Author: Gulraiz Ruhani

لاہور: ’’فٹنس کسی 25سالہ نوجوان سے کم نہیں‘‘ شعیب ملک کیریئر کی اننگز جاری رکھنے کیلیے پُرعزم ہیں۔

بنگلہ دیش پریمیئر لیگ میں رنگپور رائیڈرز کی نمائندگی کرنے والے شعیب ملک نے ایک بنگلہ دیشی ویب سائٹ کو انٹرویو میں کہا کہ میں ٹیم میں سب سے سینئر ہوں مگر آپ فٹنس کا کسی بھی 25سالہ کرکٹر سے موازنہ کرسکتے ہیں، سب سے ہم بات یہ ہے کہ میں میدان میں اپنے وقت سے لطف اندوز ہونے کے ساتھ مزید کھیلنے کی بھوک محسوس کرتا ہوں،اسی وجہ سے کیریئر کی اننگز جاری رکھنے کیلیے پْرعزم ہوں اور ریٹائرمنٹ کا نہیں سوچ رہا۔

انہوں نے کہا کہ وہ ہر سطح کی کرکٹ کو ایک ساتھ خیرباد کہیں گے مگر فی الحال جہاں بھی پرفارم کرنے کا موقع ملے اپنے کھیل سے لطف اندوز ہوتا ہوں،ٹیسٹ اور ون ڈے کرکٹ کرکٹ سے تو پہلے ہی ریٹائر ہوگیا تھا مگر ٹی ٹوئنٹی میں اپنی بہترین کارکردگی دکھانے کی کوشش کرتا ہوں۔

بی پی ایل میں اپنے تجربات کے حوالے سے آل راؤنڈر نے کہا کہ بنگلہ دیشی بہت پیار کرنے والے لوگ ہیں،وہ ٹیموں کو بھرپور سپورٹ کرتے ہیں، میں یہاں کے کھانوں خاص طور پر مچھلی سے بہت لطف اندوز ہوتا ہوں،بنگلہ دیشی کرکٹرز بھی بہت پیار کرنے والے ہیں،وہ مسلسل اپنے کھیل میں بہتری لانے کیلیے کوشاں رہتے ہیں، کرکٹ اور میزبانی کے حوالے سے بنگلہ دیش ایک مکمل پیکیج ہے مگر یہاں صرف ایک مسئلہ ٹریفک کا ہے۔

انھوں نے کہا کہ بنگلہ دیشی کرکٹرز کی کارکردگی میں نمایاں بہتری آگئی اور اب وہ انٹرنیشنل لیگز کا حصہ بھی بن رہے ہیں،صرف ان کو بیرون ملک کھیلتے ہوئے دشواری کا سامنا کرنا پڑتا ہے،تسلسل کے ساتھ مواقع ملتے رہے تو اس معاملے میں بھی بہتری آئے گی۔

لاہور: انگلش کرکٹر الیکس ہیلز کا کہنا ہے کہ میں فرنچائز کے ہوم گراؤنڈ راولپنڈی میں میچز کھیلنے کیلیے پْرجوش ہوں،بیٹنگ کیلیے سازگار پچ پر عمدہ کارکردگی پیش کرنے کی کوشش کروں گا۔

الیکس ہیلز کا کہنا ہے کہ میں نے پہلی بار پی ایس ایل میں اسلام آباد یونائیٹڈ کی ہی نمائندگی کی،اس بار میرا اس فرنچائز کے ساتھ پانچواں سیزن ہوگا، سب جانتے ہیں کہ اسلام آباد یونائیٹڈ کا ماحول ایک فیملی جیسا ہے،کھلاڑی اور مینجمنٹ ایک دوسرے کا بہت خیال رکھتے ہیں۔

گزشتہ سیزن میں کورونا ببل کی سختیوں کی وجہ سے الیکس ہیلز ایونٹ کے درمیان میں ہی وطن واپس لوٹ گئے تھے، ذہنی تھکاوٹ کا احساس کرتے ہوئے فرنچائز نے بخوشی ان کی خدمات سے محرومی گوارا کرلی تھی۔

اس حوالے سے گفتگو کرتے ہوئے انگلش کرکٹر نے کہا کہ مشکل وقت میں اسلام آباد یونائیٹڈ نے بھرپور سپورٹ کرتے ہوئے میرے فیصلہ کا احترام کیا، اسی وجہ سے پلے آف میچز کیلیے دوبارہ پاکستان آتے ہوئے مجھے کوئی ہچکچاہٹ نہیں تھی، ٹیم کے ساتھ اپنی وابستگی کی وجہ سے ہی رواں سال کیلیے میں نے اپنی دستیابی ظاہر کی، میں اسلام آباد یونائیٹڈ کا کھیلنے کا انداز پسند کرتا ہوں۔

انھوں نے کہا کہ پی ایس ایل 8میں فرنچائز کے ہوم گراؤنڈ راولپنڈی پر کھیلنے کی وجہ سے بھی میں زیادہ پْرجوش ہوں،مجھے وہاں چند میچز کھیلنے کا موقع ملا ہے،پچ بیٹنگ کیلیے سازگار اور میں وہاں عمدہ کارکردگی پیش کرنے کیلیے بے تاب ہوں، مجھے بتایا گیا ہے کہ اسلام آباد کے شائقین بہت ہی پْرجوش ہیں، امید ہے کہ ہوم گراؤنڈ پر کھیلنے کا تجربہ شاندار ہوگا۔

لاہور / کراچی: پاکستانی ٹیم ڈائر یکٹر کی کرسی پر مکی آرتھر کا نام جگمگائے گا، ڈاربی شائر کے ساتھ معاہدے کی وجہ سے وہ انگلش کاؤنٹی سیزن کے دوران دستیاب نہیں ہوں گے۔

ثقلین مشتاق کا معاہدہ ختم ہونے پر پی سی بی کو قومی ٹیم کیلیے نئے ہیڈ کوچ کی تلاش تھی، چیئرمین ایگزیکٹیو کمیٹی نجم سیٹھی کا اولین انتخاب مکی آرتھر بنے مگر انگلش کاؤنٹی ڈاربی شائر کے ساتھ معاہدے کی وجہ سے انھوں نے عدم دستیابی ظاہر کر دی، کئی بڑے ناموں کی عدم دلچسپی کے بعد بورڈ نے آرتھر سے ہی دوبارہ رابطے شروع کیے اور انھیں من پسند انداز میں کام کرنے کی اجازت دے دی۔

ذرائع کا کہنا ہے کہ اب ہیڈ کوچ کا عہدہ ہی ختم کر دیا جائے گی، ٹیم ڈائریکٹر کی پوسٹ متعارف ہو گی جس پر مکی آرتھر کا نام جگمگائے گا، ڈاربی شائر کے ساتھ معاہدے کی وجہ سے وہ انگلش کاؤنٹی سیزن کے دوران دستیاب نہیں ہوں گے،انھوں نے اپنی ٹیم کے نام پی سی بی کو ارسال کر دیے۔
بطورمنیجر پی ایس ایل فرنچائز اسلام آباد یونائٹیڈ کے ریحان الحق کا نام تجویز کیا گیا ہے، نائب کوچز بھی کام کریں گے، گرانٹ بریڈ برن کو اسسٹنٹ کوچ بنانے کا امکان ہے،وہ پاکستان میں ہیڈ آف ہائی پرفارمنس کوچ کے طور پر بھی کام کرتے رہے ہیں، سابق کیوی کرکٹر فیلڈنگ کوچ بھی رہ چکے۔

امکان ہے کہ جس سیریز میں بھی آرتھر کی ڈاربی شائر کے ساتھ مصروفیات آڑے آئیں ان کا ویڈیو کال پر ٹیم کے ساتھ رابطہ ہوگا، اس دوران معاون اسٹاف میدان میں ذمہ داریاں سنبھالے گا۔

ذرائع کے مطابق اپریل میں انگلش سیزن شروع ہوجائے گا، اس لیے نیوزی لینڈ سے ہوم سیریز میں مکی آرتھر آن لائن کوچنگ کریں گے،جولائی میں سری لنکا سے ٹیسٹ سیریز ، پاکستان اور افغانستان کے مابین 3ٹی ٹوئنٹی میچز میں بھی ویڈیو کال پر ہی رابطہ ہوگا، رواں سال بھارت میں ورلڈکپ کے دوران ان کا ساتھ میسر ہوگا،آئندہ سال امریکا میں ورلڈکپ سمیت بیشتر موقع پر بھی وہ ویڈیو کال سے کام چلائیں گے،کئی ملکی اور غیر ملکی کوچز کا آپشن ہونے کے باوجود مکی آرتھر کو پارٹ ٹائم ملازمت میں فل ٹائم اختیارات دینے کی سوچ پر حیرت کا اظہار کیا جارہا ہے۔

میڈیا سے گفتگو کرتے ہوئے سابق کپتان شاہد آفریدی نے کہا کہ آن لائن کوچنگ کا تصور سمجھ سے بالاتر ہے، صرف غیر ملکی کوچ ہی کیوں ضروری ہے؟ پاکستان میں بھی قابل اور اہل لوگ ہیں۔

انھوں نے کہا کہ میں نے ٹیم میں تگڑے گروپ کا وجود نہیں دیکھا، ہر کپتان کی ذاتی پسند اور ناپسند ہوتی ہے،میرے دور میں بھی ہوتی تھی،چیف سلیکٹر کی ذمہ داری بہت اہم ہے، پاکستان کو اچھے فاسٹ بولرز مل رہے ہیں مگر آل راؤنڈرزکی ضرورت ہے، انھوں نے کہا کہ کرکٹ کو عروج کی جانب گامزن کرنے کیلیے گراس روٹ پر کام کرتے ہوئے نیا ٹیلنٹ تلاش کرنا ضروری ہے۔