۔بھارت کے کلدیپ یادیو 9درجے بہتری کے بعد 12ویں اور پاکستان کے شاہین آفریدی 12درجے ترقی کے بعد 14ویں نمبر پر آگئے جبکہ سفیان مقیم 3درجے تنزلی کے بعد 19 ویں نمبر پر چلے گئے ۔بھارت کے جسپریت بمرا 12درجے بہتری کے بعد 29ویں نمبر پر آگئے اور پاکستان کے حارث رؤف 5درجہ تنزلی کے بعد 33ویں پوزیشن پر آگئے ہیں۔ٹی ٹونٹی بیٹرز کی رینکنگ میں بھارت کے ابھیشک شرما کا پہلا نمبر برقرار ہے جبکہ سری لنکا کے پاتھم نسانکا 2درجے ترقی کے بعد پانچویں نمبر پر آگئے ، بھارتی کپتان سوریا کمار یادیو کی دو درجے تنزلی ہوئی ہے ، وہ 8ویں نمبر پر چلے گئے ہیں جبکہ پاکستان کے صاحبزادہ فرحان 11درجے لمبی چھلانگ کے بعد 13ویں نمبر پر براجمان ہیں۔علاوہ ازیں بابر اعظم 2درجے تنزلی کے بعد 37ویں اور محمد رضوان 3درجے تنزلی کے بعد 41ویں نمبر پر چلے گئے ہیں۔
-
بورڈ کو ایسے ہی ریلو کٹے چاہیے ، تگڑے پلیئرنہیں:شعیب اختر
لاہور:ایشیا کپ فائنل میچ میں بھارت کے ہاتھوں شکست پر شعیب اختر نے پاکستان ٹیم کی بڑی غلطیوں کی نشاندہی کردی۔ایک انٹرویو میں انہوں نے بتایا کہ پاکستان ٹیم کا مڈل آرڈر گزشتہ کافی عرصے سے اچھی کارکردگی کا مظاہرہ نہیں کرپا رہا جس کی شدید ضرورت ہے۔پہلے بھی کہا تھا کہ حسن نواز اور کسی فاسٹ بالر کو بھی لازمی کھلائیں۔شعیب اختر نے کہا کہ پاکستان ٹیم نے سٹارٹ اچھا کیا لیکن مڈل آڈر بیٹسمین توقعات پر پورا نہ اتر سکے ، ورنہ بھارت کو 170 یا 175 کا ہدف باآسانی دے سکتے تھے اور جب سپنرز بالنگ کررہے تھے تو کپتان کو انہیں ہٹانا نہیں چاہیے تھا۔انہوں نے کہا کہ وکٹ بڑی اچھی تھی، لیکن کھلاڑیوں کے پاس کوئی گیم پلان نہیں تھا۔ پاکستان نے شروع میں بھارت کو گردن سے پکڑ لیا تھا اور بھارتی ٹیم واضح دباؤ میں دکھائی دے رہی تھی۔ شعیب اختر نے کہا کہ قصور ان کا نہیں ان کو لانے والوں کا ہے ، کیونکہ جب آپ معمولی یا اوسط درجے کے کھلاڑیوں کو آگے لائیں گے تو ایسے ہی نتائج سامنے آئیں گے ۔ بدقسمتی سے ہمارے بورڈ کو ایسے ہی ریلو کٹے چاہیے ، تگڑے کھلاڑی نہیں۔ ہمارے ہاں سٹرائیک ریٹ کا مسئلہ 15 سال سے ہے ۔سابق کرکٹر نے کہا کہ ہمارا ڈومیسٹک سٹرکچر تباہ و برباد ہوچکا ہے ۔
-
بھارت کو ٹرافی چاہیے تو دفتر آکر وصول کرلے :نقوی
دبئی:ایشین کرکٹ کونسل کے صدر اور پاکستان کرکٹ بورڈ کے چیئرمین محسن نقوی نے کہا ہے کہ بھارت کو اگر ایشیا کپ کی ٹرافی چاہیے تو میرے دفتر آکر وصول کرلے۔ایشین کرکٹ کونسل کا اجلاس دبئی میں محسن نقوی کی زیر صدارت ہوا جس میں پی سی بی اور بھارتی کرکٹ بورڈ کے حکام آمنے سامنے آگئے ۔ذرائع کے مطابق اجلاس میں بھارتی کرکٹ بورڈ کے نائب سربراہ راجیو شکلا نے ایشیا کپ کی ٹرافی دینے کا مطالبہ کیا تو اے سی سی کے صدر محسن نقوی نے یاددہانی کرائی کہ اجلاس کے ایجنڈے میں یہ معاملہ شامل نہیں ہے ۔راجیو شکلا کو بتایا گیا کہ ایشیا کپ کے فائنل کے بعد صدر محسن نقوی سٹیڈیم میں موجود تھے مگر بھارتی کرکٹ ٹیم نے خود ہی ٹرافی لینے سے انکار کیا۔اجلاس میں چیئرمین پی سی بی محسن نقوی نے کہا کہ اگر بھارت کو ٹرافی چاہیے تو ایشین کرکٹ کونسل کے دفتر یا پھر کوئی تقریب منعقد کر کے مجھ سے ٹرافی وصول کرلے ۔اجلاس کے شرکا نے بھارتی کپتان سوریا کمار یادیو کے ہاتھ نہ ملانے اور میچ کے بعد سیاسی بیانات دینے کی مذمت بھی کی۔