Category: کاروبار

اسلام آباد: اپریل سے عوام کو بجلی کی قیمتوں میں بڑا ریلیف ملنے کا امکان ہے۔نجی ٹی وی کے مطابق 23 مارچ کو وزیر اعظم شہباز شریف آئی ایم ایف کی منظوری کے بعد بجلی کے نرخ میں 8 روپے فی یونٹ کمی کرنے کیلئے مکمل طور پر تیار ہیں۔ذرائع کے مطابق قیمتوں میں کمی یکم اپریل 2025 سے موثر ہوگی جب کہ مئی میں عوام کوکم کئے گئے بل موصول ہوں گے۔8 روپے فی یونٹ میں سے 4.73 روپے فی یونٹ کی کمی مستقل بنیادوں پر جاری رہے گی، پیٹرولیم مصنوعات کی قیمتوں میں کمی نہ کرنے کا تخمینہ 168 ارب روپے لگایا گیا ہے جو بجلی کے ٹیرف میں 1.30 روپے فی یونٹ کمی کیلئے استعمال ہوں گے۔ذرائع کے مطابق آئی ایم ایف نے حکومت کے اعلیٰ حکام کوتین ماہ تک پیٹرولیم مصنوعات کی قیمتیں کم نہ کرنے کے نتیجے میں 250 ارب روپے تک کے اثرات کے بدلے ریلیف حاصل کرنے کی منظوری دی ہے لیکن اس کے لئے پیٹرولیم مصنوعات کی قیمتوں میں بین الاقوامی مارکیٹ میں کمی ہونا شرط ہے۔

اسلام آباد: کمپٹیشن کمیشن آف پاکستان (سی سی پی) نے چینی کی قیمتوں میں اضافے پر ممکنہ کارٹلائزیشن کے خلاف سخت کارروائی کی وارننگ جاری کردی۔ کمیشن چینی کی قیمتوں میں اضافے کی روزانہ نگرانی کر رہا ہے اور کسی بھی غیر مسابقتی سرگرمی یا ممکنہ گٹھ جوڑ کی نشاندہی پر سخت قانونی کارروائی کی جائے گی۔تفصیلات کے مطابق 2021 میں شوگر ملز اور شوگر ملز ایسوسی ایشن پر 44 ارب روپے کا جرمانہ عائد کیا گیا تھا، شوگر ملز اور ایسوسی ایشن کی اپیل پر سندھ اور لاہور ہائی کورٹس نے حکم امتناع جاری کیا۔ 2009 میں بھی شوگر ملز کے گٹھ جوڑ کے شواہد سامنے آئے تھے۔ کمپٹیشن کمیشن نے گنے کی امدادی قیمتوں کا نظام ختم کر کے مارکیٹ بیسڈ میکانزم متعارف کرانے کا مشورہ دیا ہے ۔ حکومت چینی کی مارکیٹ میں مداخلت کم کرے اور قیمتوں کا تعین طلب و رسد کے اصولوں پر چھوڑا جائے۔ کارٹلائزیشن کیسزمختلف عدالتوں میں چینی سیکٹر سے متعلق 127 مقدمات زیر التوا ہیں ۔سپریم کورٹ میں 24، لاہور ہائی کورٹ میں 25، سندھ ہائی کورٹ میں 6 اور سی اے ٹی میں 72 کیسز زیر التوا ہیں ۔

اسلام آباد: وزارت تجارت نے گزشتہ 5 سال کے خسارے کی تفصیلات ایوان میں پیش کر دیں۔قومی اسمبلی میں پیش کردہ دستاویزات کے مطابق گزشتہ 5 سال کے دوران 154 ارب ڈالر کا تجارتی خسارہ ہوا۔ اور 136 ارب ڈالر کی برآمدات ہوئیں۔ گزشتہ 5 سال کے دوران 291 ارب ڈالر کی درآمدات ہوئیں۔ درآمدات میں اضافے کی بنیادی وجہ معاشی نمو ہے۔مالی سال 2020 میں تجارتی خسارہ 23 ارب 16 کروڑ ڈالر ہوا۔ اور مالی سال 2021 میں تجارتی خسارہ 31 ارب 8 کروڑ ڈالر ہوا۔ جبکہ مالی سال 2022 میں تجارتی خسارہ 48 ارب 35 کروڑ ڈالر ہوا۔ مالی سال 2023 میں تجارتی خسارہ 27 ارب 47 کروڑ ڈالر ہوا۔ اور گزشتہ مالی سال 2024 میں تجارتی خسارہ 24 ارب 11 کروڑ ڈالر ہوا۔مالی سال 2025 میں سولر پینل، ٹرانسفارمرز اور بجلی کے ترسیلی آلات میں 60 فیصد اضافہ ہوا۔ جبکہ بجلی کے ترسیلی آلات کی درآمدات 31 کروڑ 90 لاکھ ڈالر تک جا پہنچیں۔دستاویزات کے مطابق صنعتی مشینری کے آلات میں 20 فیصد، ٹیکسٹائل مشینری میں 40 فیصد اضافہ ہوا۔ آٹو پارٹس کی درآمدات میں 58 فیصد اضافہ ہوا۔

اسلام آباد: وزیراعظم محمد شہباز شریف سے معروف امریکی ملٹی نیشنل آئی ٹی کمپنی Afiniti کے سی ای او جیرومی کیپیلس (Jerome Kapelus) کی سربراہی میں 4 رکنی وفد کی ملاقات کی جس میں انہوں نے Afiniti کے پاکستان کے آئی ٹی شعبے میں مزید سرمایہ کاری میں دلچسپی کا خیر مقدم کیا۔وزیرا عظم آفس سے جاری بیان کے مطابق پاکستان کے آئی ٹی شعبے کی باصلاحیت افرادی قوت میں عالمی مارکیٹ میں مسابقتی بنیاد پر کام کرنے کی استعداد موجود ہے۔ وزیراعظم نے Afiniti پاکستان کو قومی اور بین الاقوامی صارفین کے لئے پاکستان میں عالمی معیار کا کال سینٹر قائم کرنے کی تجویز دی۔شہباز شریف نے کہا کہ ملک کے باصلاحیت نوجوانوں کو آئی ٹی، اے آئی اور دیگر جدید تکنیکی صلاحیتوں سے لیس کرنے کے پروگرام کی خود نگرانی کر رہا ہوں، آئی ٹی شعبے میں 25 ارب ڈالر کی برآمدات کے ہدف کے حصول کے لیے آئی ٹی کمپنیوں کو تمام سہولیات فراہم کی جا رہی ہیں۔وفد نے پاکستانی آئی ٹی شعبے سے تعلق رکھنے والے پیشہ ور افراد کی قابلیت اور شعبے کی ترقی کے لیے ان کی محنت کی تعریف کی، جیریمی کیپیلس نے کہا کہ پاکستان کا آئی ٹی شعبہ سرمایہ کاری اور کاروبار کے لیے انتہائی موزوں ہے، اس وقت Afiniti پاکستان میں 1000 سے زیادہ انتہائی باصلاحیت اور قابل پاکستانی ماہرین کام کر رہے ہیں، پاکستانی نوجوانوں میں آئی ٹی شعبے کی ترقی کے لیے کام کرنے کی لا تعداد استعداد موجود ہے۔ جیریمی کیپیلس نے کہا کہ پاکستان کی پیشہ ور اور تربیت یافتہ افرادی قوت کی بدولت ہی Affinity خطے کی کامیاب کمپنی ہے۔ ملاقات میں وفاقی وزیر آئی ٹی شزا فاطمہ خواجہ اور متعلقہ اداروں کے اعلیٰ سرکاری افسران شریک تھے۔