Category: اہم خبریں

واشنگٹن: امریکی صدر نے ایران پر معاشی حملہ کرتے ہوئے نئی پابندیاں عائد کر دیں۔صدر ٹرمپ نے ایران کے ساتھ تجارت کرنے والے ممالک پر25 فیصد ٹیرف لگانے کا اعلان کر دیا، ٹروتھ سوشل پر امریکی صدر نے کہا اضافی ٹیرف کا اطلاق فوری طور پر نافذ العمل ہوگا، فیصلہ حتمی ہے اس میں کوئی تبدیلی نہیں کی جائے گی۔ٹرمپ نے اپنے پیغام میں ایران کے ساتھ تجارت کرنے والے ممالک پر 25 فیصد ٹیرف لگانے کا اعلان کرتے ہوئے لکھا کہ اس اضافی ٹیرف کا اطلاق فوری طور پر ہوگا، ان کا مزید کہنا تھا کہ فیصلہ حتمی ہے اس میں کوئی تبدیلی نہیں ہوگی۔غیرملکی خبر رساں ادارے کی رپورٹ کے مطابق یہ فیصلہ اس وقت میں سامنے آیا ہے جب صدر ٹرمپ بار بار ایران میں مداخلت کی دھمکیاں دے چکے ہیں اور خبردار کرچکے ہیں کہ ان کے پاس انتہائی سخت آپشنز موجود ہیں۔ان آپشنز میں ایران کیخلاف فوجی کارروائی بھی شامل ہے، امریکی انتظامیہ کے مطابق وہ ایرانی اپوزیشن رہنماؤں سے بھی رابطے میں ہے۔دوسری جانب ایران کے وزیر خارجہ عباس عراقچی کا کہنا تھا کہ ان کی حکومت امریکا کی جانب سے بھیجی گئی تجاویز کا باریک بینی سے جائزہ لے رہی ہے اور امریکی خصوصی نمائندے اسٹیو وٹکوف کے ساتھ رابطے بدستور قائم ہیں۔عباس عراقچی نے مزید کہا تھا کہ امریکی صدر کی جانب سے یہ انتباہ کہ اگر احتجاج خونریز ہوا تو فوجی کارروائی کی جاسکتی ہے، دراصل ’’دہشت گرد عناصر‘‘ کو اکسانے کے مترادف ہے۔یاد رہے کہ ایران میں حکومت مخالف مظاہرے جاری ہیں اور امریکی انسانی حقوق تنظیم کے دعوے کے مطابق دو ہفتے سے جاری مظاہروں میں اب تک 490 افراد ہلاک ہوچکے ہیں۔

واشنگٹن،تہران : امریکی صدر ٹرمپ ایران میں جاری خونریز مظاہروں کے بعد ممکنہ فوجی کارروائی کے مختلف آپشنز پر غور کر رہے ہیں۔امریکی اخبار نیو یارک ٹائمز کے مطابق صدر ٹرمپ کو ایران میں مداخلت سے متعلق بریفنگ دی گئی، جس میں تہران کی سکیورٹی فورسز کو نشانہ بنانے کے منصوبے بھی شامل ہیں۔امریکی حکام کا کہنا ہے کہ ایران میں تشدد کے واقعات میں درجنوں افراد ہلاک اور گرفتار ہو چکے ہیں۔ تاہم امریکی انتظامیہ کے اندر خدشات بھی پائے جاتے ہیں کہ فوجی حملے الٹا اثر ڈال سکتے ہیں، جس سے ایرانی عوام حکومت کے حق میں متحد ہو سکتے ہیں یا ایران جوابی فوجی کارروائی کر سکتا ہے ۔امریکی حکام کے مطابق ٹرمپ ایران میں جاری احتجاجی تحریک کی حمایت کے لیے ایسے اقدامات پر غور کر رہے ہیں جو براہِ راست فوجی حملوں سے کم درجے کے ہوں۔ ان آپشنز میں ایرانی فوج اور حکومتی اداروں کے خلاف سائبر کارروائیاں شامل ہیں، جن کا مقصد مظاہروں کے خلاف کریک ڈاؤن کی صلاحیت کو متاثر کرنا ہے ۔حکام کا کہنا ہے کہ ٹرمپ انتظامیہ ایرانی حکومتی شخصیات اور توانائی و بینکاری جیسے اہم معاشی شعبوں پر نئی پابندیاں عائد کرنے پر بھی غور کر رہی ہے ۔ اس کے علاوہ ایران میں انٹرنیٹ بلیک آؤٹ توڑنے کے لیے اسٹارلنک جیسی ٹیکنالوجی فراہم کرنے کا آپشن بھی زیر غور ہے ، تاکہ مظاہرین عالمی رابطے میں رہ سکیں۔امریکی حکام کے مطابق صدر ٹرمپ کے لیے ایران سے متعلق مختلف آپشنز کی تیاری میں متعدد امریکی ادارے شامل ہیں، جبکہ آئندہ ہفتے باضابطہ بریفنگز متوقع ہیں۔منگل کو صدر ٹرمپ اعلیٰ قومی سلامتی حکام کا اجلاس بلا کر آئندہ لائحہ عمل پر غور کریں گے ۔امریکی اخبار نے دعویٰ کیا ہے کہ صدر ٹرمپ نے ابھی کوئی حتمی فیصلہ نہیں کیا۔امریکی صدر ٹرمپ نے ہفتے کے روز اپنے سوشل میڈیا پلیٹ فارم ٹروتھ سوشل پر کہا کہ ایران آزادی چاہتا ہے اور شاید پہلے سے کہیں زیادہ۔ امریکا ایران کی مدد کے لیے تیار ہے ۔ٹرمپ نے گزشتہ آٹھ روز کے دوران کئی بار کہا ہے کہ اگر ایرانی حکومت مظاہرین پر تشدد کرتی رہی اور انہیں قتل کیا جاتا رہا تو امریکا ان کی حمایت کے لیے آئے گا۔برطانوی میڈیا کے مطابق اسرائیل ایران پر ممکنہ امریکی حملے کے پیش نظر ہائی الرٹ پر ہے ۔ اسرائیلی ویب سائٹ دی یروشلم پوسٹ نے 11 جنوری کو نامعلوم ذرائع کے حوالے سے رپورٹ کیا کہ اسرائیل اس امکان کے پیش نظر ہائی الرٹ پر ہے کہ امریکا ایران میں حکومت مخالف تحریک کی حمایت کے لیے مداخلت کر سکتا ہے ۔ادھر وائی نیٹ ویب سائٹ کے مطابق اسرائیلی وزیرِاعظم نیتن یاہو اور امریکی وزیرِ خارجہ مارکو روبیو نے 10 جنوری کو ایک ٹیلی فونک گفتگو میں ایران کے خلاف ممکنہ امریکی کارروائی پر تبادلہ خیال کیا۔ایران کی پارلیمان کے سپیکر محمد باقر قالیباف نے کہا ہے کہ اگر امریکا ایران پر فوجی حملہ کرتا ہے تو اسرائیل اور امریکی فوجی مراکز جائز اہداف تصور کیے جائیں گے ۔پارلیمان کے اجلاس میں خطاب کرتے ہوئے ایرانی سپیکر نے کہا کہ ایران اپنی دفاعی حکمتِ عملی کو صرف جوابی کارروائی تک محدود نہیں رکھے گا بلکہ واضح اور عملی خطرات کی بنیاد پر پیشگی اقدام بھی کرے گا۔ انہوں نے کہا کہ یہ پیغام صدر ٹرمپ اور ان کے اتحادیوں کے لیے ہے کہ وہ غلط اندازے نہ لگائیں۔انہوں نے دعویٰ کیا کہ ایران اس وقت چار محاذوں اقتصادی، فکری، عسکری اور دہشت گردی پر امریکا اور اسرائیل کے خلاف برسرِپیکار ہے ۔ایران کے صدر مسعود پزشکیان نے کہا ہے کہ اسرائیل اور امریکا کا مقصد حالیہ 12 روزہ جنگ کے ذریعے ملک کو افراتفری کی طرف دھکیلنا تھا۔ایرانی ٹیلی ویژن پر خطاب کرتے ہوئے انہوں نے کہا کہ یہ لوگ اندرونِ ملک اور بیرونِ ملک تربیت یافتہ ہیں، کچھ دہشت گردوں کو باہر سے ملک میں داخل کیا گیا، مساجد کو آگ لگائی گئی اور رشت میں بازاروں کو جلایا گیا۔

غزہ: اسرائیلی فوج کی غزہ میں جنگ بندی کی خلاف ورزیاں جاری ہیں، تازہ حملوں میں11 سالہ بچی سمیت 4 فلسطینی شہید ہوگئے۔عرب میڈیا کے مطابق شمالی اور جنوبی غزہ میں اسرائیلی حملوں میں 11 سالہ بچی سمیت 4 فلسطینی شہید اور 3 زخمی ہوئے۔گزشتہ سال 10 اکتوبر میں معاہدے کے بعد سے اسرائیل 1100 بار جنگ بندی کی خلاف ورزیاں کرچکا ہے جس میں 400 سے زیادہ فلسطینی شہید ہوئے ہیں۔دوسری طرف اسرائیل نے حماس سے آخری یرغمالی کی باقیات کا مطالبہ کر دیا، اسرائیلی حکام کا کہنا ہے آخری یرغمالی کی باقیات ملنے تک غزہ جنگ بندی کے اگلے مرحلے تک نہیں جائیں گے اور نہ ہی رفح کراسنگ کھولیں گے۔

پیرس: برطانیہ اور فرانس نے اعلان کیا ہے کہ اگر روس اور یوکرین کے درمیان امن معاہدہ طے پا جاتا ہے تو دونوں ممالک یوکرین میں اپنی فوج تعینات کریں گے۔یہ اعلان برطانوی وزیرِاعظم سر کیئر اسٹارمر نے پیرس میں یوکرین کے اتحادی ممالک کے ساتھ ہونے والے اجلاس کے بعد سامنے آیا ہے۔سرکیئر اسٹارمر کے مطابق برطانیہ اور فرانس نے ایک اعلانِ نیت پر دستخط کیے ہیں، جس کے تحت یوکرین میں مختلف مقامات پر فوجی مراکز (ملٹری ہبز) قائم کیے جائیں گے، ان کا مقصد مستقبل میں کسی بھی ممکنہ روسی جارحیت کو روکنا اور یوکرین کی سلامتی کو یقینی بنانا ہوگا۔فرانسیسی صدر ایمانوئل میکرون نے بعد ازاں بتایا کہ اس منصوبے کے تحت ہزاروں فوجیوں کی تعیناتی ممکن ہے۔ ان کا کہنا تھا کہ یورپی ممالک یوکرین کو مضبوط اور قابلِ اعتماد سیکیورٹی ضمانتیں فراہم کرنا چاہتے ہیں تاکہ جنگ کے بعد خطے میں دیرپا امن قائم ہو سکے۔اجلاس میں شریک اتحادی ممالک نے اس بات پر بھی اتفاق کیا کہ کسی بھی ممکنہ جنگ بندی یا امن معاہدے کی نگرانی میں امریکہ مرکزی کردار ادا کرے گا، تاہم یوکرین کے ان علاقوں کے مستقبل پر تاحال کوئی حتمی فیصلہ نہیں ہو سکا جو اس وقت روس کے کنٹرول میں ہیں۔واضح رہے کہ روس اس وقت یوکرین کے تقریباً 20 فیصد علاقے پر قابض ہے، روسی صدر ولادیمیر پیوٹن نے فروری 2022 میں یوکرین کے خلاف بڑے پیمانے پر جنگ کا آغاز کیا تھا، جو اب تک جاری ہے۔روس کی جانب سے پہلے ہی خبردار کیا جا چکا ہے کہ یوکرین میں کسی بھی غیر ملکی فوج کی موجودگی کو ’’جائز ہدف‘‘ سمجھا جائے گا۔ تاہم پیرس میں ہونے والے ان حالیہ اعلانات پر روسی حکومت نے تاحال کوئی باضابطہ ردِعمل ظاہر نہیں کیا۔ماہرین کے مطابق برطانیہ اور فرانس کا یہ اعلان یورپی ممالک کی جانب سے یوکرین کے لیے اب تک کا سب سے مضبوط سیاسی اور عسکری اشارہ ہے، تاہم امن معاہدے، علاقائی تنازع اور روس کے ممکنہ ردعمل کے باعث اس منصوبے پر عمل درآمد ابھی کئی چیلنجز سے دوچار ہے۔