Category: کاروبار

اسلام آباد: قومی اسمبلی کی قائمہ کمیٹی پاور کو آگاہ کیا گیا ہے کہ حکومت نے 22 انڈیپینڈنٹ پاور پروڈیوسرز (آئی پی پیز) کو کیپسٹی پیمنٹس بند کر دی ہیں، کیپسٹی پیمنٹس کی بندش سے مجموعی طور پر 1500 ارب کی بچت ہوگی، صارفین کو 4 سے 5 روپے فی یونٹ کا ریلیف ملے گا۔قومی اسمبلی کی قائمہ کمیٹی پاور کااجلاس محمد ادریس کی زیر صدارت منعقد ہوا، سیکریٹری پاور نے اجلاس کو بتایا کہ 14 آئل اور 8 بگاس آئی پی پیز کی کپیسٹی پیمنٹس بند کر دی ہیں، مزید آئی پی پیز کی کپیسٹی پیمنٹس بھی ختم کرنے پر کام کر رہے ہیں، کپیسٹی پیمنٹس ختم ہونے سے مجموعی طور پر1500 ارب کی بچت ہوگی جبکہ صارفین کو 4 سے 5 روپے فی یونٹ کا ریلیف ملے گا۔مصطفیٰ کمال نے کہا کہ کچھ آئی پی پیز نے کہا کہ گن پوائنٹ پر معاہدے ختم کرائے گئے، سیکریٹری پاور نے کہا کہ کچھ آئی پی پیز نے معاہدوں کی خلاف ورزیاں کیں جو انہیں بتائی گئیں، ہماری ٹیموں نے ان کے سامنے ثابت کیا کہ آپ نے یہ یہ غلطیاں کی ہیں، ہم نے آئی پی پیز کو کہا کہ یا راضی ہوجائیں یا پھر نیپرا فنانشل آڈٹ کرے گا۔سیکریٹری پاور نے بتایا کہ دو آئی پی پیز راضی نہیں ہوئیں تو نیپرا کو ان کا آڈٹ کرنے کا کہا، راضی نہ ہونے والی آئی پی پیز کے آڈٹ پر نیپرا نے اشتہار لگا دیے ہیں۔اجلاس میں پاور ڈویژن کی رپورٹ میں لیسکو صارفین پر 78 لاکھ اضافی یونٹس کے بوجھ کا معاملہ زیرغور آیا،قائمہ کمیٹی نے اضافی 78 لاکھ یونٹس کے معاملے پر ذیلی کمیٹی تشکیل دے دی۔کمیٹی کے رکن رانا محمد حیات نے کہا کہ 4،3 سال سے بل اور واپڈا کے اخراجات بھی بڑھتے جا رہے ہیں، ہماری حکومت ہے ہم لوگوں کو کیا جواب دیں گے، بتائیں تو سہی کہ لوگوں پر بوجھ ڈالنے کی بجائے ریلیف کب دیں گے، قوم کو پتا چلنا چاہئیے کہ مقامی کوئلے سے بجلی کتنی سستی پڑے گی؟پاور ڈویژن کے حکام نے بتایا کہ مقامی کوئلے سے بجلی کی لاگت 4 روپے فی یونٹ آئے گی، اس وقت درآمدی کوئلے سے بجلی کی لاگت 16 روپے فی یونٹ ہے، فرنس آئل سے بجلی بنانے پر فی یونٹ 30 سے 32 روپے لاگت آتی ہے۔ مصطفیٰ کمال نے سوال کیا کہ ہائیڈل اور تھرمل بند کرکے کوئلے پر جائیں گے تو آگے منصوبہ کیا ہوگا، اگر آگے چل کر کوئلے کے پلانٹس کا بھی مسئلہ ہوا تو کیا کریں گے؟سیکریٹری پاور ڈویژن نے کہا کہ کوئلے کے پلانٹس ہم مختصر وقت میں لگا سکتے ہیں، پاور پلانٹس کے لیے اگلے 10 سال کی جدید فورکاسٹنگ کر رہے ہیں، اگلے 3 سالوں میں فرنس آئل پر چلنے والے پاور پلانٹس میں سے بہت سے بند ہو جائیں گے۔

اسلام آباد: 7 ارب ڈالر کے بیل آؤٹ پیکیج میں سے ایک ارب ڈالر کی اگلی قسط لینے کے مشن کے لیے آئی ایم ایف وفد اقتصادی جائزے کیلئے 3 مارچ کو پاکستان پہنچے گا۔ ذرائع وزارت خزانہ کےمطابق آئی ایم ایف کےساتھ اقتصادی جائزہ مذاکرات 15 مارچ تک جاری رہیں گے، پہلےمرحلے میں تکنیکی اور دوسرے مرحلےمیں پالیسی سطح کےمذاکرات ہوں گے،نیتھن پورٹر کی قیادت میں 9 رکنی وفد تقریبا 2 ہفتے پاکستان میں قیام کرے گا۔آئی ایم ایف وفد آئندہ مالی سال 26-2025 کے بجٹ کیلئے تجاویز بھی دے گا،رضامندی کی صورت میں ہی تنخواہ دارطبقے کو ریلیف مل سکے گا،وزارت خزانہ، وزارت توانائی، منصوبہ بندی اور اسٹیٹ بنک کے ساتھ مذاکرات ہوں گے،ایف بی آر، اوگرا، نیپرا سمیت دیگر اداروں اور وزارتوں کے ساتھ مذاکرات ہوں گے۔پنجاب، سندھ، خیبرپختونخوا اور بلوچستان سے الگ الگ مذاکرات ہوں گے،کلائمیٹ فنانسنگ پر تکنیکی وفد آج پنجاب اور بلوچستان سے مذاکرات کرے گا۔

اسلام آباد: وفاقی وزیر خزانہ محمد اورنگزیب کا کہنا ہے کہ معاشی استحکام کیلئے نجی شعبے کو آگے آنا ہوگا۔تقریب سے خطاب کرتے ہوئے انہوں نے کہا کہ معاشی استحکام کے ثمرات مل رہے ہیں،پائیدار معاشی استحکام کیلئے بنیادی اصلاحات کےایجنڈے پرعمل پیرا ہیں۔ایف بی آرمیں جدید ٹیکنالوجی سے انسانی مداخلت کم کررہےہیں،ٹیکس پالیسی کا اختیاراب ایف بی آر سے فنانس ڈویژن کومنتقل ہوچکا ہے۔برآمدات پرمبنی معاشی ترقی ہماری ترجیح ہے،حکومتی اخراجات کم کرنے کیلئے رائٹ سائزنگ کی جا رہی ہے ،آئندہ بجٹ کیلئے تاجروں سے تجاویز لے رہے ہیں ،کسی بھی تجویز کو رد نہیں کیا جائےگا سب کو دیکھا جائےگا۔انہوں نے مزید کہا کہ آئی ایم ایف کامشن اگلے ہفتے پاکستان پہنچ رہاہے،آئی ایم ایف کا مشن پہلے 6ماہ کا ریویو کرے گا،کوشش ہے کہ سسٹینبل گروتھ کی جانب جائیں۔معاشی استحکام پہلے بھی ملک میں آیا، یہ فلم پہلے بھی دیکھی ہوئی ہے ،ہم بوم اینڈ بسٹ کی طرف نہیں جا سکتے،کیونکہ ہم درآمدات پر انحصار کرتے ہیں اس لیے پیمنٹ کا مسئلہ بھی ہوتا ہے ،ہم بار بار آئی ایم ایف کے پاس ڈیفالٹ سے بچنے کیلئے جاتے ہیں۔ ٹیکسٹائل سیکٹر نے برآمدات کا کوئی ٹھیکہ نہیں لیا ہوا ،ہر سیکٹر کو برآمدات میں اضافے کیلئے اپنا حصہ ڈالنا ہو گا۔