Category: کاروبار

کراچی:پاکستان کا کرنٹ اکاؤنٹ خسارے سے نکل کر ستمبر 2025 میں 11 کروڑ ڈالر کے سرپلس میں آگیا۔ اسٹیٹ بینک کے مطابق اگست 2025 میں کرنٹ اکاؤنٹ خسارہ 32 کروڑ 50 لاکھ ڈالر تھا جب کہ گزشتہ سال ستمبر 2024 میں بھی کرنٹ اکاؤنٹ 5 کروڑ 20 لاکھ ڈالر خسارے میں رہا تھا۔اسٹیٹ بینک کے مطابق رواں مالی سال یعنی جولائی تا ستمبر 2025کے پہلے 3 ماہ میں مجموعی طور پر 59 کروڑ 40 لاکھ ڈالر کا کرنٹ اکاؤنٹ خسارہ ریکارڈ کیا گیاجو گزشتہ مالی سال کی اسی مدت کے 50 کروڑ 20 لاکھ ڈالر خسارے سے قدرے زیادہ ہے ، تاہم ستمبر میں سرپلس آنا معیشت کے استحکام کی جانب مثبت اشارہ سمجھا جا رہا ہے ۔

کراچی:ئی ایم ایف سے مثبت مذاکرات اور افغانستان کے ساتھ جنگ بندی معاہدہ اسٹاک ایکسچینج کو کاروباری ہفتے کے پہلے روز تقویت پہنچا گیا۔تیزی کے سبب 60فیصد حصص کی قیمتیں بڑھ گئیں جب کہ حصص کی مالیت میں مزید 2کھرب 34ارب 58کروڑ 67لاکھ 61ہزار روپے سے زائد کا اضافہ ہوا۔ٹریڈنگ کے دوران ایک موقع پر 2615پوائنٹس کی بھی تیزی ہوئی لیکن پرافٹ ٹیکنگ اور حصص کی آف لوڈنگ سے اتارچڑھاؤ کے رحجان سے اختتامی لمحات میں تیزی کی مذکورہ شرح میں کمی واقع ہوئی۔کاروبار کے اختتام پر کے ایس ای 100 انڈیکس 2436 پوائنٹس کے اضافے سے 166242 پوائنٹس پر بند ہوا، اسی طرح کے ایس ای 30 انڈیکس 762پوائنٹس کے اضافے سے 50886پوائنٹس اورآل شیئرز انڈیکس 1287 پوائنٹس کے اضافے سے 101132پوائنٹس پر بند ہوا۔ مجموعی طور پر 1ارب 47کروڑ 85لاکھ 93 ہزار 838 حصص کے سودے ہوئے ۔مجموعی طور پر 485 کمپنیوں کے حصص کاکاروبار ہوا جس میں سے 289کمپنیوں کے حصص کی قیمتوں میں اضافہ ، 156میں کمی اور40 میں استحکام رہا۔

کراچی: انٹربینک مارکیٹ میں آج روپے کے مقابلے میں ڈالر مزید سستا ہوگیا۔کاروباری ہفتے کے دوسرے روز انٹربینک میں امریکی کرنسی کی قیمت میں ایک پیسے کی معمولی کمی ریکارڈ کی گئی جس کے باعث انٹربینک میں ڈالر 281 روپے 6 پیسے پر بند ہوا۔واضح رہے کہ گزشتہ روز انٹربینک میں ڈالر 281 روپے 7 پیسے پر بند ہوا تھا۔

اسلام آباد:سرحدی کشیدگی کی وجہ سے پاک افغان بارڈر کی بندش کی بنا پر سرحد وں پر گاڑیوں کی طویل قطاریں لگ گئیں جبکہ پھلوں کی قیمتیں بھی آسمان پر پہنچ گئیں ۔طورخم بارڈر بند ہونے سے پھلوں کی قیمتوں میں ہوشربا اضافہ دیکھاگیا ۔مارکیٹ ذرائع کے مطابق انگور کی فی کلو قیمت 400 سے بڑھ کر 800 روپے جبکہ انار فی کلو 300 سے بڑھ کر 600 روپے ہو گیا ہے ۔اسی طرح سیب کی فی کلو گرام قیمت 200 سے بڑھ کر 400 روپے ہو گئی ہے ۔ پاک افغان کشیدگی کے باعث طورخم تجارتی گزرگاہ آٹھویں روز بھی بند رہی ، پھلوں و دیگر اشیا سے لدی ہزاروں کارگو گاڑیاں پھنسی ہو ئی ہیں ، دو طرفہ تجارت، کاروباری سرگرمیاں اور آمدورفت مکمل طور پر معطل ہے ۔پاکستان افغانستان کو سیمنٹ، ادویات، کپڑا، تازہ پھل، سبزیاں اور دیگر اشیا برآمد کرتا ہے جبکہ افغانستان سے پاکستان کو کوئلہ، سوپ سٹون، خشک اور تازہ پھل اور دیگر اشیا درآمد کی جاتی ہیں۔ سرحدی علاقے میں کاروبار بند ہونے سے تاجروں اور ٹرانسپورٹرز کو روزانہ کروڑوں روپے کے نقصان کا سامنا ہے ۔کسٹم ذرائع کا کہنا ہے کہ طورخم گزرگاہ سے یومیہ اوسطا ً 83 کروڑ روپے کی دوطرفہ تجارت ہوتی ہے جس میں 58 کروڑ روپے کی ایکسپورٹ اور 25 کروڑ روپے کی درآمد ات شامل ہیں۔

اسلام آباد : آل پاکستان انجمن تاجران کے صدر اجمل بلوچ، سیکرٹری و سابق سینئر نائب صدر آئی سی سی آئی خالد چوہدری اور آبپارہ ٹریڈرز یونین کے جنرل سیکرٹری اختر عباسی نے کہا ہے کہ موجودہ مہنگائی کی لہر حکومت کی پیدا کردہ ہے اس میں تاجروں کا کوئی قصور نہیں، چھوٹے تاجروں کے خلاف کسی قسم کا انتظامی ایکشن سخت زیادتی ہوگی۔ شوگر ملوں نے مارکیٹ میں چینی کی سپلائی روک رکھی ہے جبکہ تاجروں کو مجبور کیا جا رہا ہے کہ وہ سرکاری ریٹ پر چینی فروخت کریں۔درآمد شدہ چینی مارکیٹ میں عنقریب پہنچنے والی ہے شوگر ملز مالکان کا خیال ہے کہ یہ چینی مہنگی ہوگی اس لئے وہ اپنی چینی کی قیمت درآمدی چینی کے برابر لانا چاہتے ہیں۔ اس عمل میں چھوٹے تاجروں کا کوئی قصور نہیں اور ان کے خلاف کسی قسم کا ایکشن نہیں ہونا چاہئے۔ آج تک کسی مل مالک کے خلاف کبھی کوئی ایکشن نہیں لیا گیا ہے۔ مہنگائی کی نئی لہر سیلاب اور حالیہ افغان وار کے نتیجے میں سامنے آئی ہے جس سے سبزیوں اور پھلوں کی قیمتیں میں بہت زیادہ اضافہ ہوا ہے۔

اسلام آباد:بینکوں کی جانب سے نجی شعبے کو قرضہ جات کی فراہمی میں ستمبر کے دوران سالانہ بنیادوں پر 14.7فیصد اضافہ ریکارڈ کیا گیا ہے ۔ اسٹیٹ بینک کے مطابق ستمبر 2025 کے اختتام پر بینکوں کی جانب سے نجی شعبے کو فراہم کردہ قرضہ جات کا حجم 9682ارب روپے ریکارڈ کیا گیا جو 14.7فیصد زیادہ ہے ۔ گزشتہ سال ستمبر کے اختتام پر نجی شعبے کو بینکوں کی جانب سے فراہم کردہ قرضہ جات کا حجم 8438 ارب روپے ریکارڈ کیا گیا تھا ۔ اگست کے مقابلے میں ستمبر میں نجی شعبے کو قرضہ جات کی فراہمی میں ماہانہ بنیادوں پر 2.1فیصد اضافہ ہوا ہے ، اگست کے اختتام پر بینکوں کی جانب سے نجی شعبے کو فراہم کردہ قرضہ جات کا حجم 9484ارب روپے ریکارڈ کیا گیا تھا ۔ اعداد و شمار کے مطابق ستمبر کے اختتام پر بینکوں کی جانب سے نجی شعبے کے کاروبار کو فراہم کردہ قرضہ جات کا حجم 8366 ارب روپے ریکارڈ کیا گیا جو 15.2فیصد زیادہ ہے ۔

لاہور:چیئرمین کارپٹ مینو فیکچررز اینڈ ایکسپورٹرز ایسوسی ایشن میاں عتیق الرحمن اور وائس چیئرمین ریاض احمد نے 3 روزہ عالمی نمائش کے کامیاب انعقاد پر اطمینان کا اظہار کرتے ہوئے کہا کہ عالمی نمائش میں توقعات سے بڑھ کر کامیابیاں ملی ہیں،طے پانے والے برآمدی آرڈرز کے حوالے سے اعدادوشمار مرتب کئے جارہے ہیں ،نمائش میں غیر ملکی خریداروں کی بھرپور شرکت انتہائی حوصلہ افزا ہے ، بھرپور تعاون فراہم کرنے پر ٹڈاپ کے بھی شکر گزار ہیں ۔ ان خیالات کا اظہار انہوں نے حال ہی میں لاہور میں اختتام پذیر ہونے والی تین روزہ عالمی نمائش کے حوالے سے جائزہ اجلاس سے خطاب کرتے ہوئے کیا ۔اجلاس کے شرکاء نے چیئرمین ایگزیبیشن ریاض احمد اورچیف آرگنائزر اعجاز الرحمان کی سربراہی میں تمام منتظمین کو بہترین انتظامات پر خراج تحسین پیش کیا ۔

کراچی:ٹاپ لائن سیکیورٹیز کے سی ای او محمد سہیل نے کہا ہے کہ رواں سال 2025ء میں اب تک سونے کی عالمی قیمتوں میں 50 فیصد سے زائد اضافہ پاکستان کے ذخائر کے لیے خوش آئند ثابت ہو رہا ہے۔ اور سرکاری تخمینوں کے مطابق پاکستان کے سونے کے ذخائر کی مالیت تقریباً 9 ارب ڈالر تک بڑھ گئی ہے ۔محمد سہیل نے سوشل میڈیا پلیٹ فارم ایکس پر کہا کہ اس اضافے نے ملک کے کل ذخائر جن میں نقد غیرملکی زر مبادلہ بھی شامل ہے کو تقریباً 23 ارب ڈالر تک پہنچا دیا ہے جو کہ تاریخی سطح کے قریب ہے ۔