Category: اہم خبریں

اسلام آباد: پاکستان کے منرلز اینڈ مائنز کے شعبے میں بڑی پیش رفت ، پاکستان سعودی عرب میں ہونے والے فیوچر منرلز فورم میں شریک ہوگا۔پاکستان کی 13 سرکاری و نجی منرل کمپنیاں فورم میں شریک ہوں گی، سعودی عریبیہ کی دعوت پر پاکستان رواں ماہ ریاض میں ہونے والے فیوچر منرلز فورم میں بھرپور شرکت کرے گا۔وفاقی وزیر پٹرولیم علی پرویز ملک سے سعودی سفیر نواف بن سعید المالکی نے ملاقات کی، جس میں پاکستان اور سعودی عرب کے درمیان معدنیات و توانائی میں تعاون پر تبادلہ خیال کیا گیا۔علی پرویز ملک نے کہا کہ فیوچر منرلز فورم میں پاکستان اپنا پویلین پاکستان دا منرل مارول کے نام سے لگائے گا، پاکستان کی 13 سرکاری و نجی منرل کمپنیاں فورم کا حصہ ہوں گی۔وفاقی وزیر پٹرولیم نے کہا کہ پاکستان پویلین میں معدنی وسائل کی وسیع صلاحیت کو اجاگر کیا جائے گا۔سعودی سفیر نے کہا کہ پاکستان کی فیوچر منرلز فورم میں شرکت کا خیر مقدم کرتے ہیں، فیوچر منرلز فورم معدنیات میں تعاون کے نئے راستے کھولے گا۔نواف بن سعید المالکی نے مزید کہا کہ معدنیات اور توانائی میں پاک سعودی تعاون کے وسیع مواقع موجود ہیں۔علی پرویز ملک نے کہا کہ ریاض میں پاکستان پویلین، اپریل میں ہونے والے پاکستان منرل انویسٹمنٹ فورم 2026 کا پیش خیمہ بنے گا۔

لاہور:امیر جماعت اسلامی پاکستان حافظ نعیم الرحمن نے اعلان کیا ہے کہ با اختیار بلدیاتی نظام کے حق میں 15جنوری کو ملک گیر ریفرنڈم ہوگا۔ نتائج کے بعد پنجاب کے بلدیاتی قانون کے خلاف صوبائی اسمبلی کا گھیراؤ کیا جائے گا۔ منصورہ میں بلدیاتی نظام بالخصوص پنجاب میں حالیہ متعارف کرائے جانے والے مقامی حکومتوں کے قانون پر مشاورتی اجلاس کے بعد ذرائع ابلاغ کے نمائندوں سے گفتگو کرتے ہوئے امیر جماعت اسلامی نے مطالبہ کیا کہ پنجاب کا بلدیاتی قانون واپس لیا جائے اور آئین کی دفعہ 140-اے کے مطابق تمام اختیارات منتقل کرکے صوبہ میں بلدیاتی انتخابات کرائے جائیں۔ ۔ امیر جماعت اسلامی نے پنجاب کے قانون کو یکسر مسترد کردیا اور کہا کہ جماعت اسلامی جمہوریت کی نرسری پر شب خون کسی صورت قبول نہیں کرے گی۔ نوکر شاہی راج ، بادشاہت یا ملکہ کے نظام کی بھرپور مزاحمت ہوگی۔انہوں نے کہا کہ ن لیگ کا ‘‘ووٹ کو عزت دو’’ کا نعرہ عوام نے قومی انتخابات میں بخوبی دیکھ لیا، فارم47سے اقتدار میں آنے والوں نے بلدیاتی انتخابات بھی غیر جماعتی بنیادوں پر کرانے کا فیصلہ کیا ہے ، اس عوامی شب خون پر کسی صورت خاموش نہیں رہیں گے ۔حافظ نعیم الرحمن نے کہا کہ پندرہ جنوری کے ریفرنڈم کے لیے مرکزی، صوبائی سطحوں پر آزاد ریفرنڈم کمیشن بنیں گے ،کروڑوں لوگوں سے رائے لی جائے گی۔ انہوں نے چیف الیکشن کمشنر سے بھی پرزور مطالبہ کیا کہ عدالتوں کو صوبائی حکومت کو بھیجے جانے والے نوٹسز دکھانے اور ٹال مٹول کی بجائے اپنا اصل کام کریں اور انتخابات کرائیں۔ امیر جماعت اسلامی نے کہا کہ جماعت اسلامی پنجاب کی تمام یونین کونسلز کے انتخابات میں حصہ لے گی اور بھرپور کامیابی حاصل کرے گی۔ بدل دونظام کی تحریک میں مزید تیزی آئے گی۔

اسلام آباد: اقتصادی رابطہ کمیٹی کے اجلاس میں مختلف تکنیکی سپلیمنٹری گرانٹس کی منظوری دے دی گئی۔وزیر خزانہ محمد اورنگزیب کی زیرصدارت اقتصادی رابطہ کمیٹی کا اجلاس ہوا، ڈاکٹر شمشاد اختر کے انتقال پر اتحہ خوانی اور خراج عقیدت پیش کیا، محمداورنگزیب نے کہا کہ ڈاکٹر شمشاد اختر کی خدمات ناقابل فراموش ہیں۔ای سی سی نے انڈر 19 قومی کرکٹ ٹیم کیلئے انعامی رقم، کھلاڑیوں اور میچ آفیشلز کیلئے 16 کروڑ 75 لاکھ روپے کی گرانٹ منظور کی، ای سی سی نے انڈر 19 کرکٹ ٹیم کی شاندار کارکردگی کو ای سی سی نے سراہا۔اقتصادی رابطہ کمیٹی میں دفاعی ضروریات کے تحت بُلٹ پروف گاڑیوں کی منظوری، سکیورٹی تقاضوں کے پیش نظر بلٹ پروف گاڑیوں کی خریداری کی منظوری دی گئی۔ای سی سی نے کابینہ ڈویژن اور دفاعی ڈویژن کی سمریز منظور کرلیں۔

رحیم یارخان: وزیراعظم شہباز شریف اپنے مختصر دورہ پر رحیم یار خان پہنچ گئے۔وزیر اعظم شہباز شریف رحیم یارخان میں متحدہ عرب امارات کے صدر کے پیلس جائیں گے۔شہباز شریف متحدہ عرب امارات کے صدر سے ملاقات کریں گے، وزیراعظم اپنے مختصر دورے کے دوران میڈیا سے بھی گفتگو کریں گے۔

کراچی: کراچی میں موسم سرماکی پہلی بارش کی پیش گوئی کر دی گئی۔محکمہ موسمیات کے مطابق 30 دسمبر کو شہر قائد میں بادل برسیں گے، منگل سے بدھ کے درمیان شہر میں مغربی ہواؤں کا سسٹم اثر انداز ہو سکتا ہے، مغربی ہواؤں کے بعد شہر میں سردی کی شدت میں اضافے کا امکان ہے۔28دسمبر کو مغربی ہواؤں کا سلسلہ بالائی علاقوں کو متاثر کرے گا، 29دسمبر کو بلوچستان اور ملحقہ علاقوں میں بادل برسیں گے۔

کراچی: امیر جماعت اسلامی حافظ نعیم الرحمن نے کہا ہے کہ ملک میں چند طاقتور مزید طاقتور ہوتے چلے جا رہے ہیں، پاکستان پر وڈیروں، جاگیر داروں اور سرمایہ داروں کا کنسورشیم مسلط ہے ۔کراچی میں تربیتی اجتماعات سے خطاب کرتے ہوئے حافظ نعیم نے کہا کہ نام نہاد سیاست دان جمہوریت کے نام پر جمہوریت کو قتل کر رہے ہیں، اپنی جماعتوں میں جمہوریت قائم نہ کرنے والے ملک پر حکومت کر رہے ہیں۔ افظ نعیم الرحمن نے کہا کہ 20 فیصد لوگوں کے پاس 80 فیصد لوگوں کے وسائل ہیں، 20 فیصد لوگوں کا سب پر قبضہ ہے ، پاکستان پر وڈیروں جاگیر داروں سرمایہ داروں کا کنسورشیم مسلط ہے ، یہ کنسورشیم پاکستان کے 25 کروڑ عوام کی بولی لگاتا ہے ۔امیر جماعت اسلامی نے کہا کہ اس نظام سے نجات کے لیے طویل اور تیز جدوجہد ناگزیر ہے ، قومی ایئر لائن جو کبھی فخر تھی آج زوال کی مثال بن چکی ہے۔ضلع کیماڑی کے تحت جامع مسجد رابعہ رحمان صحافی کالونی ماڑی پور میں فیملی تربیت گاہ اور ضلع ایئرپورٹ کے تحت جامعہ ملیہ مسجد ملیر میں تربیتی اجتماع سے خصوصی خطاب کرتے ہوئے ان کا کہنا تھا کہ اسٹبلشمنٹ نے کراچی اور سندھ میں بدترین لوگوں کو مسلط کردیا ہے ۔ پیپلز پارٹی40 بڑے وڈیروں پر مشتمل اور وصیت و وراثت کی بنیاد پر چلنے والی جماعت ہے ،جماعت اسلامی نے ثابت کیا ہے کہ اس نے کبھی بھی لسانیت و عصبیت کی سیاست نہیں کی۔ کارکنان گلی گلی جائیں، پاکستان کی آبادی میں 65 فیصد نوجوان ہیں، کارکنان انہیں تحریک کا حصہ بنائیں اور بزرگ ان کی سرپرستی کریں، عوامی کمیٹیاں فعال اور مضبوط بنائیں، حالات کا ڈٹ کر مقابلہ کریں اور دین کے پیغام کو عام کریں۔ آئندہ الیکشن نہ صرف جیتنا ہے بلکہ ووٹ کا تحفظ بھی کرنا ہے اور ایسی عوامی قوت اور طاقت جمع کرنا ہے کہ کوئی مینڈیٹ پر ڈاکا نہ ڈال سکے۔پاکستان سمیت پوری مسلم دنیا کو اپنی فوج غزہ نہیں بھیجنی چاہیے ۔ ٹرمپ کے منصوبے پر اگر فوج بھیجی جائے گی تو یہ فیصلہ ملک اور فوج کے خلاف ہو گا۔ امن کے نام پر دھوکا نہیں چلے گا اگر حکومت نے ایسا کرنے کی کوشش کی تو زبردست مزاحمت کریں گے ۔ حافظ نعیم الرحمن نے مزید کہا کہ پاکستان کی ایئر لائن جو پاکستان کا فخر اور دنیا کی ٹاپ ایئر لائن مانی جاتی تھی جس نے چائنا، امارات ودیگر ممالک کی ایئر لائن کو تربیت دی، اسے حکمران طبقے کی کرپشن و نا اہلی اور من پسند بھرتیوں سے تباہ کردیا گیا اور اسے ایسے موقع پر فروخت کیا جب اس نے گزشتہ 6 ماہ میں قومی خزانے کو فائدہ پہنچایا ہے۔ہمارا اس سے کوئی مطلب نہیں کہ اس کو کس نے خریدا ہے ہم یہ پوچھنا چاہتے ہیں کہ اس کو کیوں فروخت کیا گیا ہے۔ پیپلز پارٹی اور مسلم لیگ ن اور پی ٹی آئی نے پی آئی اے کو بہتر کیوں نہیں بنایا اس لیے ان سب کو کٹہرے میں لانا چاہئے؟ انہوں نے کہا کہ پیپلز پارٹی مسلم لیگ ن سمیت دیگر حکمران پارٹیاں فوج اور اسٹیبلشمنٹ کی طرف دیکھتی ہیں، ہم کسی سازش کے ذریعے سے اقتدار میں نہیں آئیں گے۔ زیر زمین نہیں بلکہ بر سر زمین عوام کی جدوجہد سے ہی اقتدار میں آئیں گے۔پنجاب میں بلدیاتی ایکٹ کے خلاف جماعت اسلامی احتجاج کررہی ہے۔وڈیرے اور جاگیردار نہ صرف بلدیاتی انتخابات نہیں کروانا چاہتے بلکہ اختیارات بھی منتقل کرنے کے لیے تیار نہیں ہے۔ حافظ نعیم الرحمن نے کہا کہ لاہور مینار پاکستان پر بدل دو نظام اجتماع عام میں ملک بھر سے لاکھوں مردو خواتین کی تاریخی شرکت کے بعد نئے عزم اور حوصلے کے ساتھ تحریک اور جدو جہد کا آغاز کر دیا گیا ہے ۔ بد قسمتی سے ملک میں طبقاتی نظام تعلیم اور معیشت میں سود کا نظام قائم ہے ۔ ہم چاہتے ہیں ملک میں یکساں نظام تعلیم اور معیشت سود سے پاک ہو۔ ان کا کہنا تھا کہ ظلم و استحصا ل کا نظام ہی ملک اور قوم کے تمام مسائل کی جڑہے ، اسے جڑ سے اُکھاڑنا ہوگا۔