Category: کاروبار

اسلام آباد: وزیر خزانہ اور آئی ایم ایف مشن کے درمیان مذاکرات مکمل ہو گئے، معاشی ٹیم نے رواں مالی سال کے پہلے8ماہ کی کارکردگی پر وفد کوبریفنگ دی۔ذرائع کے مطابق بریفنگ میں بتایا گیا کہ آئی ایم ایف پروگرام کے بعد ملک میں معاشی استحکام آیا ہے، آئی ایم ایف وفد کی قیادت جائزہ مشن کے سربراہ نیتھن پورٹر نے کی۔وزیر خزانہ محمد اورنگزیب نے وفد کو معاشی صورتحال پر بریفنگ دی اور آئی ایم ایف کو پروگرام پر مکمل عملدرآمد کی یقین دہانی کروائی، وزارت خزانہ نے جولائی سے فروری تک معاشی صورتحال پربریفنگ دی۔مالیاتی خسارہ، پرائمری بیلنس، صوبوں کا سرپلس اور ریونیو کلیکشن پر تفصیلات پیش کی گئیں، ذرائع کے مطابق آئی ایم ایف وفد سے رواں مالی سال کیلئے جولائی سے جنوری تک ریونیو پر بات ہوئی۔اکنامک، بجٹ ونگ، ایکسٹرنل فنانس، ریگولیشنز ونگ اورڈی جی ڈیٹ نے بھی بریفنگ دی، بریفنگ میں آئی ایم ایف کو بتایا گیا کہ جولائی سے دسمبرتک مالیاتی خسارہ ایک ہزار 537 ارب روپے ریکارڈ کیا گیا ہے۔چیئرمین ایف بی آر راشد لنگڑیال بھی مذاکرات میں شریک ہوئے، انہوں نے وفد کو ریونیو کلیکشن پر بریفنگ دی، ایف بی آر بورڈ ممبران نے بھی وفد سے ہونے والے مذاکرات میں شرکت کی۔ذرائع کے مطابق آئی ایم ایف وفد آئندہ مالی سال کے بجٹ کیلئے تجاویز دے گا، پاکستان کی جانب سے 7 ارب ڈالرز قرض پروگرام کی شرائط پر عملدرآمد کی رپورٹ پیش کی گئی جبکہ رواں مالی سال کی پہلی ششماہی سے متعلق رپورٹ بھی آئی ایم ایف کے سامنے رکھی گئی۔

اسلام آباد: ماہ فروری میں مہنگائی حکومتی تخمینوں سے بھی نیچے آگئی،سالانہ بنیاد پر فروری میں مہنگائی 1.52 فیصد ریکارڈ کی گئی۔ وفاقی ادارہ شماریات کی رپورٹ کےمطابق گزشتہ ماہ مہنگائی میں 0.83 فیصد کمی آئی،شہری علاقوں میں 1.8 فیصد، دیہی علاقوں میں 1.1 فیصد،جولائی تا فروری مہنگائی کی اوسط شرح 5.85 فیصد رہی۔ ادارہ شماریات کی رپورٹ کےمطابق ایک ماہ میں دال چنا اورچائے 10 فیصد، بیسن 9 فیصد تک سستا ہوا،گندم 3 فیصد،دال ماش 2.82 فیصد اور آٹا 2.23 فیصدسستا ہوا،چکن،دال مسور،مونگ، مچھلی، دودھ کی مصنوعات کےدام کم ہوئے،ایندھن،ٹرانسپورٹ سروسز،تعمیراتی سامان، بجلی، اسٹیشنری بھی سستی ہوئی۔گزشتہ ماہ ٹماٹر 57 فیصد اورپیاز 32 فیصد سستا ہوا، آلو 20 فیصد، سبزیاں 17 فیصد تک سستی ہوئیں،انڈوں کی قیمت میں 14 فیصد سے زیادہ کمی ہوئی۔گزشتہ ماہ پھل 15 فیصد،چینی 9.35 فیصد،مکھن 5.61 فیصدمہنگا ہوا،مصالحے 1.59 فیصد، بیکری آئٹمز 1.19فیصدمہنگےہوئے،مشروبات 1.16 فیصد،شہد 1.12فیصد تک سستا ہوا،خوردنی تیل،گھی، گوشت،چاول، ریڈی میڈ فوڈ بھی مہنگی اشیاء میں شامل ہیں،خشک دودھ، رہائشی سہولیات،ڈاکٹر فیس،مکینکل سروسز بھی مہنگی ہوئیں۔ خیال رہے کہ حکومت نے مہنگائی 2 سے 3 فیصد رہنے کی پیشگوئی کی تھی۔

اسلام آباد: انٹرنیشنل مانیٹری فنڈ (آئی ایم ایف) نے پاکستان میں ریئل اسٹیٹ سیکٹر میں ٹیکس چوری روکنے کا مطالبہ کردیا۔ پاکستان نے ریئل اسٹیٹ ریگولیٹری اتھارٹی کو فعال کرنے کی یقین دہانی کرادی۔ پاکستان اور آئی ایم ایف کے درمیان قرض پروگرام پر جائزہ مذاکرات شروع ہوگئے۔ 7 ارب ڈالر قرض پروگرام کی اگلی قسط کے حصول کےلیے مذاکرات 15 مارچ تک جاری رہیں گے۔ پہلے مرحلے میں تکنیکی اور دوسرے میں پالیسی سطح کی بات چیت ہو گی۔ذرائع کے مطابق آئی ایم ایف نے ریئل اسٹیٹ سیکٹر میں ٹیکس چوری روکنے کا مطالبہ کردیا، جس پر حکام نے پراپرٹی کی غلط مالیت ظاہر کرنے والوں کیخلاف کارروائی کی تیاریاں کرلیں۔ذرائع کا کہنا ہے کہ پاکستان نے آئی ایم ایف کو یقین دہانی کرائی ہے کہ ریئل اسٹیٹ ریگولیٹری اتھارٹی کو فعال کیا جائے گا، پراپرٹی کی غلط مالیت ظاہر کرنے پر قید اور جرمانے کی سزائیں ہوںگی۔ذرائع کے مطابق رجسٹریشن نہ کرانے والے ایجنٹس پر 5 لاکھ روپے مالیت تک جرمانہ عائد ہوسکے گا، ریئل اسٹیٹ ریگولیٹری اتھارٹی کو 3 سال تک قید کی سزا کا اختیار مل سکتا ہے۔ذرائع وزارت خزانہ نے بتایا ہے کہ اتھارٹی غلط معلومات پر ایجنٹ کا لائسنس منسوخ کرسکے گی، اتھارٹی کو غلط معلومات دینے پر 2 سے 5 لاکھ روپے تک جرمانہ ہوسکتا ہے۔ذرائع کے مطابق اتھارٹی غلط پراپرٹی ٹرانسفر کرنے پر 5 سے 10 لاکھ روپے جرمانہ عائد کرسکتی ہے، ریگولیٹری اتھارٹی کو مطلوبہ دستاویز فراہم نہ کرنے پر 2 لاکھ تک جرمانہ عائد ہوسکے گا۔دوسری جانب پاکستان آنیوالا آئی ایم ایف کا وفد آئندہ مالی سال کے بجٹ کیلئے تجاویز دے گا، وزارت خزانہ اور اسٹیٹ بینک سمیت دیگر اداروں سے بھی مذاکرات ہوں گے، پنجاب، سندھ، خیبرپختونخوا اور بلوچستان سے الگ الگ مذاکرات ہوں گے۔ ذرائع کے مطابق آئی ایم ایف وفد پہلے مرحلے میں تکنیکی سطح کے مذاکرات کریگا، دوسرے مرحلے میں پاکستان اور آئی ایم ایف کے درمیان پالیسی لیول کے مذاکرات ہوں گے۔ذرائع کا کہنا ہے کہ آئی ایم ایف وفد وزارت خزانہ، ایف بی آر، پاور ڈویژن اور اسٹیٹ بینک حکام کے ساتھ مذاکرات کریگا، پاکستان 7 ارب ڈالرز قرض پروگرام کی شرائط پر عملدرآمد کی رپورٹ پیش کریگا، رواں مالی سال کی پہلی ششماہی سے متعلق رپورٹ آئی ایم ایف وفد کو پیش کی جائے گی۔ذرائع کے مطابق آئی ایم ایف وفد کو زرعی آمدن پر ٹیکس پر بریفنگ دی جائے گی، عالمی مالیاتی ادارے کو پراپرٹی سیکٹر پر ٹیکسز کے حوالے سے بھی آگاہ کیا جائے گا، آئی ایم ایف کو ریٹیلرز کو ٹیکس نیٹ میں لانے کی شرط پر بھی عملدرآمد کی رپورٹ پیش کی جائے گی۔