Category: دلچسپ و عجیب

کراچی: امتحان میں پاک بھارت سرحد سے متعلق سوال پر طالبعلم کا مضحکہ خیز جواب سوشل میڈیا پر وائرل ہو گیا۔

بھارتی ریاست راجستھان کے ضلع دھول پور کے ایک اسکول میں پولیٹیکل سائنس کے پیپر میں پاک بھارت سرحد کا نام اور اس کی لمبائی کے بارے میں پوچھا گیا تھا۔

سوال میں لکھا تھا کہ پاکستان اور بھارت کے درمیان کون سی سیما (سرحد) ہے اور اسکی لمبائی کتنی ہے؟

طالبعلم نے جواب میں لکھا کہ ’پاکستان اور بھارت کے درمیان ‘سیما’ کا نام سیما حیدر ہے جس کی لمبائی 5 فٹ 6 انچ ہے۔ دونوں ممالک کے بیچ اس کو لیکر لڑائی ہے‘۔

طالبعلم کے امتحانی پرچے کی تصویر کسی نے سوشل میڈیا پر اپلوڈ کی جو دیکھتے ہی دیکھتے وائرل ہوگئی اور لوگوں نے اس پر مزاحیہ تبصرے کیے ہیں۔

ایک صارف کا کہنا تھا کہ اس طالبعلم کو اتنا انوویٹو جواب دینے پر ایکسٹرا مارکس ملنے چاہئیں۔

ایک صارف نے اس کو ’گودی میڈیا‘ کے سائیڈ افیکٹس قرار دیا جبکہ ایک پاکستانی صارف نے کمنٹس میں لکھا کہ ’یہ سیما تم ہی رکھ لو ہمیں لڑائی نہیں کرنی‘۔

فلوریڈا: امریکا میں کے ایک ایلیگیٹر پارک نے سفید رنگ کے نایاب مگرمچھر کی پیدائش کا اعلان کیا ہے۔

امریکی میڈیا کے مطابق فلوریڈا میں گیٹرلینڈ اورلینڈو نے فیس بک پوسٹ میں اعلان کیا کہ یہ مگرمچھ نایاب سے بھی بالاتر ہے، یہ بالکل غیر معمولی اور دنیا کا پہلا ہے۔

پارک کے حکام نے بتایا کہ صرف سات لیوسیٹک مگرمچھ دنیا میں زندہ رہنے کے لیے جانے جاتے ہیں، اور ان میں سے تین یہاں گیٹرلینڈ میں رکھے گئے ہیں تاہم سب کی جِلد پر کچھ نہ کچھ دھبے ہیں جبکہ یہ مکمل سفید مگرمچھ پہلی بار پیدا ہوا ہے۔
گیٹرلینڈ نے کہا مگرمچھوں میں لیوسیزم ایک غیر معمولی جینیاتی حالت ہے۔ یہ حالت سفید رنگت کا باعث بنتی ہے لیکن ان کی جلد پر عام طور پر مخصوص رنگ کے دھبے ہوتے ہیں۔ ان دھبوں کے بغیر وہ زیادہ دیر تک براہ راست سورج کی روشنی میں نہیں رہ سکتے کیونکہ وہ آسانی سے دھوپ میں جل سکتے ہیں۔

لیوسیٹک مگرمچھ البینو مگرمچھوں سے مختلف ہوتے ہیں جن میں رنگت پیدا کرنے والے خلیوں کی مکمل کمی ہوتی ہے اور ان میں چمکدار نیلی آنکھوں کی بجائے گلابی آنکھیں ہوتی ہیں۔

میساچوسٹس: ایک امریکی خاندان نے سمندر کی سب سے بڑی مخلوق کا دلچسپ ماجرا ریکارڈ کیا ہے جس میں ایک ساتھ تین وھیل کو پانی سے باہر جست لگاتے ہوئے دیکھا جاسکتا ہے۔

میساچیوسیٹس کے قریب تین ہمپ بیک وھیل کو ایک ساتھ سمندر سے باہر اچھلتے ہوئے دیکھا گیا اور اس کی ویڈیو بھی ریکارڈ کی گئی ہے۔ یہ ویڈیو رابرٹ ایڈی نےبنائی ہے جو اپنی بیٹی اور داماد کے ساتھ ایک کشتی میں ماہی گیری کررہے تھے۔ انہوں نے پہلے ایک وھیل کو دور پانی میں دیکھا اور اس کے بعد ویڈیو کیمرہ سنبھال لیا۔

ایڈی کے کیمرے میں ایک یادگار ویڈیو ریکارڈ ہوگئی جس میں تین ہمپ بیک وھیل نے ایک ساتھ ہی پانی سے باہر نکل کر چھلانگ لگائی اور گھومتے ہوئے دوبارہ پانی میں چلی گئیں۔

ایڈی نے بتایا کہ انہوں نے کبھی بھی ایسا دلفریب منظر نہیں دیکھا گیا ہے اور یہ ویڈیو دنیا بھر کے اشاعتی ادارو ں نے بھی نشر کی ہے اور اس پر خبریں لگائی گئی ہیں۔ وھیل پر تحقیق کرنے والے ایک مشہور سائنسداں فلپ ہیملٹن نے کہا کہ اگرچہ وھیل ایک ساتھ جست بھرتی ہیں لیکن ایک ہی وقت میں تین وھیلوں کا یہ منظر بہت ہی نایاب اور شاندار ہے۔

کوالالمپور: گنیز بک آف ورلڈ ریکارڈ کے مطابق دنیا کا سب سے چوراہا اس وقت ملائیشیا میں قائم کیا گیا ہے جس کا گھیر 3.4 کلومیٹر ہے اور اس میں شامل ہونے کے کل 15 چھوٹے بڑے روڈ بنائے گئے ہیں۔

ملائیشیا کے انتظامی دارالحکومت ’پُتراجایا‘ میں واقع اس راؤنڈ اباؤٹ کو اسی نام سے منسوب کیا گیا ہے۔ اس کا پورا نام فارس کے سلطان صلاح الدین عبدالعزیز کے نام سے معنون کیا گیا ہے۔ اس چوراہے کو ملک کے ممتاز آرکیٹیکٹ ’حجاز کستوری‘ نے ڈیزائن کیا ہے اور اس کا افتتاح 2003 میں کیا گیا تھا۔ یہ اب بھی دنیا کا سب سےبڑا چوراہا ہےجسےدیکھنے کے لیے سیاح یہاں آتے رہتے ہیں۔

اگرچہ یہ مکمل گول کی بجائے انڈے کی طرح بیضوی شکل کا ہے۔ تاہم اس کے اندر ایک فائیواسٹار ہوٹل، ایک محل ہے اور مسجد بھی قائم کی گئی ہے۔ اپنی خوبصورتی کی بنا پر یہ ایک تعمیراتی شاہکار ہے جس کے اندر خوشنما سبزے کی بہتات ہے جو درختوں اور پودوں کی شکل میں ہے۔