Category: اہم خبریں

کراچی: سینئر صوبائی وزیر شرجیل انعام میمن نے کہا ہے کہ وفاقی حکومت کا گندم کی خریداری کا نیا میکنزم دراصل پاکستان پیپلز پارٹی کے مؤثر مطالبات اور اصولی موقف کا نتیجہ ہے۔سینئر وزیر سندھ شرجیل میمن کا کہنا تھا کہ پیپلز پارٹی ہمیشہ سے کسانوں کے مفادات کے تحفظ اور زراعت کی ترقی کے لیے آواز اٹھاتی رہی ہے، وفاق کی حالیہ پالیسی اسی وژن کی عکاسی کرتی ہے۔انہوں نے کہا کہ گندم کی امدادی قیمت کا تعین ایک اہم کامیابی ہے جو گزشتہ سال نہیں دی گئی تھی، وفاقی حکومت نے پیپلز پارٹی کے مطالبے پر اس سال امدادی قیمت کا اعلان کر کے کسانوں اور پاکستان پیپلز پارٹی کے اعتماد کو بحال کیا ہے۔شرجیل انعام میمن نے کہا کہ اس فیصلے سے نہ صرف کسانوں اور کاشتکاروں کو براہِ راست فائدہ ہوگا بلکہ گندم کی پیداوار میں اضافہ، زرِ مبادلہ کی بچت اور ملکی خود کفالت کی راہ بھی ہموار ہوگی۔سینئر صوبائی وزیر نے کہا کہ یہ پیپلز پارٹی کی کسان دوست پالیسیوں کا تسلسل ہے، جس کا مقصد زراعت کو ملکی معیشت کی مضبوط بنیاد بنانا ہے، حکومتِ سندھ نے بھی کاشتکاروں کو ریلیف دینے کے لیے اہم قدم اٹھایا ہے۔انہوں نے کہا کہ ایگریکلچرل انکم ٹیکس، جس کا نفاذ دسمبر 2024 سے ہونا تھا، اسے جون 2025 تک مؤخر کر دیا گیا ہے، زراعت ملکی معیشت کی ریڑھ کی ہڈی ہے، اسی لیے پارٹی کی قیادت ہمیشہ کسانوں اور عام شہریوں کے مفاد کو اولین ترجیح دیتی ہے۔

لاہور: وزیر اطلاعات پنجاب عظمیٰ بخاری نے کہا ہے کہ سعد رضوی کے نام پر موجود 95 بینک اکاؤنٹس اور ان کی مسروقہ و غیر مسروقہ جائیدادیں سیل کر دی گئی ہیں، اس مذہبی جماعت کی قیادت کو تین درجوں (تین ٹیئرز) میں تقسیم کیا گیا ہے اور اُن کے خلاف سخت کریک ڈاؤن جاری ہے۔ڈی جی پی آر میں پریس کانفرنس کے دوران وزیر اطلاعات پنجاب عظمیٰ بخاری نے کہا کہ وزیراعلیٰ پنجاب نے سیلاب زدگان کے حوالے سے کیے گئے وعدے پورے کر دیئے ہیں اور وزیراعلیٰ نے 33 موبائل پولیس سٹیشنز کا افتتاح کیا ہے، جن میں سے سات پنک موبائل پولیس سٹیشنز ہیں جہاں خواتین پولیس اہلکار تعینات رہیں گی۔صوبائی وزیر اطلاعات نے کہا کہ موبائل پولیس سٹیشنز کے شیڈول کا باقاعدہ نوٹیفکیشن جاری کیا جائے گا تاکہ علاقے کے لوگوں کو معلوم ہو کہ یہ سٹیشنز کب اور کہاں موجود رہیں گے۔عظمیٰ بخاری نے کہا کہ مریدکے آپریشنز کے دوران تین عام شہریوں کے شہید اور 48 کے زخمی ہونے کی بات کہی؛ ساتھ ہی 118 پولیس اہلکار گولیوں سے زخمی ہوئے۔ اُن کا کہنا تھا کہ آٹھ پولیس وینز اسلحہ سمیت مظاہرین کے ہاتھ لگ گئیں اور انہی ہتھیاروں سے پولیس پر حملے کیے گئے، نیز اینٹوں سے بھری ٹرالیاں استعمال کر کے بھی پولیس پر حملے ہوئے۔وزیر اطلاعات نے الزام لگایا کہ مذہبی جماعت کا سوشل میڈیا سیل اب بھی پروپیگنڈا کر رہا ہے، ستھرا پنجاب کی گاڑیاں چھینی گئیں اور ان پر سفر کیا گیا، ریسکیو 1122 کی گاڑیاں بھی رکھی گئیں اور عملے پر تشدد کیا گیا۔انہوں نے بتایا کہ مظاہرین نے سیف سٹی کے کیمروں کو توڑ دیا تاکہ شواہد مٹ جائیں، حالانکہ تمام حملوں کی فوٹیجز (ویڈیو شواہد) موجود ہیں، شاہدرہ میں پولیس اہلکار پر تشدد کی ویڈیو بھی موجود ہے، اُنہیں کہنا تھا کہ غزہ اور فلسطین کے نام پر لوگوں کو اشتعال دلوا کر تشدد کروایا گیا۔

پشاور: وزیراعلیٰ خیبر پختونخوا سہیل آفریدی نے کہا ہے کہ وفاق نےضم اضلاع کےساتھ کیے وعدے پر عمل نہیں کیا۔خیبر پختونخوا اسمبلی میں اظہار خیال کرتے ہوئے سہیل آفریدی کا کہنا تھا کہ راتوں رات وفاقی حکومت نےافغان کیمپوں سےمتعلق نوٹس جاری کیا، ہم وفاق سےاپنا حق لیں گے۔اُنہوں نے کہا کہ وفاق نےضم اضلاع کےساتھ جووعدہ کیا پورا نہیں کیا،ایکسپائرہونےوالی بلٹ پروف گاڑیاں پرسوں ہماری پولیس کودی گئی، یہ خیبرپختونخوا پولیس کی تحضیک ہےاس لیےگاڑیاں واپس کررہےہیں۔وزیراعلیٰ خیبر پختونخوا کا کہنا تھا کہ پاک افغان جنگ بندی خوش آئند ہے،خیبرپختونخوا کےعوام تحریک انصاف کوکارکردگی کیوجہ سےووٹ دے رہےہیں، امن وامان کی صورتحال صوبےمیں خطرناک ہے۔سہیل آفریدی نے کہا کہ صوبےسےمتعلق بند کمروں میں فیصلےکیےجاتےہیں، ہم بند کمروں کےفیصلےنہیں مانیں گے،ہم پالیسی بنائیں گے،مرحوم ارشد شریف صحافی کےنام پرایک یونیورسٹی بنائی جائےگی۔اُن کا مزید کہنا تھا کہ خیبرپختونخوا میں3ایم پی اوکےتحت کسی کوگرفتارنہیں کیا جائے گا،کسی طالب علم پرمقدمات درج نہیں ہوں گے۔

راولپنڈی: بانی پی ٹی آئی سے کل منگل کو وکلاء کی ملاقات کا دن، فہرست جیل حکام کو بھجوا دی گئی۔فوکل پرسن بیرسٹر علی ظفر کی جانب سے عمران خان سے ملاقات کے لیے 6 وکلاء کے ناموں کی فہرست جیل حکام کو بھجوائی گئی ہے۔

اسلام آباد: وزیراعظم شہباز شریف آئندہ ہفتے سعودی عرب کا تین روزہ دورہ کریں گے۔سفارتی ذرائع کے مطابق اعلیٰ سیاسی و عسکری قیادت بھی وزیراعظم کے ہمراہ ہو گی، شہباز شریف دورہ سعودی عرب کے دوران سعودی عرب کی اعلیٰ قیادت سے ملاقات بھی کریں گے۔وزیراعظم شہباز شریف سعودی عرب میں فیوچر انویسٹمنٹ انیشی ایٹو سے خطاب کریں گے، وفاقی وزرا بھی وزیراعظم کے ہمراہ سعودی عرب جائیں گے۔

مری :ڈپٹی کمشنر مری آغا ظہیر عباس شیرازی نے کہا ہے کہ ضلع بھر میں کسی قسم کی ہڑتال نہیں ہوئی۔عوام نے انتشار کی پالیسی کو مسترد کر دیا۔ عوام نے انتشار نہیں استحکام کی پالیسی کی حمایت کی۔ انہوں نے عوام الناس کی جانب سے ضلعی انتظامیہ کی جانب سے امن و امان کے لیے کیے گئے اقدامات پر حمایت پر اظہار تشکر کیا ۔ علمائے کرام نے ہمیشہ کی طرح امن و امان برقرار رکھنے میں ضلعی انتظامیہ کا ساتھ دیا۔ کردار قابل ستائش ہے ۔