Category: اہم خبریں

لاہور:وزیراعظم کے مشیر برائے سیاسی امور رانا ثنا اللہ نے کہا ہے افغانستان نے جوجارحیت کا ارتکاب کیااس جیسا ان کو جواب ملا ہے ،ان کی پوسٹیں تباہ ہوگئی ہیں،وہاں سے وہ لاشیں نہیں اٹھا سکے ،وقفہ افغان طالبان کو چاہیے تھا تا کہ وہ اپنی لاشیں اٹھاسکیں۔دنیا نیوز کے پروگرام دنیا مہر بخاری کے ساتھ میں گفتگو کرتے ہوئے رانا ثنا اللہ نے کہا جنگ بندی ہوئی ہے ، چاہے عارضی ہو یا ایک پریڈ تک ہو،یہ اچھی بات ہے ۔ ہم نے 40 سال تک افغان طالبان کی مدد،خاطر مدارت ،ان کی منت، انکی حمایت کی ہے ہم نے سب کچھ کر کے دیکھ لیا ہے لیکن وہ کسی بات پر راضی نہیں ہوئے جنگ ہماری چوائس نہیں ہے ،اب ہم نے قدم اٹھا لیا ہے وہ دہشت گردی سے باز آجائیں،پاکستان میں دہشتگردوں کو بھیجنے ، ان کی سپورٹ ، سہولت کاری سے اب توبہ کریں ، اس کے بغیر افغان طالبان کے ساتھ کوئی بات چیت، صلح اور جنگ بندی نہیں ہو گی، یہ ہماری پہلی شرط ہے ۔ ایک سوال کے جواب میں انہوں نے کہا طالبان نے ہم پر جنگ مسلط کی ہم نے اب انہیں بھی اس جنگ میں لپیٹا ہے ۔ ہم تو پہلے ہی حالت جنگ میں ہیں، افغان طالبان اور فتنہ الخوارج نے بیس پچیس سال سے ہمیں حالت جنگ میں مبتلا کر رکھا ہے ،چھپا ہوا دشمن سامنے کے دشمن سے کہیں زیادہ خطرناک ہوتا ہے ۔مشیر وزیراعظم نے کہا افغانی اس جنگ کا مزہ چکھیں اب جو جنگ ہو گی اس کا ہم ہی نہیں افغان طالبان بھی شکار ہوں گے ،دہشت گردوں سے کسی قسم کی رعایت نہیں ہوگی، شرپسند ہمارے افسروں اورجوانوں کوشہید کر رہے ہیں، اِن کے ساتھ کیا مذاکرات کریں گے ؟۔ رانا ثنا اللہ نے کہا سعد رضوی کی گرفتاری سے متعلق کوئی معلومات نہیں ،ٹی ایل پی والوں نے ایس ایچ او اور کئی لوگوں کو شہید کیااُنہیں نتائج بھگتنا ہوں گے ۔انہوں نے کہا سہیل آفریدی نے وزیر اعلیٰ کا حلف اٹھالیا لیکن منتخب ہونے کے بعد جو تقریر کی اس سے لگتا ہے وہ خودکش بمبار ہیں۔ نومنتخب وزیراعلیٰ نے خود کہا بانی پی ٹی آئی کے عشق میں مارا جاؤں گا۔جب وہ مرنے پر تلا ہوا ہے تو وہ کیسے چلے گا ؟۔

لاہور: پنجاب بھر میں مذہبی جماعت کے خلاف کریک ڈاؤن جاری ہے، پرتشدد احتجاج میں ملوث گرفتار ملزمان کی تعداد 3ہزار 400 ہوگئی۔پولیس کا کہنا ہے کہ مذہبی جماعت کے خلاف پنجاب بھر میں جاری کریک ڈاؤن میں گرفتاریوں کی تعداد 3400 تک جا پہنچی ہے۔لاہور سے گرفتار ملزمان کی تعداد 340 ہوگئی، شیخوپورہ میں 217، منڈی بہاؤالدین 210 ، راولپنڈی 190 ، فیصل آباد 180 ، گوجرانوالہ 160 ، سیالکوٹ 150 اور اٹک میں 156 پرتشدد مظاہرین کو گرفتار کیا گیا۔ان ملزمان کے خلاف پنجاب بھر کے تھانوں میں 76 مقدمات درج کئے گئے، سب سے زیادہ 39 مقدمات لاہور میں درج ہوئے، مظاہرین کے حملوں سے 250 پولیس افسران اور اہلکار زخمی ہوئے۔پولیس کے مطابق اشتعال انگیزی،احتجاج میں ملوث ملزمان کی گرفتاری فہرستوں کےمطابق جاری ہے جبکہ فوٹیجز کی مدد سے براہ راست تشدد اور توڑ پھوڑ میں ملوث ملزمان کی نشاندہی کی جا رہی ہے، ملزمان کو اے، بی اور سی کیٹگری میں تقسیم کر کے گرفتار کیا گیا ہے۔واضح رہے کہ رواں ہفتے لاہور اور مریدکے سمیت پنجاب کے مختلف شہروں میں مذہبی جماعت کے کارکنوں کی جانب سے پرتشدد احتجاج کے باعث نظام زندگی متاثر ہوا تھا۔مریدکے میں مذہبی جماعت کے کارکنوں اور پولیس کے درمیان تصادم میں پولیس افسر اور مذہبی جماعت کے کارکنوں سمیت 5 افراد جاں بحق ہوگئے تھے جبکہ درجنوں زخمی ہوئے تھے۔پولیس ذرائع نے بتایا تھا کہ انتظامیہ نے مظاہرین سے مذاکرات کیے، جس میں احتجاج کو دوسرے مقام پر منتقل کرنے کی ہدایت کی گئی تھی، تاہم مذاکرات کے دوران قیادت ہجوم کو اکساتی رہی، ہجوم نے پتھراؤ، کیلوں والے ڈنڈے اور پیٹرول بم استعمال کیے جبکہ متعدد پولیس اہلکاروں سے اسلحہ چھین کر فائرنگ کی گئی۔ذرائع نے بتایا تھا کہ پولیس نے سانحے سے بچنے کی کوشش میں شیلنگ اور لاٹھی چارج کیا، جس پر مظاہرین مزید مشتعل ہوئے اور منظم حملے کیے گئے، مظاہرین نے کم از کم 40 سرکاری و نجی گاڑیاں اور دکانیں جلائیں، تصادم میں مذہبی جماعت کے 3 کارکن اور ایک راہ گیر جاں بحق ہوگیا، پوسٹ مارٹم رپورٹس کے مطابق فائرنگ چھینے گئے اسلحے سے کی گئی۔مظاہرین نے یونیورسٹی کی بس سمیت متعدد گاڑیاں اغوا کیں، متعدد مقامات سے اندھا دھند فائرنگ بھی کی گئی، پولیس نے متعدد ملزمان کوگرفتار کرلیا، پولیس ذرائع نے بتایا تھا کہ مذہبی جماعت کے سربراہ موقع سے فرار ہونے میں کامیاب ہوگئے تھے۔

مظفرگڑھ :ڈپٹی کمشنر عثمان طاہر جپہ کی زیر صدارت ڈسٹرکٹ ڈویلپمنٹ کمیٹی کا اجلاس منعقد ہوا جس میں ایڈیشنل ڈپٹی کمشنر فنانس و ڈپٹی ڈائریکٹر ڈویلپمنٹ انعم حفیظ سمیت مختلف محکموں کے افسران نے شرکت کی۔اجلاس کے دوران انعم حفیظ نے ضلع بھر میں جاری ترقیاتی منصوبوں پر تفصیلی بریفنگ دیتے ہوئے بتایا کہ تمام اسکیموں پر کام تسلی بخش اور تیز رفتاری سے جاری ہے ۔ انہوں نے بتایا کہ ترقیاتی منصوبے عوامی سہولت کے پیش نظر بروقت مکمل کرنے کیلئے تمام محکمے متحرک ہیں۔ڈپٹی کمشنر عثمان طاہر جپہ نے ہدایت کی کہ تمام منصوبوں کو مقررہ مدت میں پایہ تکمیل تک پہنچایا جائے تاکہ عوامی فلاح و بہبود کے اہداف جلد حاصل کیے جا سکیں۔ انہوں نے واضح کیا کہ ترقیاتی منصوبوں میں استعمال ہونے والے مٹیریل کے معیار پر کسی صورت سمجھوتہ نہیں کیا جائے گا۔انہوں نے متعلقہ افسروں کو ہدایت کی کہ وہ روزانہ کی بنیاد پر منصوبوں کا جائزہ لیں اور کسی بھی قسم کے مسائل کو فوری طور پر حل کریں تاکہ ترقیاتی رفتار برقرار رہے ۔

اسلام آباد: چیئرمین سی ڈی اے و چیف کمشنر اسلام آباد محمد علی رندھاوا سے باکو کے آرکیٹیکٹس و کنسلٹنٹس پر مشتمل وفد نے ملاقات کی۔ باہمی دلچسپی کے مختلف امور سمیت آسان خدمت مرکز منصوبے میں ممکنہ تعاون پر تبادلہ خیال کیا گیا۔ چیئرمین سی ڈی اے نے کہا کہ اسلام آباد کے شہریوں کو فراہم کی جانے والی خدمات میں مزید بہتری لانے کیلئے پرعزم ہے۔ شہریوں کی سہولیات و خدمات کی بہتر انداز میں فراہمی کیلئے مختلف اقدامات کر رہے ہیں، آسان خدمت مرکز کے قیام کا بنیادی مقصد شہریوں کو ایک چھت تلے تمام سہولیات کی فراہمی کو یقینی بنانا ہے اور آسان خدمت مرکز کے قیام سے اسلام آباد کے شہریوں کو کئی محکموں کی سروسز و سہولیات کا حصول ایک چھت تلے ممکن ہوگا۔ ملاقات میں چیئرمین سی ڈی اے نے آذربائجان کے ماہرین کی تکینکی صلاحیتوں، استعداد کار اور تجربات سے بھرپور استفادہ حاصل کرنے کے عزم کا اعادہ بھی کیا۔ ادھر نیشنل انسٹی ٹیوٹ آف پبلک ایڈمنسٹریٹریشن پشاور کے تحت 38ویں سینئر مینجمنٹ کورس کے فیکلٹی ممبران و زیر تربیت افسران نے سی ڈی اے ہیڈکوارٹرز کا دورہ کیا، چیئرمین اور دیگر افسروں نے خیرمقدم کیا۔

ملتان: امیرجماعت اسلامی حافظ نعیم الرحمان نے کہا ہے کہ ملک میں بہت تجربے ہو گئے،ملک کو ایماندار قیادت کی ضرورت ہے۔پنجاب کے شہر ملتان میں تقریب سےخطاب کرتے ہوئے حافظ نعیم الرحمان کا کہنا تھاکہ ہم نوجوانوں کوآئی ٹی کی فری تعلیم دلوائیں گے، ہم پاکستان میں تعلیمی انقلاب لائیں گے، موجودہ سسٹم ڈیلیورنہیں کررہا،جاگیردار،وڈیروں نےپاکستان کوبہت پیچھےدھکیل دیا ہے۔اُنہوں نے کہا کہ ڈاکٹرز،انجینئرز،آئی ٹی پروفیشنل مایوس ہوکرملک سےباہرجارہےہیں، موجودہ دورانفارمیشن ٹیکنالوجی کا دورہے، ڈونلڈ ٹرمپ نےقتل عام کیا اورشہبازشریف چاپلوسی کررہا تھا، ایسےحکمرانوں کی وجہ سے ہمارا سرشرم سے جھک جاتا ہے۔امیر جماعت اسلامی کا کہنا تھا کہ ملک میں غربت تیزی سےبڑھ رہی ہے، دو کروڑ 62 لاکھ بچے سکولوں سے باہر ہیں، نوازشریف،شہبازشریف چالیس سال سےاقتدارمیں ہے، بھٹو،زرداریوں سےپوچھنا چاہتا ہوں بچےسکولوں سےکیوں باہرہے۔حافظ نعیم الرحمان نے کہا کہ چیف منسٹرصاحبہ!قومیں اشتہارات کےذریعے آگےنہیں بڑھتی، تنخواہ دارطبقےکا جینا مشکل ہوچکا ہے، حکمرانوں قوم کوبیوقوف نہ بناؤقوم کومعیاری تعلیم چاہیے،تعلیم دینا ریاست کی ذمہ داری ہے۔اُن کا کہنا تھا کہ ملک میں بہت تجربے ہو گئے،ملک کو ایماندار قیادت کی ضرورت ہے،ہم نوجوانوں کومایوس نہیں کریں گے،نوجوانوں اچھا کھیلنا اورپڑھنا بھی ہے، بنوقابل پروگرام پاکستان کی امید کا پروگرام ہے۔امیر جماعت اسلامی نے کہا کہ اگلےمہینےمینارپاکستان میں نوجوانوں کا تاریخی کنونشن کریں گے، مینارپاکستان میں نظام کی تبدیلی کا چارٹرپیش کریں گے، یہ بیوروکریسی حالات تبدیل نہیں کرسکی،انگریزکی بنائی بیوروکریسی ڈیلیورنہیں کررہی ہےحافظ نعیم الرحمان کا کہنا تھا کہ اللہ نےموقع دیا توبیوروکریسی کا نظام تبدیل کردیں گے،لوکل باڈی الیکشن کےنام پرفراڈ کیا جاتا ہے،ہم بااختیارشہری حکومتوں کا نظام بنائیں گے، نظام کی تبدیلی کا ہمارےپاس پورا نقشہ موجود ہے، نوجوان ہمارے ساتھ ملکرکام کریں ہم نظام بدلیں گے۔