Blog

لاہور: اسلام آباد کی ایک ڈسٹرکٹ اینڈ سیشن عدالت نے “آئینی ادارے کے خلاف تشدد پر اکسانے” کے الزام میں گرفتار کیے جانے والے پاکستان تحریک انصاف (پی ٹی آئی) کے رہنما فواد چوہدری کا 2 روزہ جسمانی ریمانڈ منظور کرلیا۔

جوڈیشل مجسٹریٹ نوید خان نے پولیس کی جانب سے 8 روزہ جسمانی ریمانڈ کی درخواست پر محفوظ شدہ فیصلہ سنایا۔ محفوظ شدہ فیصلے میں کہا گیا کہ فواد چوہدری کو 27 جنوری کو دوبارہ عدالت میں پیش کیا جائے۔

رہنما پی ٹی آئی کو 25 جنوری کی صبح حراست میں لیا گیا۔ ان کے خلاف اسلام آباد کے کوہسار تھانے میں الیکشن کمیشن آف پاکستان (ای سی پی) کے ایک اہلکار کی جانب سے انتخابی ادارے کے ارکان کو “دھمکی” دینے کے الزام پر ایف آئی آر درج کی گئی۔

اس سے قبل فواد چوہدری کے بھائی فیصل چوہدری نے فواد چوہدری کی گرفتاری کو غیر قانونی قرار دیتے ہوئے بتایا کہ فواد چوہدری کو صبح 5:30 بجے 4 گاڑیوں میں لے جایا گیا جن پر کوئی نمبر پلیٹ نہیں تھی۔ فیصل نے بتایا کہ اس وقت خاندان کو فواد کے مقام کا علم نہیں تھا۔

بعد ازاں پی ٹی آئی رہنما کو لاہور کینٹ کی عدالت لایا گیا جہاں جوڈیشل مجسٹریٹ نے پولیس فواد کا راہداری ریمانڈ منظور کر لیا۔ اسلام آباد پولیس نے فواد چوہدری کو جج نوید خان کے روبرو پیش کیا اور 8 روزہ جسمانی ریمانڈ کی استدعا کی۔

پراسیکیوٹر نے عدالت کو بتایا کہ حکام کو فواد چوہدری کا فون اور اس کا لیپ ٹاپ درکار ہے، انہوں نے مزید کہا کہ فوٹو گرافی میٹرک ٹیسٹ اور وائس میچ کرانے کے لیے پی ٹی آئی رہنما کی تحویل ضروری ہے۔

سماعت کے دوران الیکشن کمیشن کے وکیل سعد حسن نے ایف آئی آر کا متن پڑھ کر سنایا۔ انہوں نے کہا کہ پی ٹی آئی رہنما نے انتخابی نگران کو منشی (کلرک) قرار دیا ہے۔

وکیل نے دلائل دیتے ہوئے کہا کہ ای سی پی ایک آئینی ادارہ ہے، حکومت کی تبدیلی کا بیانیہ ایک سوچے سمجھے منصوبے کے تحت تشکیل دیا گیا تھا، فواد چوہدری نے دھمکی آمیز بیانات دے کر ای سی پی کی ساکھ کو نقصان پہنچایا۔

ان کا مزید کہنا تھا کہ فواد نے اپنے ریمارکس پر معافی نہیں مانگی اور وہ اب بھی اپنے بیان پر قائم ہیں، سیاستدان کے خلاف بہت سارے “الیکٹرانک ثبوت” موجود ہیں۔

پاکستان تحریک انصاف (پی ٹی آئی) کے سینیئر رہنما فواد چوہدری کو بدھ کی صبح لاہور سے گرفتار کیا گیا کیونکہ ان کے خلاف الیکشن کمیشن آف پاکستان (ای سی پی) کی جانب سے ادارے کے افراد کو دھمکیاں دینے کے الزام پر اسلام آباد کے کوہسار تھانے میں مقدمہ درج کیا گیا تھا۔

فواد چوہدری کو چند ہی گھنٹوں بعد لاہور کی عدالت میں پیش کیا گیا جہاں پولیس کو ہدایات جاری کی گئیں کہ انہیں طبی معائنے کے بعد اسلام آباد لے جایا جائے جہاں ان کے خلاف مقدمہ درج کیا گیا ہے۔
عدالت میں پیشی کے وقت فواد چوہدری نے صحافیوں کو بتایا کہ ان کے خلاف جو مقدمہ درج ہوا ہے اس پر انہیں فخر ہے۔
پی ٹی آئی رہنما کا مزید کہنا تھا کہ ’کہا جا رہا ہے میں نے بغاوت کی۔ نیلسن منڈیلا پر بھی یہی مقدمہ درج ہوا تھا۔‘

فواد چوہدری کی گرفتاری کے بعد پاکستان کے سوشل میڈیا پر ممتاز سیاسی اور میڈیا سے متعلق شخصیات کی جانب سے ملے جُلے تاثرات دیکھنے میں آ رہے ہیں۔
فواد چوہدری کے بیان پر شنیلا عمار نے ایک ٹویٹ میں لکھا ’یہ نیلسن منڈیلا بھی لوگوں کے خاندانوں کو دھمکیاں دیتا تھا؟‘

محمد عاصم نصیر نے ایک ٹویٹ میں لکھا کہ ’فواد چوہدری کو گرفتار کرنا عقل مندوں کے لیے نشانی ہے کہ بات بہت آگے جا چکی ہے۔ اب جو ریاست کی رٹ کو چیلنج کرے گا یا سیاسی و معاشی عدم استحکام کی جانب لے کر جائے گا وہ اپنی تیاری خود پکڑ لے کیونکہ اب وہ پکڑا جائے گا۔‘

حکومتی اتحاد کی سب سے بڑی جماعت پاکستان مسلم لیگ (ن) کے ٹوئٹر ہینڈل سے فواد چوہدری کا ویڈیو بیان شیئر کیا گیا جس میں وہ کہہ رہے ہیں کہ ’ہم الیکشن کمیشن اور ان کے ممبران کو، ان کے خاندانوں کو اور یہ جو لوگ ہیں ان کو خبردار کرتے ہیں کہ اگر ہمارے ساتھ زیادتی کا سلسلہ ہوا، یہ زیادتیوں کے سلسلے کا خمیازہ آپ کو بھگتنا ہو گا۔‘

راولپنڈی: پنجاب میں گزشتہ سال نومبر میں پی ٹی آئی کی جانب سے کیے گئے احتجاج میں شامل کارکنوں اور عہدیداروں کیخلاف مقدمات درج کرلیے گئے۔

پی ٹی آئی کے کارکنوں اورعہدے داروں پر گزشتہ سال نومبر میں کیے احتجاج کے دوران جی ٹی روڈ کو بانٹھ مندرہ کے مقام پر بند کرنے، خلاف قانون مجمع لگانے اور نعرے بازی پر مقدمات درج کرلیے گئے۔ درج ہونے والے تمام مقدمات میں انسداد دہشت گردی ایکٹ کی دفعہ 6 شامل کرلی گئی۔

مقدمے کی ایف آئی آر میں پی ٹی آئی کے عہدیداروں راجہ ساجد جاوید، راجہ عبدالوحید قاسم، ملک یاسر، مون چوہدری، ملک طاہر، امیر افضل ، راجہ ضیا، ملک وحید اختر، شہزاد خان، مرزا بشیر، غنی پٹھان، مبین افضل ، رب نواز قریشی سمیت ایک سوستر نامعلوم کارکنوں کو نامزد کیا گیا ہے۔

اعلی سطح سے احکامات ملنے پر تھانہ نصیر آباد، تھانہ ٹیکسلا وغیرہ میں درج مقدمات میں انسداد دہشت گردی کی دفعہ کا اضافہ کر دہا گیا ہے۔

نومبر میں شاہراہیں بلاک کرنے پرپی ٹی آئی عہدیدران و کارکنوں کے خلاف تھانہ نصیر آباد میں دو ،تھانہ ٹیکسلا، تھانہ صادق اباد، میں ایک ایک مقدمہ درج تھا۔ مقدمات میں گرفتار ہونے والے اس وقت ضمانت پر رہا ہیں۔

اسلام آباد: صدر مملکت ڈاکٹر عارف علوی نے پاکستان ڈائمنڈ جوبلی تمغہ 2022 کے نام سے نیا تمغہ تفویض کرنے کی منظوری دے دی۔

سربراہ مملکت ڈاکٹر عارف علوی نے نیا قومی تمغہ قائم کرنے کی منظوری اعزازات ایکٹ 1975 کے تحت دی۔

پاکستان ڈائمنڈ جوبلی تمغہ افواج پاکستان، سول فورسز اور قانون نافذ کرنے والے اداروں کے افراد کو جغرافیائی و سیاسی حدود کے دفاع میں خدمات اور قربانیوں کے اعتراف میں دیا جائے گا۔

رپورٹ کے مطابق تمغہ عسکریت پسندی اور دہشت گردی کے خاتمے اور اندورنی اور بیرونی طور پر قیامِ امن کیلئے خدمات اور قربانیوں کے اعتراف میں دیا جائے گا

افواج پاکستان کیلئے قائم کردہ نیا قومی تمغہ قیامِ پاکستان کی 75 ویں سالگرہ 14 اگست 2022 سے نافذ العمل ہوگا۔

لاہور: متحدہ عرب امارات کے صدرمحمد بن زید النہیان نے وزیر اعظم شہباز شریف کو پاکستان میں بڑی سرمایہ کاری کی یقین دہانی کرائی ہے۔

دونوں رہنماؤں کی ملاقات رحیم یار خان میں ہوئی جہاں یو اے ای کے صدر اپنے اہلخانہ کے ہمراہ ایک روزہ دورے پر پنجاب کے شہر رحیم یار خان پہنچے تھے۔

اس حوالے سے ذرائع نے بتایا کہ وزیراعظم شہباز شریف اور متحدہ عرب امارات کے صدرمحمد بن زید النہیان کی رحیم یار خان میں انتہائی پرتپاک اور برادرانہ ماحول میں ملاقات ہوئی۔
ذرائع نے بتایا کہ یو اے ای کے صدر محمد بن زید النہیان وزیراعظم کا ہاتھ تھام کر اپنے جہاز میں لے گئے اور اہل خانہ سے ملاقات کرائی جبکہ شہباز شریف نے یو اے ای کے صدر کے بچوں سے عربی اور انگریزی میں گفتگو کی۔

ذرئع کے مطابق صدر یو اے ای نے رحیم یار خان آنے پر وزیراعظم کا شکریہ ادا کیا۔ علاوہ ازیں صدر یو اے ای نے وزیراعظم شہباز شریف کو پاکستان میں بڑی سرمایہ کاری کرنے کا بھی عندیہ دیا۔

ذرائع نے بتایا کہ محمد بن زید النہیان نے شہباز شریف کو کہا کہ آپ تیاری کریں، یو اے ای پاکستان میں بڑی سرمایہ کاری کرے گا۔

لاہور: پاکستان تحریک انصاف کے چیئرمین عمران خان نے کہا ہے کہ مرنے اور جیل جانے سے نہیں ڈرتا، آخری سانس تک لڑوں گا۔

سابق وزیراعظم عمران خان نے فواد چوہدری کی گرفتاری پر خطاب کرتے ہوئے کہا کہ ہماری حکومت جانے سے اب تک بجلی کی قیمتیں بھی دگنی ہو گئی ہیں، اپریل میں ہماری حکومت گئی تو آٹا 65 روپے کلو تھا، ابھی ملک میں مزید مہنگائی آنے والی ہے، پی ڈی ایم نے ملک کو تباہی کی طرف دھکیل دیا، ملک میں مہنگائی اس ظلم اور ناانصافی کی وجہ سے ہے۔

عمران خان کا کہنا تھا کہ عدلیہ اور وکلا کو چاہیے قانون کی حکمرانی کےلیے کھڑے ہوں، موت اور جیل جانے سے نہیں ڈرتا، جب اللہ کا فیصلہ ہوگا وقت آگے پیچھے نہیں ہوتا، ڈال دیں جیل میں ، کتنے لوگوں کو ڈالیں گے، عدلیہ ہمارے بنیادی حقوق کی حفاظت کرے، عدلیہ نہ کھڑی ہوئی تو جسٹس منیر کو تاریخ نہیں بھولی، ججز جمہوریت کو بچائیں، عوام کے حقوق کی حفاظت کریں۔

عمران خان نے پوچھا کہ الیکشن کمیشن بتائے چن کر ہمارے مخالف محسن نقوی کو نگراں وزیراعلی بنایا، ہمارے نام کیوں مسترد کیے، سکھیرا صاحب وزیراعظم کے کابینہ سیکرٹری ہیں، ناصر کھوسہ نواز شریف کے پرنسپل سیکرٹری رہ چکے ہیں، ہم نے نیوٹرل امپائرز رکھنے کی کوشش کی۔