اسلام آباد: ڈاکٹر طارق فضل چودھری نے وفاقی وزیر برائے پارلیمانی امور کا عہدہ سنبھال لیا۔سیکرٹری وزارت پارلیمانی امور، افسران اور عملے نے وفاقی وزیر کا پرتپاک استقبال کیا، ڈاکٹر طارق فضل چودھری وزارت کے اہم امور کی نگرانی کریں گے۔ڈاکٹر طارق فضل چودھری نے کہا کہ ایگزیکٹو اور پارلیمنٹ کے درمیان موثر ہم آہنگی کو یقینی بناؤں گا، قانون سازی کے عمل کے ایک سازگار ماحول کو فروغ دیں گے۔ وفاقی وزیر برائے پارلیمانی امور نے کہا کہ جمہوری اداروں کو مضبوط بنانے اور پارلیمانی امور کی کارکردگی کو بہتر بنانے کا پختہ عزم کر رکھا ہے۔

حکومت نے عید الفطر پر ٹرینوں کے کرایوں میں کمی کا اعلان کردیا، وفاقی وزیر ریلوے حنیف عباسی کا کہنا ہے کہ عید الفطر کیلئے 25 رمضان سے 4 خصوصی ٹرینیں چلائیں گے۔وفاقی وزیر ریلوے حنیف عباسی نے پارلیمنٹ ہاؤس کے باہر میڈیا سے گفتگو کرتے ہوئے کہا کہ عیدالفطر پر ٹرینوں کے کرایوں میں کمی کریں گے، 25 رمضان المبارک سے 4 خصوصی عید ٹرینیں چلارہے ہیں۔ان کا کہنا ہے کہ ریلوے کی آمدنی میں اضافے اور اخراجات میں کمی لائی جائے گی، ریلوے کارکردگی کا تسلسل برقرار رکھتے ہوئے مزید ترقی کرے گی، مسافروں کے جان و مال کے تحفظ کو یقینی بنایا جائے گا۔وفاقی وزیر کا کہنا تھا کہ ہم کارگو کی طرف آرہے ہیں، کارگو کے نظام کو مزید وسعت دیں گے، کارگو کے بارے میں تفصیلی گفتگو کی گئی۔انہوں نے کہا کہ میں نے جو وعدہ کیا وہ پورا کرکے دکھاؤں گا، وزیراعظم بھی وعدہ پورا کررہے ہیں، شرح سود سنگل ڈیجٹ پر آگیا ہے، ترسیلات زر 3 ارب 80 کروڑ سے 18 ارب ڈالر تک پہنچ گئیں، ترسیلات زر 33 ارب تک پہنچانا ہے۔حنیف عباسی کا کہنا ہے کہ ریلوے کو صاف ستھرا ادارہ بنادیں گے، ہم کارگو کا ہدف ڈبل کررہے ہیں، ایم ایل ون پر روس، کوریا، یو اے ای کے ساتھ بات چل رہی ہے، ابھی حتمی فیصلہ نہیں ہوا کہ ایم ایل ون کس کو دینا ہے۔وفاقی وزیر ریلوے نے کہا کہ سابق حکومتوں کی نااہلی سے سی پیک کو پیک کردیا گیا، ریلوے کی سیکیورٹی اچھی نہیں ہے، رائے طاہر اچھے پولیس افسر ہیں انہیں ٹاسک دیدیا ہے۔

لاہور: انسداد دہشت گردی عدالت نے سانحہ نومئی، عسکری ٹاور حملہ اور تھانہ شادمان نذر آتش سمیت چار مقدمات کے جیل ٹرائل بارے سماعت کی۔عدالت نے تین مقدمات میں پی ٹی آئی رہنماؤں پر ترمیمی فرد جرم عائد کر دی، ملزمان پر عسکری ٹاور حملہ،زمان پارک اور جناح ہاؤس کے قریب پولیس کی گاڑیاں جلانے کے مقدمات میں فرد جرم عائد کی گئی۔ڈاکٹر یاسمین راشد سمیت دیگر ملزمان نے صحت جرم سے انکار کیا، عدالت نے 13 مارچ کو ملزمان کے خلاف گواہان کو طلب کر لیا، آئندہ سماعت پر تھانہ شادمان نذر آتش کیس میں ترمیمی فرد جرم عائد ہو گی۔انسداد دہشتگردی عدالت کے ایڈمن جج منظر علی گل نے کوٹ لکھپت جیل میں سماعت کی، عدالت نے پراسکیوشن کی مقدمات میں فرد جرم میں ترمیم کی درخواست منظور کر رکھی ہے ،پراسکیوشن نے تمام الزامات اور دفعات کے لحاظ سے دوبارہ فرد جرم عائد کرنے کی استدعا کی ہے۔عدالت نے پراسکیوشن کو فرد جرم مین ترمیم کی اجازت دے دی، خدیجہ شاہ اور صنم جاوید سمیت دیگر برضمانت ملزمان پیش ہوئے، شاہ محمود قریشی اور ڈاکٹر یاسمین راشد سمیت دیگر زیر حراست ملزمان کی حاضری مکمل کی گئی۔ملزمان کی جانب سے رانا مدثر عمر ایڈووکیٹ اور برہان معظم ملک ایڈووکیٹ پیش ہوئے، مقدمہ کے برضمانت ملزمان میں صنم۔جاو، عالیہ حمزہ ، طیبہ راجہ، خدیجہ شاہ اور روبینہ جمیل سمیت دیگر شامل ہیں۔واضح رہے پی ٹی آئی رہنماؤں پر کارکنان کو نو مئی بغاوت اور فسادات پر اکسانے کا الزام ہے۔

اسلام آبادہائی کورٹ نے گستاخانہ مواد پھیلانے پر پیکا ایکٹ کے تحت درج مقدمے میں گرفتار ملزم بابر خورشید کی درخواستِ ضمانت مسترد کر دی۔اسلام آباد ہائی کورٹ کے جسٹس محمد اعظم خان نے گستاخانہ کیس کے ملزم کی ضمانت کی درخواست مسترد کی۔عدالت نے ضمانت مسترد کرنے کی وجوہات کے ساتھ 4 صفحات پر مشتمل تحریری فیصلہ بھی جاری کیا ہے۔یاد رہے کہ ایف آئی اے نے گستاخانہ مواد کی تشہیر پر پیکا ایکٹ کے سیکشن 11 کے تحت مقدمہ درج کیا تھا۔

خیبر: پاک افغان طورخم گزرگاہ کھلوانے کے لیے دونوں ممالک کے مشترکہ جرگے میں سیز فائر پر اتفاق ہوگیا۔ ذرائع کے مطابق طورخم گزرگاہ پر جاری کشیدگی کم کرانے اور گزرگاہ کھلوانے کے لیے پاک افغان عمائدین پر مشتمل جرگہ ہوا جس میں 11 مارچ تک فائر بندی پر اتفاق کیا گیا ہے۔ جرگہ ذرائع نے بتایا کہ 11 مارچ تک سرحد کے دونوں جانب تعمیرات پر پابندی ہوگی، جرگہ ممبران 11 مارچ کو افغان فورسز کی متنازع تعمیرات کا جائزہ لیں گے اور سرحد سے متصل تعمیرات کے تنازع حل ہونے پرطورخم بارڈر کھولا جائےگا۔ دوسری جانب کسٹم حکام کا کہنا ہے کہ پاک افغان طورخم گزرگاہ آج 17ویں روز بھی بند ہے اور طورخم تجارتی گزرگاہ بند ہونےسے یومیہ 3ملین ڈالر کانقصان ہوتاہے۔ کسٹم حکام کے مطابق طورخم گزرگاہ سے یومیہ 10ہزارافراد کی آمدورفت ہوتی ہے۔

کراچی: نئی متوقع امریکی سفری پابندیوں کی فہرست میں پاکستان کے شامل نہ ہونے کا امکان ہے ۔ اس سلسلے میں حتمی اعلان 13مارچ کو متوقع ہے جس میں12ممالک ممکنہ طور پر سفری پابندی کی زد میں رہیں گے جب کہ اس سلسلے میں امریکا میں پاکستانی سفارتی عملہ اور سرکردہ شخصیات پرامید ہیں۔ ایسے ہی ذرائع نے نام ظاہر نہ کرنے کی شرط پر بتایا کہ اس حوالے سے پاکستان کے خلاف زہریلے پروپیگنڈے کرنے میں بھارتی امریکن لابی انتہائی ملوث رہی ہے، اس کے ساتھ ہی پاکستانی امریکن ڈاکٹرز کا گروپ بھی سازشیں کر رہا ہے۔ تاہم حال ہی میں امریکا کو مطلوب ایک خطرناک دہشتگرد کی پاکستان میں گرفتاری اور امریکا کو حوالگی کے بعد ٹرمپ انتظامیہ اور پاکستانی اسٹیبلشمنٹ میں کافی قربت دیکھنے میں آئی ہے۔ ذرائع کے مطابق اس دوران پاکستانی اسٹیبلشمنٹ اور ٹرمپ انتظامیہ کے درمیان حالیہ رابطے میں سفری پابندیوں کی فہرست سب سے زیادہ زیر بحث رہی۔ سفارتی ذرائع کے مطابق ٹرمپ انتظامیہ کی جانب سے پاکستانی شہریوں پر امریکی سفری پابندیوں کے حوالے سے نرمی کا فیصلہ متوقع ہے۔ذرائع کے مطابق ٹرمپ انتظامیہ کی پالیسی کے مطابق آئندہ پاکستان سے زچگی کیلئے امریکا پہنچنے والی پاکستانی خواتین کی امریکی ائیرپورٹس پر سخت جانچ پڑتال اور ایسے کیسز کی حوصلہ شکنی کی جائے گی، ورک اور اسٹوڈنٹ ویزوں کے حامل پاکستانیوں کی بھی امریکا میں سخت چھان بین کی جائے گی۔اس کے علاوہ پاکستان سے امریکا جانے والی ایئر لائنز کیلئے ممکنہ طور پر نئی سفری ایڈوائزری جاری کی جا سکتی ہے۔

اسلام آباد: سپریم کورٹ میں سویلینز کے ملٹری ٹرائل کیس کے دوران جسٹس جمال مندوخیل نے کہا کہ مسئلہ یہ ہے کہ آرمی ایکٹ کے ماتحت جرائم اگر سویلینز کریں تو کیا ہو گا ؟سپریم کورٹ میں سویلینز کے ملٹری ٹرائل کے خلاف کیس کی سماعت جسٹس امین الدین خان کی سربراہی میں 7 رکنی بینچ نے کی۔ پاکستان تحریک انصاف (پی ٹی آئی) کے وکیل حامد خان نے دلائل دیئے۔جسٹس جمال مندوخیل نے ریمارکس دیئے کہ ایف بی علی کیس میں طے ہوا کہ آرمی ایکٹ فوج کے ممبران کے لیے بنا۔ اسی کیس میں یہ بھی کہا گیا کہ آرمی ایکٹ کا سیکشن ڈی اس مقصد کے لیے نہیں بنا۔انہوں نے کہا کہ اب تنازع یہ ہے کہ وہ کہہ رہے ایف بی علی کیس میں سویلینز کے ٹرائل کی اجازت تھی۔ اور آپ کہہ رہے ہیں کہ اجازت نہیں۔وکیل حامد خان نے کہا کہ فوجی عدالتوں کے حق میں دلائل دینے والوں کا انحصار آئین کے آرٹیکل 8 (3) پر ہے۔جسٹس محمد علی مظہر نے کہا کہ ایف بی علی میں کہا گیا کہ پارلیمان اس معاملے پر 2 سال میں ری ویو کر سکتی ہے۔ لیکن آج تک پارلیمان نے اس معاملے پر کچھ نہیں کیا۔جسس جمال مندوخیل نے ریمارکس دیئے کہ تنازع یہ نہیں کہ فوجی عدالتوں میں سویلین کا ٹرائل کیا جائے یا نہیں۔ بلکہ مسئلہ یہ ہے کہ آرمی ایکٹ کے ماتحت جرائم اگر سویلینز کریں تو کیا ہو گا ؟ آرمی ایکٹ میں درج جرائم کرنے پر اس کا دائرہ اختیار سویلینز تک بڑھایا جاسکتا ہے یا نہیں؟حامد خان نے کہا کہ آرمی ایکٹ میں شامل وہ شقیں جن کے تحت سویلین کا ٹرائل کیا جاتا ہے۔ وہ غیر آئینی ہیں۔ اب میں اپنے دلائل میں آئین کے آرٹیکل 175(3) کو بیان کروں گا۔ اور آئین میں واضح لکھا ہے کہ عدلیہ ایگزیکٹو سے الگ ہو گی۔جسٹس جمال مندوخیل نے استفسار کیا کہ آپ یہ بتائیں کہ عدلیہ کو ایگزیکٹو سے الگ کس نے کرنا تھا؟ اور آرٹیکل 175(3) کے تحت عدلیہ ایگزیکٹو سے خود بخود الگ تصور ہو گی؟ یا عدلیہ کے ایگزیکٹو سے الگ ہونے کی ڈیکلریشن عدلیہ دے گی یا پارلیمان ؟وکیل حامد خان نے کہا کہ آئین کے الفاظ واضح ہیں کہ پارلیمان کی ڈیکلریشن کی ضرورت نہیں۔جسٹس محمد علی مظہر نے کہا کہ اکثریتی فیصلے میں کہا گیا کہ۔ فوجی عدالتیں آرٹیکل 175(3) کے زمرے میں نہیں آتیں۔ اور سپریم کورٹ کے فیصلے میں فوجی عدالتوں کو تاریخی تناظر میں دیکھا گیا۔ جسٹس جمال مندوخیل نے کہا کہ آپ کے مطابق آرٹیکل 175(3) کے تحت عدلیہ خود بخود ایگزیکٹو سے الگ تصور ہو گی۔ اور اس کا مطلب ہے اس آرٹیکل کے 14 سال بعد فوجی عدالتیں فوجیوں کے لیے بھی نہیں رہ سکتیں۔حامد خان نے کہا کہ فوجی عدالتیں صرف فوج کے ممبران کے لیے قائم رہ سکتی ہیں۔جسٹس محمد علی مظہر نے ریمارکس دیئے کہ اگر ایسا ہے۔ تو پھر آپ کو یہ تسلیم کرنا پڑے گا کہ فوجی عدالتیں متوازی عدالتی نظام ہیں۔ اور یہ بہت اہم ہے کہ اس معاملے میں آرٹیکل 175(3) کو واضح ہونا ہو گا۔سویلینزکے ملٹری ٹرائل کے خلاف کیس کی سماعت کل صبح ساڑھے 11 بجے تک ملتوی کر دی گئی۔ وزارت دفاع کے وکیل خواجہ حارث کل اپنے دلائل دیں گے۔

پشاور: پشاور ہائی کورٹ نے مقدمات کی تفصیلات سے متعلق کیس میں فیصل جاوید کو حفاظتی ضمانت دیتے ہوئے 15 اپریل تک گرفتار نہ کرنے کا حکم دے دیا۔پشاور ہائی کورٹ میں پی ٹی آئی رہنما فیصل جاوید کی مقدمات کی تفصیلات کے لیے دائر درخواست پر سماعت جسٹس وقار احمد اور جسٹس ثابت اللّٰہ خان نے کی۔درخواست گزار کے وکیل نے کہا کہ آرڈر میں 15 اپریل درج ہے لیکن ایک کاپی میں 15 مارچ لکھا ہے۔ڈپٹی اٹارنی جنرل نے کہا کہ 5 مارچ کے عدالتی حکم میں واضح طور پر 15 اپریل درج ہے۔جسٹس وقار احمد نے ریمارکس دیے کہ درخواست گزار کی جانب سے لگائی گئی آرڈر کی کاپی میں فرق ہے۔ وکیل درخواست گزار نے کہا کہ فیصل جاوید عمرے کے لیے جا رہے ہیں، عدالتی حکم میں واپسی تک ضمانت دی گئی۔جسٹس وقار احمد نے کہا اگر ایسا ہے تو معاملہ واضح ہے، 15 اپریل تک حفاظتی ضمانت دیتے ہیں۔فیصل جاوید نے دوران سماعت کہا کہ میں عمرے کے لیے جا رہا ہوں اور ایک ہفتے میں واپس آ جاؤں گا۔جسٹس وقار احمد نے پی ٹی آئی رہنما کو مخاطب کر کے کہا کہ ڈپٹی اٹارنی جنرل صاحب کو آپ پر یقین نہیں، حکومت کو آپ سے اتنی محبت ہے کہ ملک سے باہر نہیں جانے دے رہی۔ ڈپٹی اٹارنی جنرل نے کہا ہم نے عدالتی احکامات کی مکمل تعمیل کی ہے، درخواست گزار کو گرفتار نہیں کر رہے۔ جسٹس وقار نے کہا عدالتی احکامات پرعمل ہوا، تبھی تو درخواست گزار عدالت میں موجود ہیں۔